ပၢင်ၵုမ် PPST ပွၵ်ႈၵမ်း 8 ၸတ်းႁဵတ်းတီႈၵဵင်းမႆႇ ၸိုင်ႈထႆး တႃႇၶၢဝ်းတၢင်း 3 ဝၼ်း။

ဝၼ်းတီႈ 17/1/2020 ယၢမ်းၵၢင်ၼႂ် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း လူင်းလၢႆးမိုဝ်း ၵိုတ်းတိုၵ်းပတ်းပိုၼ်ႉ တူဝ်ႈမိူင်း NCA 10 ၸုမ်း ၸတ်းႁဵတ်းပၢင်ၵုမ်ၵၼ် တီႈၸႄႈဝဵင်းၵဵင်းမႆႇ ၸိုင်ႈထႆး ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈၸူဝ်ႈၶၢဝ်း PPST မွၵ်ႇ လၢတ်ႈၶေႃႈၵႂၢမ်းပိုတ်ႇပၢင်ၵႂႃႇ။

“ ၵၢၼ်ဢၼ်တေဢုပ်ႇဢူဝ်းၵၼ်ၵႂႃႇတီႈပၢင်ၵုမ်ၼႆႉတႄႉ တွၼ်ႈတႃႇၶၵ်ႉၵၢၼ်လွင်ႈငမ်းယဵၼ်တၢင်းၼႃႈ၊ လွင်ႈ ႁၢင်ႈႁႅၼ်း ဢုပ်ႇဢူဝ်းငူပ်ႉငီႉ တႃႇၽေႃႇၼမ်ႉၼႄတူဝ် ဢၼ်လႆႈဢုပ်ႇဢူဝ်းတူၵ်းလူင်းၵၼ် 8 ၶေႃႈ တီႈပၢင်ၵုမ် JICM ပွၵ်ႈၵမ်း 8 တႃႇ ဝၢင်းၽႅၼ်ၵၢၼ်ငၢၼ်း ႁႂ်ႈလူင်းမိုဝ်းႁဵတ်းသၢင်ႈ ႁၢင်ႈႁႅၼ်းႁႂ်ႈၸဵဝ်းယဝ်ႉတူဝ်ႈသေ ႁႂ်ႈလႆႈၸတ်းႁဵတ်းပၢင်ၵုမ်လူင် ပီႁူဝ်ပၢၵ်ႇ 21 ပၢင်လူင် ၸွမ်းၼင်ႇ ၶၢဝ်းယၢမ်းတတ်းမၵ်းဝႆႉ။ ႁႂ်ႈလႆႈတိုတ်ႉၸၼ်ၶၢဝ်းယၢမ်း တႃႇႁဵတ်းပၢင်ၵုမ်လူင် ပီႁူဝ်ပၢၵ်ႇ 21 ပၢင်လူင် ၼႂ်းၶၢဝ်းတၢင်း 4 လိူၼ် ႁူဝ်ပီ 2020 ၼႆႉ” ဝႃႈၼႆ။

လိူဝ်ၼၼ်ႉ တႃႇတေၶိုင်ပွင်ႁႂ်ႈၸုမ်းယိပ်းၵွင်ႈၵၢင်ႇ တၢင်ႇၸုမ်းၶဝ်ႈပႃးၼႂ်း NCA မႃးလႆႈၼၼ်ႉၵေႃႈ ႁႂ်ႈလႆႈဝၢင်းၽႅၼ်တီႈ ပၢင်ၵုမ်ၵမ်းၼႆႉ လီလီသေ လူင်းမိုဝ်းႁဵတ်းသၢင်ႈၵႂႃႇ ၼႆႉၵေႃႈ ၸွမ်သိုၵ်းလူင် ယွတ်ႈသိုၵ်း လႆႈတူၵ်ႇလၢတ်ႈပႃး ၼႂ်းၶေႃႈၵႂၢမ်း။

ပၢင်ၵုမ် PPST ပွၵ်ႈၵမ်း 8 ၼႆႉ ၸတ်းႁဵတ်းတီႈၵဵင်းမႆႇ တႄႇဢဝ် ဝၼ်းတီႈ 17 ထိုင် 19 ဝႃႈၼႆ။

ၸုမ်းယိပ်းၵွင်ႈၵၢင်ႇ လူင်းလၢႆးမိုဝ်း ၵိုတ်းတိုၵ်း ပတ်းပိုၼ်ႉတူဝ်ႈမိူင်း NCA 10 ၸုမ်းၼႆႉသမ်ႉ မိူၼ်ၼင်ႇ ၶွင်ႇသီႇဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO)၊ တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF)၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊလုၵ်ႈႁဵၼ်း မိူင်းမၢၼ်ႈပတ်းပိုၼ်ႉ (ABSDF)၊ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU)၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ(DKBA)၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႇသီႇငမ်းယဵၼ် (KNLA-PC)၊ ပႃႇတီႇပူတ်းပွႆႇၸိူဝ်ႉၸၢတ်ႈရၶႅင်ႇ (ALP)၊ ၸုမ်းလႃးႁူႇတီႇမူဝ်ႊၶရႅတ်ႉတိၵ်ႉ LDU လႄႈ ၸုမ်းပႃႇတီႇမိူင်း မွၼ်းမႂ်ႇ NMSP ၸဵမ်ၸိူဝ်းၼႆႉ။