ၶိူင်ႈၵွင်ႈၵၢင်ႇ ဢၼ်ၺႃးတီႉတီႈမူႇၸေႊၼၼ်ႉ ဢမ်ႇမီးၸဝ်ႈၶွင်

တပ်ႉသိုၵ်း ၵူတ်ႇထတ်းတီႉလႆႈ ၶိူင်ႈၵွင်ႈၵၢင်ႇ ၼႂ်းၸႄႈဝဵင်းမူႇၸေႊ လႅၼ်လိၼ်တႆး – ၶႄႇ ၸိုင်ႈတႆးပွတ်းႁွင်ႇ။

မိူဝ်ႈဝၼ်းတီႈ 20/1/2020 ႁွင်ႈၵၢၼ်ၾၢႆႇပွင်ႇၶၢဝ်ႇ တပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႃႈ ၵူတ်ႇထတ်းတီႉလႆႈ ၶိူင်ႈ ၵွင်ႈၵၢင်ႇ တီႈႁိမ်းတႃႈႁူဝ်း ပွၵ်ႉတေႃႇယွတ်ႈ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ပလိၵ်ႈၸႄႈဝဵင်းမူႇၸေႊ ၵေႃႉၼိုင်ႈ လၢတ်ႈၼႄၽူႈတွႆႇႁွၵ်ႈဝႃႈ “ ႁဝ်းၶႃႈ ၵူတ်ႇထတ်းတီႉလႆႈမိူဝ်းဝႃး။ ပဵၼ်ၶွင်ၸုမ်းလႂ်။ ၶွင်ၽႂ် ဢၼ်ဝႃႈၼၼ်ႉ တေႃႈလဵဝ် တိုၵ်ႉၵူတ်ႇထတ်းဝႆႉယူ” ဝႃႈၼႆ။

ၵဵဝ်ႇၵပ်းလွင်ႈၼႆႉ တေၵူတ်ႇထတ်းပၼ်တူတ်ႈတၢမ်ႇၵႂႃႇ ၸွမ်းၼင်ႇ ပၵ်းပိူင်မၢႆမီႈမီး ဝႃႈၼႆ။

ၸႄႈဝဵင်းမူႇၸေႊၼႆႉ ပဵၼ်ဝဵင်းဢၼ်တိတ်းၸပ်း မိူင်းၶႄႇဝဵင်းၼိုင်ႈသေ မီးၸုမ်းယိပ်းၵွင်ႈၵၢင်ႇ၊ ၸုမ်းပီႇတူႉၸိတ်ႉ ၸဵမ် ၸိူဝ်းၼႆႉ တူင်ႉၼိုင်ၵႂႃႇမႃးယူႇတႃႇသေႇ ၵၢၼ်သိုဝ်ႉၶၢႆ ၶိူင်ႈၵွင်ႈၵၢင်ႇၵေႃႈငၢႆႈ။ လိူဝ်ၼၼ်ႉ ၵႆႉမီးလွင်ႈ ပိုတ်းယိုဝ်းၵၼ်။

ၸၢႆးၺုၼ်ႉ ၵူၼ်းပွၵ်ႉတေႃႇယွတ်ႈ လၢတ်ႈၼႄၽူႈတွႆႇႁွၵ်ႈဝႃႈ “ တီႈဝဵင်းႁဝ်းၶႃႈၼႆႉ သိုဝ်ႉၶၢႆၶိူင်ႈၵွင်ႈၵၢင်ႇၵၼ်ငၢႆႈၼႃႇၶႃႈ။ တေႃႈလဵဝ် ဢၼ်တီႉလႆႈၶိူင်ႈၵွင်ႈၵၢင်ႇၼႆႉ ယင်းဢေႇလူးၵွၼ်ႇ။ ပေႃးပဵၼ်ၸုမ်းပီႇတူႉၸိတ်ႉၶဝ်ၸိုင် ပၢႆယိပ်းၵွင်ႈ ၶဝ်ႈၽႅဝ်ၼႂ်း ဝဵင်းၵွၼ်ႇ” ဝႃႈၼႆ။

မိူဝ်ႈဝၼ်းတီႈ 18 လိူၼ်ၵျႅၼ်ႊၼိဝ်ႊရီႊပူၼ်ႉမႃးၼႆႉ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ၸီႉသင်ႇ ႁႂ်ႈဢိုတ်းႁူင်းၵၢၼ်တေႃႇ လွင်း ၼႂ်းၸႄႈဝဵင်းမူႇၸေႊ ဝႃႈၼႆ။