ၵူၼ်းမိူင်းၼမ်ႉလၼ်ႈ ႁူမ်ႈၵၼ် တၢင်ႇပၢႆႉၵၢတ်ႇ ဢၼ်ပႃးလိၵ်ႈတႆးတင်း လိၵ်ႈမၢၼ်ႈ တေဢၢၼ်းပိုတ်ႇၵၢတ်ႇမႂ်ႇ ပဵၼ်တၢင်း ၵၢၼ် ၼႂ်းႁၢင်လိူၼ်ၼႆႉ။

မိူဝ်ႈၼႆႉ ဝၼ်းတီႈ 21/1/2020 ယၢမ်းၵၢင်ၼႂ် ၵူၼ်းမိူင်း၊ ၶွမ်ႊပၼီႊမိူင်းတႆးႁၢင်ႈလီ(ရှမ်းပြည်အလှ) တင်း ႁွင်ႈၵၢၼ်ၾၢႆႇ လိူမ်ႈလႆႇ ႁူမ်ႈၵၼ်တၢင်ႇပၢႆႉၵၢတ်ႇဝဵင်းၼမ်ႉလၼ်ႈ ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ တီႈပၢႆႉၵၢတ်ႇၼၼ်ႉ တႅမ်ႈဝႆႉ 2 ၽႃသႃ လိၵ်ႈတႆးတင်းလိၵ်ႈမၢၼ်ႈ ဝႃႈၼႆ။

လုင်းၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသီႇပေႃႉ လၢတ်ႈၼႄၽူႈတွႆႇႁွၵ်ႈဝႃႈ “ ၸႂ်ႈၶႃႈ ဢေႃႈ မိူဝ်ႈၼႆႉ ယၢမ်းၵၢင်ၼႂ် ႁဝ်းၶႃႈ ၵၢပ်ႈသွမ်းသင်ၶၸဝ်ႈ၊ ထွမ်ႇတြႃး၊ ဝၢၼ်းပရိတ်ႈ လႄႈ တၢင်ႇပၢႆႉၵၢတ်ႇ။ ပေႃးထိုင်မႃး ဝၼ်းတီႈ 26 လိူၼ်ၼႆႉၸိုင် ႁဝ်းၶႃႈ တေပိုတ်ႇၵၢတ်ႇလူင်ၼမ်ႉလၼ်ႈႁဝ်း ပဵၼ်တၢင်းၵၢၼ်ၶႃႈ” ဝႃႈၼႆ။

ၵၢတ်ႇလူင်ဝဵင်းၼမ်ႉလၼ်ႈၼႆႉ ၺႃးၾႆးမႆႈ မိူဝ်ႈပူၼ်ႉမႃး ပီ 2016 လိူၼ်ၼူဝ်ႊဝႅမ်ႊၿိူဝ်ႊ ယူႇတီႈၵူၼ်းမိူင်း၊ ၶွမ်ႊပၼီႊမိူင်း တႆးႁၢင်ႈလီ လႄႈ ၾၢႆႇလိူမ်ႈလႆႇ ၸင်ႇလႆႈႁူမ်ႈၵၼ်ၶိုၼ်းၶိုင်သၢင်ႈႁဵတ်းမႂ်ႇၶိုၼ်း ဝႃႈၼႆ။

လုင်းၸၢႆးၶမ်းဢွင်ႇ သိုပ်ႇလၢတ်ႈဝႃႈ “ တေႃႈလဵဝ် ၵၢတ်ႇလူင်ၼမ်ႉလၼ်ႈႁဝ်းၶႃႈၼႆႉ ၵေႃႇသၢင်ႈႁဵတ်းယဝ်ႉမူတ်းယဝ်ႉၶႃႈ။ ယူႇတီႈၶွမ်ႊပၼီႊမိူင်းတႆးႁၢင်ႈလီၵေႃႉၵေႃႇသၢင်ႈႁဵတ်းပၼ်။ ပဵၼ် 2 ၸၼ်ႉ။ ႁွင်ႈၶၢႆၶူဝ်း မီးယူႇ မွၵ်ႈ 600 ႁွင်ႈ ပၢႆၼႆႉ” ဝႃႈၼႆ။

ပၢႆႉၵၢတ်ႇဢၼ်တၢင်ႇမိူဝ်ႈၼႆႉသမ်ႉ တႅမ်ႈဝႆႉ လိၵ်ႈတႆးတင်း လိၵ်ႈမၢၼ်ႈ 2 ၽႃသႃ။ လိၵ်ႈတႆး တႅမ်ႈဝႆႉ “ ၵၢတ်ႇလူင်ဝဵင်းၼမ်ႉ လၼ်ႈ” ။ လိၵ်ႈမၢၼ်ႈသမ်ႉ တႅမ်ႈဝႆႉ “ ၁၃၈၁ သီပေါမြို့နယ် စည်ပင်သာယာရေးဌာန၊ နမ့်လန် မြို့မစျေး ကြီး 2020” ဝႃႈ ၼႆ။

ပေႃးထိုင်မႃး ဝၼ်းတီႈ 26/1/2020 ၼႆႉ ၵၢတ်ႇလူင်ဝဵင်းၼမ်ႉလၼ်ႈ တေပိုတ်ႇပဵၼ်တၢင်းၵၢၼ်ယဝ်ႉ ဝႃႈၼႆ။