ၵူၼ်းသိုၵ်း RCSS 2 ၵေႃႉ ဢၼ်တူင်ႉၼိုင်ဝႆႉ ၼႂ်းၸိုင်ႈတႆး ပွတ်းၸၢၼ်း ၺႃးသိုၵ်းလူင်ပွင်ၸိုင်ႈ တီႉၵႂႃႇလႆႈၶၢဝ်းတၢင်း လိူၼ်ပၢႆယဝ်ႉ ယင်းပႆႇပွႆႇမႃးၶိုၼ်း။
ပူၼ်ႉမႃး မိူဝ်ႈဝၼ်းတီႈ 19/12/2019 ယၢမ်းၵၢင်ဝၼ်း 11 မူင်းပၢႆၼၼ်ႉ သိုၵ်းလူင်ပွင်ၸိုင်ႈမၢၼ်ႈ ၶဝ်ႈဝႅတ်ႉလွမ်ႉ တီႉၺွပ်း ၵူၼ်းသိုၵ်း RCSS ၵေႃႉၼိုင်ႈ ၽွင်းၼုင်ႈၶူဝ်းၵူၼ်းမိူင်းသေ တိုၵ်ႉႁူပ်ႉထူပ်းၵူၼ်းမိူင်း တီႈဝတ်ႉမုၼ်ၸဝ်ႈ ဢိူင်ႇၼႃးပွႆး ၸႄႈဝဵင်းၼမ်ႉၸၢင်။ ထိုင်မႃးယၢမ်းဝၢႆးဝၼ်း 1 မူင်းပၢႆၼၼ်ႉ ၵူတ်ႇထတ်းထူပ်းႁၼ် ၶႅပ်းႁၢင်ႈသိုၵ်းၼႂ်းၾူၼ်းသေ တီႉ ၺွပ်းၵႂႃႇထႅင်ႈၵေႃႉၼိုင်ႈ။
ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ/ ၽူႈၼင်ႈလုမ်းၵပ်းသၢၼ် RCSS တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း သိုၵ်းႁဝ်းၶႃႈ 2 ၵေႃႉ ဢၼ်ၶဝ်တီႉၺွပ်းၵႂႃႇၼၼ်ႉ တေႃႇထိုင်ယၢမ်းလဵဝ် ၶဝ်ပႆႇပွႆႇ ငိၼ်းဝႃႈၶဝ်မွပ်ႈဝႆႉတီႈႁူင်းပလိၵ်ႈသေ တေၸွႆးတြႃးၵႂႃႇ” ဝႃႈၼႆ။
ၵူၼ်းသိုၵ်း RCSS 2 ၵေႃႉ ဢၼ်ထုၵ်ႇၺႃးတီႉၺွပ်းၵႂႃႇၼၼ်ႉ ၸိုဝ်ႈႁွင်ႉ သိုၵ်းႁၢၼ် ၸၢႆးၵေႃႉဝီႉ လႄႈ သိုၵ်းႁၢၼ် ၸၢႆးတိ လေႃးၵ။ ၶဝ် 2 ၵေႃႉၼႆႉ ၺႃးတီႉၵႂႃႇမိူဝ်ႈဝၼ်းတီႈ 19/12/2019 ၼၼ်ႉသေ တေႃႇထိုင်မႃး ဝၼ်းတီႈ 20/1/2020 ၼႆႉ မီးၵႂႃႇ ၶၢဝ်းတၢင်း လိူၼ်ပၢႆယဝ်ႉ။
ၸဝ်ႈသိုၵ်းၸၢႆးဢူး သိုပ်ႇလၢတ်ႈဝႃႈ “တႄႉတႄႉမၼ်းၼႆႉ ၶဝ်ဢမ်ႇမီးယႃႈ၊ သိူဝ်ႈၶူဝ်းသိုၵ်းၵေႃႈ ၶဝ်ဢမ်ႇၼုင်ႈ၊ ၶိူင်ႈၵွင်ႈၵၢင်ႇ ၵေႃႈၶဝ်ဢမ်ႇပႃး မိူဝ်ႈၽွင်းႁူပ်ႉထူပ်းၵူၼ်းမိူင်းယူႇၼၼ်ႉ။ သမ်ႉထႅင်ႈၵေႃႉၼိုင်ႈ ၶဝ်ႁွင်ႉဝႆႉသေ တူၺ်းပႃးၼႂ်းၾူၼ်း လုၵ်ႉ တီႈၼၼ်ႈသေ သမ်ႉၵႂႃႇႁွင်ႉ ထႅင်ႈတၢင်ႇၵေႃႉပႃး ၽိူဝ်ႇဝၢႆးႁွင်ႉယဝ်ႉၼၼ်ႉ ၶဝ်တၢင်ႇၵႃးသေ ၵႂႃႇၸွမ်းၼႂ်းဝၢၼ်ႈ ႁိူၼ်းလႂ် မၼ်းယၢမ်ႈၵႂႃႇ ၵပ်းသိုပ်ႇၼႆ သိုၵ်းမၢၼ်ႈၶဝ်သွၵ်ႈတဝ်ပႃးႁိူၼ်းၸိူဝ်းၼႆႉ” ဝႃႈၼႆ။
ၸဝ်ႈသိုၵ်း ၸၢႆးဢူး လၢတ်ႈဝႃႈ “ၵဵဝ်ႇၵပ်းလွင်ႈၼႆႉ လႆႈတႅမ်ႈလိၵ်ႈသူင်ႇထိုင် ယွၼ်းႁႂ်ႈပွႆႇပၼ်ၶိုၼ်းယူႇ။ မိူဝ်ႈၽွင်းႁူပ်ႉၵၼ် တၢင်းၾၢႆႇတပ်ႉသိုၵ်းၼၼ်ႉၵေႃႈ လႆႈယွၼ်းဝႆႉ ႁႂ်ႈပွႆႇပၼ်ၶိုၼ်းယူႇ” ဝႃႈၼႆ။
မိူဝ်ႈပီ 2017 လိူၼ်ၵျုႊလၢႆႊ ဝၼ်းတီႈ 25 ၼၼ်ႉၵေႃႈ ၵူၼ်းသိုၵ်း RCSS/SSA သွင်ၵေႃႉ ၸၢႆးသိူဝ်လူင် တင်း ၸၢႆးလူင် ဢၼ်တူင်ႉၼိုင်တၢင်းပွတ်းတွၼ်ႈ ဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸိုင်ႈတႆးပွတ်းဢွၵ်ႇၶူင်းၼၼ်ႉ ၺႃးသိုၵ်းမၢၼ်ႈ လူင်ပွင်ၸိုင်ႈမၢၼ်ႈ မၢပ်ႇၼႄးဝႃႈ ၵူၼ်းသိုၵ်း 2 ၵေႃႉၼႆႉ ပႃးၶိူင်ႈၵွင်ႈၵၢင်ႇ၊ ၸၢၵ်ႈလၢတ်ႈလႄႈ ၵဵပ်းၶွၼ်ႇ ၵူၼ်းမိူင်းၼႆသေ တီႉၺွပ်း သူင်ႇတူဝ် ၵႂႃႇၵုမ်းၶင်ဝႆႉတီႈၶွၵ်ႈ ၸႄႈဝဵင်းၵဵင်းတုင်သေ ၽိူဝ်ႇထိုင်မႃး ဝၼ်းတီႈ 5/3/2018 ၸင်ႇပွႆႇတူဝ်ပၼ်ၶိုၼ်း တီႈၽူႈမီးပုၼ်ႈၽွၼ်းလုမ်းၵပ်းသၢၼ် RCSS/SSA တီႈၵဵင်းတုင်ၶိုၼ်း။
ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵိုတ်းတိုၵ်းတူဝ်ႈမိူင်း ပတ်းပိုၼ်ႉ NCA ဝႆႉၸုမ်းၼိုင်ႈသေဢမ်ႇၵႃး ၸွမ်သိုၵ်းလူင် ယွတ်ႈသိုၵ်းၵေႃႈ ႁပ်ႉတၼ်းႁဵင်းၸူဝ်ႈၶၢဝ်းဝႆႉ ပဵၼ် ႁူဝ်ပဝ်ႈ ၸုမ်းၽူႈဢွၼ်ႁူဝ်ဢုပ်ႇဢူဝ်းၶၵ်ႉၵၢၼ်လွင်ႈငမ်းယဵၼ် PPST ဝႆႉ။
