ၵူၼ်းမိူင်းသီႇပေႃႉ ၺႃးယိုဝ်းတၢႆထႅင်ႈ 3 ၵေႃႉ ၽူႈၸၢႆး 2 ၵေႃႉလႄႈ ၽူႈယိင်း 1 ၵေႃႉ။
ဝၼ်းတီႈ 24/1/2020 ယၢမ်းၵၢင်ၼႂ် မီးၸုမ်းဢမ်ႇႁူႉၾၢႆႇ/ ၵူၼ်းဢမ်ႇႁူႉၾၢႆႇသေ ယိုဝ်းတၢႆ ၵူၼ်းမိူင်း 3 ၵေႃႉ တီႈႁိမ်းဝၢၼ်ႈ ၵုင်းမူင်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ ယူႇတီႈၸုမ်းပရႁိတ (နယ်စည်းမခြား ပရဟိတ သီ ပေါ) လႆႈၵႂႃႇႁၢမ်ဢဝ်တူဝ်တၢႆ ၵူၼ်းၸိူဝ်းၼၼ်ႉ သူင်ႇႁူင်းယႃ။
ၵူဝ်ႇမဵဝ်း ၸုမ်းၸွႆႈထႅမ် ပရႁိတ (နယ်စည်းမခြား ပရဟိတ သီပေါ) လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈႁပ်ႉႁူႉၶၢဝ်ႇ ၸႅင်ႈၸူးသေ လႆႈၵႂႃႇႁၢမ်ဢဝ်တူဝ်တၢႆၶဝ်ၸိူဝ်းၼၼ်ႉမႃးသူင်ႇႁူင်းယႃသီႇပေႃႉ။ ၵူၼ်းတၢႆၸိူဝ်းၼၼ်ႉတႄႉ ပဵၼ်ၽႂ်ဢၼ် ဝႃႈၼၼ်ႉ ႁဝ်းၶႃႈဢမ်ႇႁူႉၶႃႈ” ဝႃႈၼႆ။
ၵူၼ်းမိူင်းၺႃးယိုဝ်းတၢႆ ပွၵ်ႈၵမ်းၼႆႉ ပဵၼ်ပွၵ်ႈၵမ်းထီႉသၢမ်ယဝ်ႉ။ ပိုၼ်ႉတီႈဢၼ်ၵမ်းၵမ်းၺႃးယိုဝ်းၼၼ်ႉၵေႃႈ ပဵၼ်ဢွင်ႈ တီႈၵူၼ်းသူႇသမ်းၵႃႉၶၢႆယႃႈမဝ်းၵမ်ၶဝ်ယူႇသဝ်း ၵူၼ်းပိုၼ်ႉတီႈသီႇပေႃႉ လၢတ်ႈၼႄၼင်ႇၼႆ။
ၸၢႆးၸူဝ်း ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ဢွင်ႈတီႈၼၼ်ႉ ၵူၼ်းမိူင်းဢၼ်ၺႃးယိုဝ်းတၢႆ ပဵၼ်ပွၵ်ႈၵမ်းသၢမ် ယဝ်ႉ။ ယွၼ်ႉသင်လႄႈ ၺႃးယိုဝ်းတၢႆဢၼ်ဝႃႈၼၼ်ႉ ဢမ်ႇလႆႈႁူႉလွင်ႈတၢင်းမၼ်းလီလီသေပွၵ်ႈၶႃႈ” ဝႃႈၼႆ။
ဢွင်ႈတီႈဢၼ်ၵႆႉပိုတ်းယိုဝ်းၵၼ်တၢႆၼၼ်ႉ မၼ်းပဵၼ်ဢွင်ႈတီႈၵူၼ်းသူႇသမ်း ၵႃႉၶၢႆယႃႈမဝ်းၵမ် ၵႂႃႇမႃးတူင်ႉၼိုင်ယူႇသဝ်း ၵၼ်ၵေႃႈၸႂ်ႈလႄႈ ၵူၼ်းမိူင်းၽၵ်းၵႃႇတႄႉ ဢမ်ႇႁတ်းၵႂႃႇမႃးတီႈၼၼ်ႈ ၸၢႆးၸူဝ်းလၢတ်ႈၼႄၼင်ႇၼႆ။
ႁိမ်းဝၢၼ်ႈၵုင်းမူင်ႈၼႆႉ မိူဝ်ႈဝၼ်းတီႈ 11 လိူၼ်ၼႆႉၵေႃႈ ၽူႈၸၢႆး ၺႃးယိုဝ်းတၢႆ 2 ၵေႃႉ ။ ယဝ်ႉၵေႃႈ မိူဝ်ႈဝၼ်းတီႈ 28/12/ 2019 ၼၼ်ႉၵေႃႈ ၽူႈၸၢႆး 3 ၵေႃႉ ၺႃးယိုဝ်းတၢႆတီႈၼၼ်ႈၼင်ႇၵဝ်ႇ ဝႃႈၼႆ။
ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 15/1/2020 ၼၼ်ႉၵေႃႈ တၢင်းပွတ်းဝၢၼ်ႈၼွင်မွၼ် ၸႄႈဝဵင်းလႃႈသဵဝ်ႈၼၼ်ႉၵေႃႈ ၽူႈ ၸၢႆး 2 ၵေႃႉ ၺႃးယိုဝ်းတၢႆ မိူၼ်ၵၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ