ၸုမ်းပွင်ၵၢၼ် ပၢႆးပၺ်ၺႃ RCSS လႆႈသူးရၢင်းဝလ်း ၾၢႆႇၵၢၼ်ပူၵ်းပွင်ပၢႆးပၺ်ၺႃ တီႈၵုင်းထဵပ်ႈ(မိူင်းၵွၵ်ႇ) ၸိုင်ႈထႆး။

ဝၼ်းတီႈ 19/1/2020 ယၢမ်းဝၢႆးဝၼ်း 1 မူင်း ယူႇတီႈ မူလၼိထိ လိၼ်လီၼမ်ႉသႂ် ၸိုင်ႈထႆး ၸတ်းႁဵတ်းပၢင်တွၼ်ႈသူး ၽူႈ ဢွၼ်ႁူဝ် ဢၼ်လီယုၵ်ႉယွင်ႈလႄႈ ဢဝ်ပဵၼ်တူဝ်ယၢင်ႇလီ ပွၵ်ႈၵမ်း 4 တီႈၸၼ်ႉၸွမ်ရၢတ်ႉၶျၽတ်း ၽရႃႉၼၶွၼ်း ၵုင်း ထဵပ်ႈ ၸိုင်ႈထႆး။ ၼႂ်းၼၼ်ႉ ၸုမ်းပွင်ၵၢၼ်ပၢႆးပၺ်ၺႃ RCSS လႆႈႁပ်ႉသူးရၢင်းဝလ်း ၾၢႆႇၵၢၼ်ပူၵ်းပွင်ပၢႆးပၺ်ၺႃ ဝႃႈၼႆ။

ၸၢႆးလၢၼ်တႆး ၽူႈၸတ်းၵၢၼ် ၸုမ်းပွင်ၵၢၼ်ပၢႆးပၺ်ၺႃၶွင်ႇသီႇဢဝ်ၶိုၼ်းၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “ မၼ်းပဵၼ် သူးရၢင်းဝလ်း ဢၼ်ဝႃႈ မုၵ်ႉၸုမ်းၵၢၼ်ပူၵ်းပွင်ပၢႆးပၺ်ၺႃလႄႈ တူဝ်ယၢင်ႇလီ မွပ်ႈဢၢပ်ႈပၼ် တီႈၸုမ်းပွင်ၵၢၼ်ပၢႆးပၺ် ၺႃ ႁူင်းႁဵၼ်းလွႆတႆးလႅင်း ဢၼ်လႆႈပူၵ်းပွင်ပၢႆးပၺ်ၺႃမႃး” ဝႃႈၼႆ။

ယူႇတီႈမူလၼိထိ လိၼ်လီၼမ်ႉသႂ် ၸိုင်ႈထႆး မွပ်ႈပၼ်သူးရၢင်းဝလ်းၼႆႉ ပဵၼ်သူး ၽူႈဢွၼ်ႁူဝ်လီ၊ ၽူႈသၢင်ႈတၢင်းလီ ပၼ်တူင်ႇဝူင်းၵူၼ်းလႄႈ ဝၢၼ်ႈမိူင်း၊ ၵၢၼ်ပူၵ်းပွင်ပၢႆးပၺ်ၺႃ၊ ၵၢၼ်မႅတ်ႇပႅင်းႁၵ်ႉသႃသိင်ႇဝႅတ်ႉလွမ်ႉ၊ ၽူႈၸွႆႈၵၢၼ် (ၸေႇတၼႃႇ)၊ ၽူႈႁၢပ်ႇၵၢၼ်လူင်ပွင်ၸိုင်ႈ၊ ၾၢႆႇၽူႈသိုဝ်ႇၶၢဝ်ႇ၊ ၵၢၼ်ပူၵ်းပွင်မုၵ်ႉၸုမ်းလႄႈ ၵၢၼ်ပူၵ်းပွင်ပၢႆးမၢၵ်ႈမီး ၸဵမ်ၸိူဝ်းၼႆႉ။

ၸၢႆးလၢၼ်တႆး သိုပ်ႇလၢတ်ႈဝႃႈ “ သူးရၢင်းဝလ်းတီႈၸုမ်းပွင်ၵၢၼ်ၾၢႆႇပၢႆးပၺ်ၺႃ ၶွင်ႇသီႇဢဝ်ၶိုၼ်းၸိုင်ႈတႆး ႁဝ်းၶႃႈလႆႈ ၼႆႉ ယူႇတီႈၸုမ်းမူလၼိထိၶဝ်မႃးလဵပ်ႈႁဵၼ်းႁဝ်း၊ မႃးဢုပ်ႇဢူဝ်း၊ မႃးတူၺ်းငဝ်းလၢႆး၊ ႁဝ်းၶႃႈ လႅၵ်ႈလၢႆႈၵၼ်မႃးမီးၶၢဝ်း တၢင်းႁိုင်ယဝ်ႉ။ ၶဝ်ႁူႉ လွင်ႈႁဵတ်းသၢင်ႈ ၵၢၼ်ပူၵ်းပွင်ႁဝ်းပဵၼ်ၶၵ်ႉပဵၼ်တွၼ်ႈ။ ယူႇတီႈႁဝ်းတႄႉ တေလႆႈႁပ်ႉသူးၼႆႉ ႁဝ်း ၶႃႈဢမ်ႇလႆႈႁူႉ ၶဝ်မႃးလဵပ်ႈႁဵၼ်းသေတၢင်ႇထိုင် ၵႂႃႇႁင်းၵူၺ်းၶဝ်သေ၊ ဝၢႆးမႃးၶဝ်ၸင်ႇ ပွင်ႇပၼ် မွပ်ႈပၼ်သူးႁဝ်းၶႃႈမႃး” ဝႃႈၼႆ။

ႁူင်းႁဵၼ်းၸိူဝ်ႉၸၢတ်ႈ လွႆတႆးလႅင်း ဢၼ်ပိုတ်ႇဝႆႉၼႆႉ ၸဵမ်ၼႂ်းမိူင်းတႆး ၸွမ်းလႅၼ်လိၼ်တႆး – ထႆး တင်းမူတ်းမီး 200 လင် ပၢႆ၊ ၼႂ်းၼၼ်ႉ ၸၼ်ႉငဝ်ႈမီး 225 လင်၊ ၸၼ်ႉၵၢင် 5 လင်လႄႈ ၸၼ်ႉသုင် 1 လင်။ လုၵ်ႈႁဵၼ်းသမ်ႉ တင်းမူတ်းမီး 11,595 ၵေႃႉ။ ၶူးသွၼ် တင်းမူတ်းမီး 500 ပၢႆ။

“ သူးရၢင်းဝလ်း တီႈဢၼ်လႆႈႁပ်ႉမႃးၼႆႉ မၼ်းပဵၼ်တိုဝ်ႉတၢင်းလီ တႃႇပၢႆးပၺ်ၺႃမိူင်းတႆးႁဝ်းၶႃႈ ယူႇတီႈၸုမ်းပွင် ၵၢၼ် ပၢႆးပၺ်ၺႃ ႁဝ်းၶႃႈသေ ၼမ်းႁဵတ်းသၢင်ႈ မၼ်းပဵၼ်ႁႅင်းၸႂ်ဢၼ်ၼိုင်ႈ ပိူၼ်ႈၵေႃႈယွမ်းႁပ်ႉ ၼႂ်းၵၢၼ်ႁဵတ်းသၢင်ႈ ၵၢၼ်ပၢႆး ပၺ်ၺႃႁဝ်း ဢၼ်ၼိုင်ႈ။ သူးရၢင်းဝလ်းဢၼ်ၼႆႉ မၼ်းဢမ်ႇၸႂ်ႈသူးရၢင်းဝလ်းလဵၵ်ႉလဵၵ်ႉ ယဝ်ႉၵေႃႈ ပဵၼ်တီႈပိူၼ်ႈယွမ်း ႁပ်ႉ ၵၢၼ်ပၢႆးပၺ်ၺႃႁဝ်း ပဵၼ်ၶၵ်ႉပဵၼ်တွၼ်ႈ” ၸၢႆးလၢၼ်တႆး သပ်းလႅင်းလၢတ်ႈၼႄၼင်ႇၼႆ။

သူးရၢင်းဝလ်း ဢၼ်ယူႇတီႈမူလၼိထိ လိၼ်လီၼမ်ႉသႂ် ၸိုင်ႈထႆး မွပ်ႈပၼ် ပွၵ်ႈၵမ်း 4 ၼႆႉ လႆႈမွပ်ႈပၼ် ၼႂ်းမိူင်းထႆးၵူၺ်း ဢမ်ႇၵႃး လႆႈမွပ်ႈပၼ် တၢင်ႇမိူင်းထႅင်ႈ မိူၼ်ၼင်ႇ ၽွင်းလူင် မိူင်းၵမ်ႇပူးၶျႃး၊ မိူင်းလၢဝ်း။ ယဝ်ႉၵေႃႈ ႁူင်းႁဵၼ်းလွႆတႆးလႅင်း ၸဵမ်ၸိူဝ်းၼႆႉပႃး ဝႃႈၼႆ။