သိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႃႈ ၶဝ်ၵူတ်ႇထတ်းယိုတ်းလႆႈ ၶိူင်ႈၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယၢမ်း ၼႂ်းထမ်ႈ တီႈၼိုင်ႈ ၼႂ်းၸႄႈ ဝဵင်းသႅၼ်ဝီ ပဵၼ်ၶွင်ၽႂ်ဢမ်ႇႁူႉ ဝႃႈၼႆ။

ဝၼ်းတီႈ 15/1/2020 ယၢမ်းႁူဝ်ၶမ်ႈ မွၵ်ႈ 5:45 မူင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ သၢႆသိုၵ်းၾၢႆႇႁူမ်ႇလူမ်ႈ တူင်ႉၼိုင် ၵူတ်ႇထတ်း ယိုတ်းလႆႈ ၶိူင်ႈၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယၢမ်း ဢၼ်မႃးသိူင်ႇဝႆႉၼႂ်းထမ်ႈ ႁိမ်းဝၢၼ်ႈၼမ်ႉၶႆႉ ၸႄႈဝဵင်း သႅၼ်ဝီ ၸိုင်ႈတႆးပွတ်းႁွင်ႇ။

ၸၢႆးဢူးၶမ်း ၽူႈတႅၼ်းသၽႃး ၵူၼ်းမိူင်း ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ တၢင်းပွတ်းတွၼ်ႈၼၼ်ႉ မီးသိုၵ်း ဢူၺ်းလီၶဝ် ၵႆႉတူင်ႉၼိုင်ၵႂႃႇမႃးယူႇ” ဝႃႈၼႆ။

ၶိူင်ႈၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယၢမ်း ဢၼ်ယိုတ်းလႆႈၼၼ်ႉ ပဵၼ်ၵွင်ႈ 107 MM၊ လဝ်းမၢၵ်ႇလူင် 107 MM၊ မၢၵ်ႇ လူင် RPG၊ ယၢမ်းဢိၵ်ႇလၢႆလၢႆဢၼ် ယူႇတီႈႁွင်ႈၵၢၼ်ပိုၼ်ၽၢဝ်ႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႆႉၼင်ႇၼႆ။

ၶိူင်ႈၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယၢမ်းၸိူဝ်းၼႆႉ ပဵၼ်ၶွင်ၽႂ် ၸုမ်းလႂ် ဢၼ်ဝႃႈၼၼ်ႉ ယင်းပႆႇႁူႉ တိုၵ်ႉၵူတ်ႇထတ်း တူၺ်းယူႇ ဝႃႈၼႆ။

တၢင်းပွတ်းတွၼ်ႈဝၢၼ်ႈၼမ်ႉၶႆႉၼၼ်ႉ ၸုမ်းဢူၺ်းလီ ပွတ်းႁွင်ႇ ၵႆႉတူင်ႉၼိုင်ၵႂႃႇမႃး ယူႇတႃႇသေႇ။ ဢွင်ႈတီႈထမ်ႈၼၼ်ႉ မီးၸဵင်ႇၸၢၼ်းဝၼ်းတူၵ်းဝၢၼ်ႈ ယၢၼ်ၵႆဝၢၼ်ႈ မွၵ်ႈ 4,000 မီႊတိူဝ်ႊ ဝႃႈၼႆ။

“ဝၢၼ်ႈၼမ်ႉၶႆႉၼႆႉ ပဵၼ်ပီႈၼွင်ႉၶၢင် ယူႇသဝ်းဝႆႉၶႃႈဢေႃႈ။ တၢင်းပွတ်းတွၼ်ႈၼၼ်ႉၸုမ်းဢူၺ်းလီပွတ်းႁွင်ႇၵေႃႈ တူင်ႉ ၼိုင်၊ သိုၵ်းလူင်ပွင်ၸိုင်ႈမၢၼ်ႈၵေႃႈတူင်ႉၼိုင်ၶႃႈယဝ်ႉ။ ဢၼ်ယိုတ်းလႆႈ ၶိူင်ႈၵွင်ႈၵၢင်ႇလႄႈ မၢၵ်ႇမိုဝ်ႉၸိုၼ်းယၢမ်းၸိူဝ်း ၼၼ်ႉ တေပဵၼ်ၶွင်ၸုမ်းလႂ်တႄႉ ဢမ်ႇႁူႉၶႃႈ” ၵူၼ်းပိုၼ်ႉတီႈ ၸႄႈဝဵင်းသႅၼ်ဝီ လၢတ်ႈၼႄၼင်ႇၼႆ။

မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ ပီ 2019 ၼၼ်ႉၵေႃႈ တပ်ႉသိုၵ်းလူင်ပွင်ၸိုင်ႈမၢၼ်ႈ ၵူတ်ႇထတ်းတီႉလႆႈ ၶိူင်ႈၵွင်ႈၵၢင်ႇ ၶွင်တပ်ႉ သိုၵ်းတဢၢင်း TNLA တီႈႁိမ်းဝၢၼ်ႈႁူဝ်မိူင်း ဢိူင်ႇႁူးၶိၼ်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ။