ရူတ်ႉၵႃးသုၼ်ႇတူဝ်လမ်းၼိုင်ႈ ပိၼ်ႈၶႂမ်ႈ ၼႂ်းၵႄႈ သီႇပေႃႉ – လႃႈသဵဝ်ႈ ၵူၼ်းၼႂ်းၵႃးမၢတ်ႇၸဵပ်း လႆႈႁၢမ်သူင်ႇႁူင်းယႃ။
မိူဝ်ႈၼႆႉ ဝၼ်းတီႈ 28/1/2020 ယၢမ်းၵၢင်ၼႂ် 10 မူင်း ၵႃးလမ်းၼိုင်ႈ ပဵၼ်ၽေးဢုပၢတ်ႈ ပိၼ်ႈၶႂမ်ႈ တီႈဝၢၼ်ႈပၢင်သဝ်ႈ ႁိမ်း တၢင်းၽႄ 9 လၵ်း ၼႂ်းၵႄႈသီႇပေႃႉ – လႃႈသဵဝ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
ၵူဝ်ႇမဵဝ်း ၸုမ်းၸွႆႈထႅမ် ပရႁိတ (နယ်စည်းမခြား ပရဟိတ သီပေါ) လၢတ်ႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵႃးၼႆႉ လုၵ်ႉ တၢင်း လႃႈသဵဝ်ႈမႃးတၢင်းသီႇပေႃႉ။ လွင်ႈၵႃးပိၼ်ႈၼၼ်ႉတႄႉ ႁဵတ်းႁိုဝ်လႄႈ ပိၼ်ႈၵႂႃႇဢၼ်ဝႃႈၼၼ်ႉ ႁဝ်းၶႃႈ ဢမ်ႇလႆႈ ႁူႉၶႃႈ။ ႁဝ်းၶႃႈ လႆႈၵႂႃႇႁပ်ႉဢဝ်တူဝ်ၵူၼ်းမၢတ်ႇၸဵပ်းၼၼ်ႉသေ ႁၢမ်သူင်ႇတီႈႁူင်းယႃ ၵူၺ်းၶႃႈ”ဝႃႈၼႆ။
ပဵၼ်ရူတ်ႉၵႃးဢွၼ်ႇၸႂ်ႉၼႂ်းၼႃႈႁိူၼ်း၊ ၶီႇမႃးၸွမ်းၵၼ် 4 ၵေႃႉလႄႈ လုၵ်ႈဢွၼ်ႇ 2 ၵေႃႉသေ လႆႈမၢတ်ႇၸဵပ်းၵၼ် ဢိတ်း ဢွတ်း။ လွင်ႈလူႉတၢႆတႄႉ ဢမ်ႇမီး ယၢမ်းလဵဝ် သူင်ႇယူတ်းယႃတူဝ်ဝႆႉတီႈႁူင်းယႃသီႇပေႃႉယဝ်ႉ ဝႃႈၼႆ။
