ၸုမ်းမေႃၵႂၢမ်းတႆး ႁူပ်ႉဢုပ်ႇၵၼ် တီႈဝဵင်းလူင်တူၼ်ႈတီး ၶၢဝ်းတၢင်း 3 ဝၼ်းသေ ႁၢင်ႈႁႅၼ်းၼႃႈၵၢၼ် တႃႇၶွတ်ႇၽွတ်ႈ ၸုမ်းပၢႆးမွၼ်းၽဵင်းၵႂၢမ်းတႆး ပဵၼ်တၢင်းၵၢၼ် ဝႃႈၼႆ။
ဝၼ်းတီႈ 12-14/1/2020 ၵေႃႇမတီႇၸူဝ်ႈၶၢဝ်း ၸုမ်းမေႃၵႂၢမ်းတႆး ႁူပ်ႉထူပ်းဢုပ်ႇဢူဝ်းၵၼ် တီႈႁူင်းႁႅမ်းမွင်ႊထဵင်းသၻႃး ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းသေ ဢုပ်ႇဢူဝ်းႁၢင်ႈႁႅၼ်းတႃႇပၢင်ၵုမ်လူင် ပွၵ်ႈၵမ်း 2 ဢၼ်တေၸတ်း ႁဵတ်း တီႈဝဵင်းလႃႈသဵဝ်ႈ ၼႂ်းပီ 2020 ၼႆႉ ဝႃႈၼႆ။
ၸၢႆးသႅင်ၸွမ်ၾႃႉ ၽူႈၶဝ်ႈၵေႃႇမတီႇ ၸူဝ်ႈၶၢဝ်း/ ၽူႈႁွင်ႉၽဵင်းၵႂၢမ်းတႆး လၢတ်ႈတီႈၽူႈတွႆႇႁွၵ်ႈဝႃႈ “ ပွၵ်ႈၼႆႉတႄႉ ႁဝ်းၶႃႈ ၸတ်းႁဵတ်းပၢင် Workshop ၵၼ်သေ ယဝ်ႉၵေႃႈ ႁူမ်ႈၵၼ်ႁဵတ်းပိူင်ယုၵ်းယၢင်ႇမၼ်း ၼႆႉတႄႉ ႁဵတ်းယဝ်ႉၵႂႃႇယဝ်ႉ။ ဢုပ်ႇ ဢူဝ်းၵၼ် လွင်ႈမိၵ်ႈမၢႆ Logo လႄႈ တႃႇတေၶပ်းၶိုင်ၼႃႈၵၢၼ် ပၢင်ၵုမ်လူင် ပွၵ်ႈၵမ်း 2 ၸိူဝ်းၼႆႉ” ဝႃႈၼႆ။
ပၢင်ၵုမ်လူင် ၸုမ်းမေႃၵႂၢမ်းတႆး ပွၵ်ႈၵမ်း 1 ၼၼ်ႉ လႆႈၸတ်းႁဵတ်းၵႂႃႇတီႈၸႄႈဝဵင်းလၢႆးၶႃႈသေ ပေႃးထိုင် လိူၼ်မေႊ 2020 ၼႆႉ တေဢၢၼ်းၸတ်းႁဵတ်းပၢင်ၵုမ်လူင် ပွၵ်ႈၵမ်း 2 တီႈဝဵင်းလႃႈသဵဝ်ႈ ဝႃႈၼႆ။
ၸၢႆးဢွင်ႇထီးၶမ်း ၽူႈၶဝ်ႈၵေႃႇမတီႇ ၸူဝ်ႈၶၢဝ်း/ ၽူႈႁွင်ႉၽဵင်းၵႂၢမ်းတႆး လၢတ်ႈတီႈၽူႈတွႆႇႁွၵ်ႈဝႃႈ “ တီႈလၢႆးၶႃႈတႄႉ ပဵၼ် ပၢင်ၵုမ်လူင် ပွၵ်ႈၵမ်း 1 ၶႃႈ။ ဝၢႆးၼၼ်ႉ ႁဝ်းၶႃႈ လႆႈၸတ်းႁဵတ်းပၢင်ႁူပ်ႉထူပ်းဢွၼ်ႇ တီႈလႃႈသဵဝ်ႈလႄႈ တူၼ်ႈတီးၼႆႉ။ မိူဝ်ႈလဵဝ် ႁဝ်းၶႃႈတူၺ်းၼႆႉ ၸုမ်းပၢႆးမွၼ်းၶၢင်ၶဝ်၊ မွၼ်းၶဝ် ၸိူဝ်းၼႆႉ ပိူၼ်ႈႁဵတ်းတၢင်းပၵ်းပိူင် ၼိူဝ်ဢွၼ်ႊလၢႆႊၸိူဝ်းၼႆႉ ပိူၼ်ႈႁဵတ်းၵႂႃႇယဝ်ႉ ပိူၼ်ႈတိုဝ်းၵမ်လွင်ႈမႅတ်ႇပႅင်းၽဵင်းၵႂၢမ်းဝႆႉယဝ်ႉ” ဝႃႈၼႆ။
“ မိူဝ်ႈလဵဝ် ပေႃးဝႃႈတႆးႁဝ်း တေႁဵတ်းႁင်းၽႂ် ႁင်းမၼ်း ဢမ်ႇမႃးႁူမ်ႈၵၼ်ၸိုင် ဢမ်ႇၶွတ်ႇၽွတ်ႈၸုမ်းပၢႆးမွၼ်းတႆးႁဝ်းၼႆႉ ဢမ်ႇပဵၼ်ယဝ်ႉ လႆႈတိုၵ်းသူၼ်းၵၼ်ၸိူင်ႉၼႆသေ ၸင်ႇမႃးႁဵတ်းၶႃႈ။ ယိူင်းဢၢၼ်းဝႆႉတႄႉ ပီ 2020 ၼႆႉ ႁဝ်းၶႃႈ ၶႂ်ႈႁဵတ်း ပၢင်ၵုမ်လူင် ပွၵ်ႈၵမ်း 2 တီႈဝဵင်းလႃႈသဵဝ်ႈ တႃႇၶွတ်ႇၽွတ်ႈလႆႈၸုမ်းပၢႆးမွၼ်းၽဵင်းၵႂၢမ်းတႆးႁဝ်း တႅတ်ႈၼႅတ်ႈၵႂႃႇ” ၸၢႆးဢွင်ႇထီးၶမ်း သပ်းလႅင်းလၢတ်ႈၼႄၼင်ႇၼႆ။
ပၢင်ႁူပ်ႉထူပ်းဢုပ်ႇဢူဝ်းၵၼ်ၵမ်းၼႆႉ ပဵၼ်တႃႇတႅမ်ႈပိူင်ယုၵ်းယၢင်ႇလႄႈ လွင်ႈတေၶပ်းၶိုင်ႁၢင်ႈႁႅၼ်းတႃႇၸတ်း ႁဵတ်း ပၢင်ၵုမ်လူင် ပွၵ်ႈၵမ်း 2 တီႈဝဵင်းလႃႈသဵဝ်ႈ ၸဵမ်ၸိူဝ်းၼႆႉ ဝႃႈၼႆ။
ပၢင်ၵုမ်လူင် ၸုမ်းမေႃၵႂၢမ်းတႆး ပွၵ်ႈၵမ်း 1 ၼႆႉ လႆႈၸတ်းႁဵတ်းၵႂႃႇ တီႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း မိူဝ်ႈဝၼ်း တီႈ 17-18/8/2019 ။ ပၢင်ၵုမ်ၵမ်းၼႆႉ မီးမေႃၵႂၢမ်းတႆး (ပၢၼ်မႂ်ႇ/ ပၢၼ်ၵဝ်ႇ) မိူၼ်ၼင်ႇ ၸၢႆးလၢဝ်သႂ်၊ ၸၢႆးၶိူဝ်းသုင် (ပၢၼ်ၵဝ်ႇ)၊ ၸၢႆးသႅင်ၸွမ်ၾႃႉ၊ ၸၢႆးဢွင်ႇထီးၶမ်း၊ ၸၢႆးႁၢၼ်ႇထုၼ်း၊ ပိုၼ်း လႄႈ ဢိၵ်ႇထႅင်ႈလၢႆလၢႆၵေႃႉ ၶဝ်ႈႁူမ်ႈ ဝႃႈၼႆ။
