ပၢင်တိုၵ်းပႆႇယဵၼ် သိုပ်ႇပဵၼ်ၼႂ်းၸိုင်ႈတႆးပွတ်းႁွင်ႇ

သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇ ၶိူဝ်းယႂ်း။

ဝၼ်းတီႈ 19/1/2020 ၼႂ်းဝၼ်းလဵဝ်ၵူၺ်း သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ၶိူဝ်းယႂ်း ၼႂ်း ၸႄႈဝဵင်းၵျွၵ်ႉမႄးတင်း ၼမ်ႉသၼ်ႇ ၼႂ်းၸိုင်ႈတႆးပွတ်းႁွင်ႇ။ ၼႂ်းၸႄႈဝဵင်းၵျွၵ်ႉမႄး တၢင်းပွတ်းမိူင်းငေႃႉသမ်ႉ ယၢမ်းၵၢင် ၼႂ် သွင်ၾၢႆႇပဵၼ်ပၢင်တိုၵ်းၵၼ် ၼႂ်းၵႄႈဝၢၼ်ႈမႃႉမူဝ်ႉတင်း ဝၢၼ်ႈၼမ်ႉတူၺ် တင်းႁိုင် မွၵ်ႈ 30 မိၼိတ်ႉ ဝႃႈၼႆ။

ၵူၼ်းပွတ်းမိူင်းငေႃႉ ၽူႈၸၢႆး ဢႃယု 60 ပၢႆ လၢတ်ႈၼႄၽူႈတွႆႇႁွၵ်ႈဝႃႈ “ သိုၵ်းမၢၼ်းတင်း သိုၵ်းလွႆ ပဵၼ်ပၢင်တိုၵ်းၵၼ်ၸဵမ် ၸဝ်ႉၶႃႈယဝ်ႉ။ ၼႂ်းၵႄႈဝၢၼ်ႈမႃႉမူဝ်ႉတင်း ဝၢၼ်ႈၼမ်ႉတူၺ် တင်းႁိုင် တေမီးမွၵ်ႈ 30 မိၼိတ်ႉၼႆႉ။ ၶႂ်ႈဝႃႈ ပဵၼ်ၵၼ်ႁႅင်းဝႆႉ ပၢင်တိုၵ်းၶဝ်ၼၼ်ႉ ပဵၼ်ၵၼ်ၼႂ်းထိူၼ်ႇ ၵႆဝၢၼ်ႈဝႆႉ။ လွင်ႈလူႉတၢႆ မၢတ်ႇၸဵပ်းတႄႉ ဢမ်ႇလႆႈႁူႉ” ဝႃႈၼႆ။

လိူဝ်ၼၼ်ႉ ၼႂ်းႁွင်ႈၵၢၼ် ပိုၼ်ၽၢဝ်ႇ TNLA ဢွၵ်ႇဝႆႉဝႃႈ “ ၼႂ်းဝၼ်းလဵဝ်ၵူၺ်း တီႈၼႂ်းၸႄႈဝဵင်းၼမ်ႉသၼ်ႇၵေႃႈ သိုၵ်းလူင် ပွင်ၸိုင်ႈမၢၼ်ႈ တင်း သိုၵ်းတဢၢင်း ပဵၼ်ပၢင်တိုၵ်းၵၼ် ၼႂ်းဝၼ်းလဵဝ် 2 တီႈ။ ယၢမ်းၵၢင်ၼႂ် 10 မူင်းၶိုင်ႈ ၼႂ်းၵႄႈဝၢၼ်ႈႁူဝ် လၢတ်ႈ (ဟိုလတ်ကျေးရွာ) တင်း မၢၼ်ႈမႂ်ႇ (မန်မိုင်ကျေးရွာ) တီႈၼိုင်ႈ။ ယဝ်ႉၵေႃႈ ၼႂ်းၵႄႈမၢၼ်ႈဢူ (မန်းအူကျေးရွာ) တင်း ၼမ်ႉပုင်ႇ(ရေပူစမ်း) တီႈၼိုင်ႈ” ဝႃႈၼႆ။

“ သိုၵ်းလူင်ပွင်ၸိုင်ႈမၢၼ်ႈ တင်း သိုၵ်းတဢၢင်း ဢၼ်လႆႈပဵၼ်ပၢင်တိုၵ်းၵၼ်ၼႆႉ ပဵၼ်ယွၼ်ႉသိုၵ်းလူင်ပွင်ၸိုင်ႈမၢၼ်ႈ ၽိုတ်ႉ ၸူး သွၵ်ႈတဝ်ႁႃ ၼႂ်းၼႃႈတီႈတပ်ႉသိုၵ်းတဢၢင်း တူင်ႉၼိုင်” ႁွင်ႈၵၢၼ် တပ်ႉသိုၵ်းတဢၢင်း ပိုၼ်ၽၢဝ်ႇဢွၵ်ႇဝႆႉ ၼင်ႇၼႆ။

ၼႂ်းပီ 2020 ၼႆႉၵေႃႈ ယူႇတီႈၸုမ်းဢူၺ်းလီပွတ်းႁွင်ႇ 3 ၸုမ်း မိူၼ်ၼင်ႇ ၸုမ်းသိုၵ်းတဢၢင်း၊ ၵဝ်ႈၵၢင်ႉလႄႈ ရၶႅင်ႇ ၵေႃႈ ႁူမ်ႈၵၼ် ပိုၼ်ၽၢဝ်ႇ သိုပ်ႇၵိုတ်းတိုၵ်းၾၢႆႇလဵဝ်ဝႆႉထႅင်ႈ တႃႇၶၢဝ်းတၢင်း 2 လိူၼ်။