ၾႆးမႆႈႁိူၼ်း ၼႂ်းၵၢတ်ႇတႃႈလေႃႉ ယွၼ်ႉတႆႈၾႆးတဵၼ်းၽြႃးဝႆႉသေ တႄႇလုၵ်ႉမႆႈၼႂ်းႁွင်ႈၶဵင်ႇၽြႃးမႃး လွင်ႈၵူၼ်း မၢတ်ႇၸဵပ်းလူႉတၢႆတႄႉ ဢမ်ႇမီး လူႉသုမ်းၼပ်ႉႁူဝ်လၢၼ်ႉ။
ဝၼ်းတီႈ 06/01/2018 ယၢမ်းၵၢင်ၼႂ် 10 မူင်း ၾႆးမႆႈႁိူၼ်း ၼၢင်းသူၺ်ႇၵျႃႇ ယူႇၼႂ်းၵၢတ်ႇတႃႈလေႃႉ ပွၵ်ႉတႃႈလေႃႉ ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ယွၼ်ႉတႆႈၾႆးတဵၼ်းၽြႃးဝႆႉသေ တႄႇလုၵ်ႉမႆႈၼႂ်းႁွင်ႈၽြႃးမႃး ၵူၺ်းၵႃႈ ၵူၼ်းယူႇၸမ်ႁိမ်းႁွမ်းလႄႈ ၸဝ်ႈၼႃႈတီႈၾၢႆႇၶႄၾႆးတၼ်းၸွႆႈၶိုတ်းၶၢဝ်းယၢမ်းလႄႈ ဢမ်ႇတၼ်းမႆႈတင်းမူတ်း တၼ်း မႆႈၸၼ်ႉတင်းၼိူဝ်ၵူၺ်း ဝႃႈၼႆ။
ၵူၼ်းယူႇၸမ်ႁိမ်းႁွမ်းၼၼ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ႁိူၼ်းလင်ၼၼ်ႉ ပဵၼ်ႁိူၼ်း 4 ၸၼ်ႉ ၸၼ်ႉတႂ်ႈ သုတ်း ၶၢႆသိူဝ်ႈၶူဝ်း၊ ဢၼ်ၾႆးမႆႈသမ်ႉ ပဵၼ်ၸၼ်ႉ 4 လုၵ်ႉတၢင်းႁွင်ႈဢၼ်မီးၶဵင်ႇၽြႃးၼၼ်ႉမႃး လွင်ႈမၢတ်ႇၸဵပ်း လူႉတၢႆတႄႉ ဢမ်ႇမီးၶႃႈ ၵူၺ်းၵႃႈ ၾႆးတၼ်းလႆႈမႆႈပႃး ၶူဝ်းၶွင် ဢၼ်ၵဵပ်းဝႆႉၼႂ်း ၼၼ်ႉၽွင်ႈယူႇ။ လွင်ႈလူႉသုမ်ႉတႄႉ လႆႈငိၼ်းဝႃႈ မီးမွၵ်ႈ 30 သႅၼ်ပျႃး” ဝႃႈၼႆ။
ၵဵဝ်ႇၵပ်းလွင်ႈၼႆႉသေ ၵူၼ်းႁိမ်းႁွမ်းတင်း ၸဝ်ႈၼႃႈတီႈၾၢႆႇၶႄၾႆး ႁူတ်းၾႆးမွတ်ႇ ယၢမ်း10:30 မူင်းပၢႆ (ၵၢင်ၼႂ်) ဝႃႈၼႆ။
ႁိူၼ်းလင်ၼၼ်ႉ ၸၼ်ႉတႂ်ႈသုတ်းၶၢႆသိူဝ်ႈၶူဝ်းလဵၼ်ႈႁႅင်း၊ သိူဝ်ႈၽႃႈလႄႈ ၽႃႈႁူမ်ႇၶူဝ်းၼွၼ်း။
တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈၸႄႈဝဵင်းတႃႈၶီႈလဵၵ်း လႆႈပိုတ်ႇဢမူႉ/ၶၻီး ဢဝ်လိူင်ႈ ၸဝ်ႈႁိူၼ်းဝႆႉ ၸွမ်းၼင်ႇ ပၵ်းပိူင်မၢႆမီႈ ဝၢၼ်ႈမိူင်းမီး ဝႃႈၼႆ။