ၵူၼ်းတေႃႉတၢင်ႇယႃႈမဝ်းၵမ် လိူင်ႇၼမ်ၼႂ်းၸိုင်ႈတႆး ၶၢဝ်းတၢင်း 2 ဝၼ်း ၵူၺ်းၺႃးတီႉယႃႈၵႃႈၶၼ်ႁိမ်းၸမ်မိုၼ်ႇ သႅၼ်ပျႃး။
ဝၼ်းတီႈ 14/1/2020 ယၢမ်းၵၢင်ၶမ်ႈ မွၵ်ႈ 7 မူင်းၼၼ်ႉ ပလိၵ်ႈၵူတ်ႇထတ်းတီႉ ယႃႈမဝ်းၵမ် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ မႅၼ်ႈၶၼ်ငိုၼ်းယူႇ 4,700 သႅၼ်ပၢႆ။
တီႉလႆႈ ယႃႈမဝ်းၵမ် ၼႂ်းၵႃး မွင်ႇထုၼ်းလုၼ်ႇ ဢႃယု 19 ပီ လႄႈ မွင်ႇပီတိၼ်ႇၸၼ်ႇလုၼ်ႇ (ႁွင်ႉ) တႃးငႄႇ ဢႃယု 22 ပီ တီႈၼိူဝ်သဵၼ်ႈတၢင်း မူႇၸေႊ – ဝဵင်းလိူဝ်ႇ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ တေဢၢၼ်းတၢင်ႇၵႂႃႇတၢင်းလႅၼ်လိၼ် ၶႄႇ ဝႃႈၼႆ။
ႁွင်ႈၵၢၼ်ပိုၼ်ၽၢဝ်ႇ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ဢွၵ်ႇဝႆႉဝႃႈ “ ၵူတ်ႇထတ်းတီႉလႆႈ ယႃႈမႃႉ 2 သႅၼ်မဵတ်ႉ (မႅၼ်ႈ ငိုၼ်းမၢၼ်ႈယူႇ 4,000 သႅၼ်ပျႃး)၊ ယႃႈၾိၼ်ႇၽိူၵ်ႇ ဢၼ်သႂ်ႇဝႆႉၼႂ်းၵွၵ်းသပျႃႇ ၼမ်ႉၼၵ်း 2.59 ၵီႊလူဝ်ႊ (မႅၼ်ႈငိုၼ်း မၢၼ်ႈယူႇ 777 သႅၼ်ပျႃး)၊ ယဝ်ႉၵေႃႈ ၾူၼ်း 3 လုၵ်ႈလႄႈ ငိုၼ်းမၢၼ်ႈ 150,000 ပျႃး” ဝႃႈၼႆ။
မိူဝ်ႈဝၼ်းတီႈ 13/1/2020 ၼၼ်ႉၵေႃႈ တီႉလႆႈယႃႈမဝ်းၵမ် တီႈၸႄႈဝဵင်းသီႇသႅင်ႇ ၸိုင်ႈတႆးပွတ်းၸၢၼ်း (ၼိူဝ်သဵၼ်ႈတၢင်း မွၵ်ႇမႆႇ – သၢႆးၶၢဝ်) တီႉလႆႈယႃႈမဝ်းၵမ်ၵႃႈၶၼ် မႅၼ်ႈငိုၼ်းမၢၼ်ႈ 3,000 သႅၼ်ပျႃး၊ ဢၼ်တီႉလႆႈၼၼ်ႉသမ်ႉ ယႃႈ ICE ၼမ်ႉၼၵ်း 5 ၵီႊလူဝ်ႊလႄႈ ၵၢတ်ႊတမိၼ်ႊ ၼမ်ႉၼၵ်း 20 ၵီႊလူဝ်ႊ ဝႃႈၼႆ။
မိူဝ်ႈဝၼ်းတီႈ 14/1/2020 သမ်ႉ ပလိၵ်ႈၶဝ်ႈၵူတ်ႇႁိူၼ်းၸၢႆးၵျူင်ႇၶျီး ဢႃယု 23 ပီ တီႈဝဵင်းႁူဝ်ပၢင်ႇ ၸိုင်ႈတႆးပွတ်းႁွင်ႇ၊ တီႉလႆႈယႃႈမႃႉ ယႃႈမဝ်းၵမ် တႃႇၵႃႈၶၼ်ငိုၼ်း မွၵ်ႈ 1,200 သႅၼ်ပျႃး။
မိူဝ်ႈဝၼ်းတီႈ 16/1/2020 ၾၢႆႇယႃႈမဝ်းၵမ် ပိုၼ်ၽၢဝ်ႇဝႃႈတီႉလႆႈယႃႈမႃႉမီးၼႂ်းၵွင်ႇၸေႈတီႈတႃႈၶီႈလဵၵ်း တႃႇၶၼ်ငိုၼ်း 1000 သႅၼ်ပျႃး၊ ဢမ်ႇမီးၸဝ်ႈၶွင် ဝႃႈၼႆ။
ၵူၺ်းၵႃႈ ယႃႈမႃႉ ယႃႈမဝ်းၵမ်ၸိူဝ်းၼႆႉ လုၵ်ႉလႂ်မႃး ၸဝ်ႈၶွင်တႄႉ ပဵၼ်ၽႂ် တေဢဝ်ၵႂႃႇလႂ်ၼႆၼၼ်ႉ ပလိၵ်ႈယင်းဢမ်ႇ ပိုၼ်ၽၢဝ်ႇပႃး။
