ၵၢတ်ႇသိုဝ်ႉၶၢႆ မၢၵ်ႇမႆႉ 105 လၵ်း မူႇၸေႊ ပိုၼ်ၽၢဝ်ႇ ပၼ်ၾၢင်ႉ ၸဝ်ႈသူၼ် ႁႂ်ႈၵိုတ်းယင်ႉ လွင်ႈတေႃႉမၢၵ်ႇမႆႉသူင်ႇၸူး မိူင်းၶႄႇ။
ဝၼ်းတီႈ 27/1/2020 ၼၼ်ႉ ယူႇတီႈပၢင်ၵၢတ်ႇသိုဝ်ႉၶၢႆ မၢၵ်ႇမႆႉ 105 လၵ်း ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ် လိၼ်တႆး – ၶႄႇ ဢွၵ်ႇၶေႃႈပိုၼ်ၽၢဝ်ႇ ပၼ်ၾၢင်ႉထိုင် ၸဝ်ႈသူၼ် ၼႂ်းမိူင်းတႆး၊ မိူင်းမၢၼ်ႈ ႁႂ်ႈၵိုတ်းယင်ႉဝႆႉ လွင်ႈတေႃႉ မၢၵ်ႇမႆႉ သူင်ႇၸူးမိူင်းၶႄႇၸူဝ်ႈၶၢဝ်း ယွၼ်ႉဝႃႈမိူင်းၶႄႇ ပဵၼ်ဝႆႉတၢင်းပဵၼ်ဝႆႊရတ်ႊသ်ၶူဝ်ႊရူဝ်ႊၼႃႊ ဝူႊႁၢၼ်ႊ ဝႃႈၼႆ။
ၸၢႆးၶိၼ်ႇမွင်ႇ ၵႅမ်ႁူဝ်ပဝ်ႈ ၵၢတ်ႇမၢၵ်ႉမႆႉ 105 လၵ်း လၢတ်ႈၽူႈတွႆႇႁွၵ်ႈဝႃႈ “ တေႃႈလဵဝ်ၼႆႉ ၵွပ်ႈပိူဝ်ႈဝႃႈ ၾၢႆႇ မိူင်းၶႄႇၼႆႉ ၶဝ်ပႆႇၵုမ်းၵမ်(ၵုမ်းထိင်း) လႆႈတၢင်းပဵၼ်ၶူဝ်ႊရူဝ်ႊၼႃႊ (Virus) ၼႆႉ။ ၵွပ်ႈၼႆ ႁဝ်းၶႃႈ ပိုၼ်ၽၢဝ်ႇပၼ်ၾၢင်ႉထိုင် ၸဝ်ႈသူၼ် ႁဝ်း ယွၼ်ႉပိူဝ်ႈတၢင်းပဵၼ်ၼႆႉသေ တၢင်းမိူင်းၶႄႇၶဝ် မီးတၢင်းယၢပ်ႇၽိုတ်ႇ။ ၶဝ်ဢမ်ႇၸၢင်ႈမႃးသိုဝ်ႉမႃးၶၢႆ။ ၵွပ်ႈၼႆ ႁဝ်းၶႃႈ ၵုမ်း(ထိင်း) ဝႆႉ ယႃႇပေၼႅတ်ႈသူင်ႇၶူဝ်းၵုၼ်ႇ-မၢၵ်ႇမႆႉၶိုၼ်ႈမႃး” ဝႃႈၼႆ။
ယွၼ်ႉဝႃႈ တၢင်းပဵၼ်ၶူဝ်ႊရူဝ်ႊၼႃႊၼႆႉသေ ပႆႇၸၢင်ႈဢဝ်မၢၵ်ႇမႆႉ သူင်ႇၸူးမိူင်းၶႄႇလႄႈလႆႈ ၵိုတ်းယင်ႉဝႆႉ ၸူဝ်ႈၶၢဝ်း ဝႃႈၼႆ။
ၸၢႆးၶိၼ်ႇမွင်ႇ သိုပ်ႇလၢတ်ႈဝႃႈ “ သင်ဝႃႈ မၢၵ်ႇမႆႉမႃးထိုင်တီႈပၢင်ၵၢတ်ႇ 105 လၵ်းယဝ်ႉ ၶူဝ်းၵုၼ်ႇၸိူဝ်းၼႆႉ တေၵွင်ဝႆႉပႅတ်ႈ လွၵ်ႇပႅတ်ႈလၢႆ။ ၵႃႈၶၼ်ၵေႃႈတေလူႉသုမ်းႁႅင်း။ ၵွပ်ႈၼၼ် မၢၵ်ႇမႆႉၸိူဝ်းၼၼ်ႉ ႁႂ်ႈဝႆႉၼႂ်းသူၼ်ၽႂ် သူၼ်မၼ်းဝႆႉၵမ်းၼိုင်ႈ၊ သုမ်းၵေႃႈႁႂ်ႈလႆႈသုမ်းၼႂ်းသူၼ်၊ မၼ်းတေဢမ်ႇလႆႈသုမ်းၵႃႈၵႃး၊ ၵႃႈၸႂ်ႉၸၢႆႇ” ဝႃႈၼႆ။
ၼင်ႇႁိုဝ် ၸဝ်ႈသူၼ်ၶဝ် ပေႃးတေဢမ်ႇလူႉသုမ်းၼမ်ၼၼ်ႉ သင်ဝႃႈ တၢင်းၾင်ႇမိူင်းၶႄႇၵုမ်းၵမ်လႆႈတၢင်းပဵၼ် ၶူဝ်ႊရူဝ်ႊ ၼႃႊယဝ်ႉၸိုင် ယူႇတီႈပၢင် ၵၢတ်ႇၵႃႉၶၢႆမၢၵ်ႇမႆႉ 105 လၵ်း တေပွင်ႇၶၢဝ်ႇၸူးထိုင်ၵမ်းလဵဝ် ပိုၼ်ၽၢဝ်ႇဢွၵ်ႇဝႆႉၼင်ႇၼႆ။
ယူႇတီႇပၢင်ၵၢတ်ႇၵႃႉၶၢႆမၢၵ်ႇမႆႉ 105 လၵ်းၼႆႉသေ လႆႈတေႃႉဢဝ်တႅင်ၸမ်ႇပူႇ၊ တႅင်ႁွမ် သူင်ႇၸူးမိူင်းၶႄႇ ၼိုင်ႈဝၼ်းလႂ် ၽတ်ႉၽဵင်ႇ ၵႃးလူင် 300 လမ်းထိုင် ႁိမ်း 400 လမ်းတႃႇသေႇ။
ၸွမ်းၼင်ႇၶၢဝ်ႇငၢဝ်း South China Morning Post မိူင်းၶႄႇ ဢွၵ်ႇဝႆႉဝႃႈ တေႃႇထိုင်ဝၼ်းတီႈ 27 မႃးၼႆႉ ၵူၼ်းတိတ်းၸိူဝ်ႉ မႅင်း ဝႆႊရတ်ႊသ် ၶူဝ်ႊရူဝ်ႊၼႃႊ ၼႂ်းမိူင်းၶႄႇ မီးၵႂႃႇယဝ်ႉ 4,494 ၵေႃႉသေ ၵူၼ်းတၢႆ မီးၵႂႃႇ 106 ၵေႃႉ။
လိူဝ်ၼၼ်ႉ ဢၼ်ၽႄႈလၢမ်းထိုင်ၵႂႃႇတၢင်ႇမိူင်းထႅင်ႈ မိူၼ်ၼင်ႇ မိူင်းႁွင်ႊၵွင်ႊ ၵူၼ်းၸပ်းတၢင်းပဵၼ် 8 ၵေႃႉ၊ မိူင်းမႃႊၵၢဝ်ႉ 7 ၵေႃႉ၊ တၢႆႊဝၢၼ်ႊ 5 ၵေႃႉ၊ ဢေးသျုႊ 36 ၵေႃႉ (ပႃးမိူင်းထႆး)၊ ယူႊရူပ်ႊ 4 ၵေႃႉ၊ ဢမေႊရိၵႃႊၼိူဝ် 6 ၵေႃႉလႄႈ ဢေႃးသ တြေႊလီႊယိူဝ်ႊ 5 ၵေႃႉ ၸဵမ်ၸိူဝ်းၼႆႉ။
