ၽူႈၸၢႆး 2 ၵေႃႉ ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆ တၢင်းထုင်ႉၼွင်မွၼ် ၸဵင်ႇၸၢၼ်းဝၼ်းတူၵ်း ဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။
ဝၼ်းတီႈ 14/1/2020 ယၢမ်းၵၢင်ၶမ်ႈမွၵ်ႈ 7 မူင်းၶိုင်ႈၼၼ်ႉ ၽူႈၸၢႆး 2 ၵေႃႉ ၺႃးယိုဝ်းတၢႆ ၼႂ်းဢိူင်ႇၼွင်မွၼ် ၸႄႈဝဵင်း လႃႈသဵဝ်ႈ ၸိုင်ႈတႆးပွတ်းႁွင်ႇ။ ယၢမ်းလဵဝ် တူဝ်တၢႆ ၽူႈၸၢႆး 2 ၵေႃႉၼၼ်ႉ လႆႈဢဝ်ၵႂႃႇဝႆႉတီႈ ႁူင်းယႃယဝ်ႉ ဝႃႈၼႆ။
လုင်းဢၢႆႈယီႈ ၼွင်မွၼ် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ပဵၼ်ၽူႈၸၢႆး 2 ၵေႃႉ ၺႃးယိုဝ်းတၢႆ။ ပဵၼ်ၽႂ် ၸုမ်းလႂ် ယိုဝ်းဢၼ်ၼၼ်ႉတႄႉ ဢမ်ႇလႆႈႁူႉၶႃႈ။ တၢင်းပွတ်းတွၼ်ႈၼၼ်ႉ ပဵၼ်ပႃႇၵူၼ်းသူႇသမ်းၵိၼ်ယႃႈမဝ်းၵမ် ယူႇၵၼ်ၶႃႈ ဢေႃႈ။ ပဵၼ်ပႃႇမၼ်းၵမ်းလဵဝ်ၶႃႈယဝ်ႉ။ ၵူၼ်းသွင်ၵေႃႉၼၼ်ႉ ပဵၼ်ၽႂ်၊လုၵ်ႉလႂ်မႃးၵေႃႈ ဢမ်ႇႁူႉ၊ ဢမ်ႇႁၼ်လၵ်းထၢၼ် သင်” ဝႃႈၼႆ။
ၵဵဝ်ႇၵပ်းလွင်ႈၼႆႉ ၵွၼ်ႇၵူၼ်း 2 ၵေႃႉ ၺႃးယိုဝ်းတၢႆၼၼ်ႉ ၵူၼ်းဝၢၼ်ႈၸိူဝ်းယူႇႁိမ်းႁွမ်းၼၼ်ႉ လႆႈ ငိၼ်းသဵင်ၵွင်ႈလၼ်ႇ မွၵ်ႈ 5 ၵမ်း ဝႃႈၼႆ။
“ ႁဝ်းၶႃႈ လႆႈငိၼ်းသဵင်ၵွင်ႈလၼ်ႇ မွၵ်ႈ 5 ၵမ်းၼႆႉ ဢမ်ႇႁတ်းၵႂႃႇတူၺ်းၶႃႈ သဵၼ်ႈတၢင်းၼၼ်ႉ။ ပေႃးၵႂႃႇၵေႃႈ ၵႂႃႇၸွမ်း ၵၼ် ပဵၼ်မူႇပဵၼ်ၾုင် ရူတ်ႉၵႃး 3-4 လမ်းၵႃႈၼႆႉဢေႃႈ” ၵူၼ်းပိုၼ်ႉတီႈ တၢင်းဝၢၼ်ႈၼွင်မွၼ် လၢတ်ႈၼႄၼင်ႇၼႆ။
ယၢမ်းလဵဝ်ၼႆႉ တူဝ်တၢႆ ၽူႈၸၢႆး 2 ၵေႃႉ ဢၼ်ၺႃးယိုဝ်းတၢႆၼၼ်ႉ လႆႈသူင်ႇဝႆႉတီႈ ႁူင်းယႃသေ ယူႇတီႈၾၢႆႇပလိၵ်ႈၶဝ် တိုၵ်ႉၵူတ်ႇထတ်း ပိူင်ပဵၼ်မၼ်းယူႇ ဝႃႈၼႆ။
“ တေႃႈလဵဝ်ၼႆႉ တၢင်းပွတ်းလႃႈသဵဝ်ႈႁဝ်းၶႃႈၼႆႉ ၶႂ်ႈဝႃႈ လီၵူဝ်မႃးလိူဝ်ၵဝ်ႇၶႃႈယဝ်ႉ ၵူၼ်းသူႇသမ်းၵိၼ်ယႃႈမဝ်းၵမ်ၵေႃႈ ၼမ်၊ ၵူၼ်းယွင်ႇယႃႈသေ ၾၼ်းၵူၼ်းၵႂႃႇမႃးၸွမ်းတၢင်းၵေႃႈမီး၊ လုၵ်ႈဢွၼ်ႇႁၢႆ၊ ၸူၼ်ၵၼ် ၸိူဝ်းၼႆႉၵေႃႈမီးမႃးၶႃႈယဝ်ႉ။ တေလႆႈဝႃႈ ဢမ်ႇမီးလွင်ႈႁူမ်ႇလူမ်ႈသင်သေဢိတ်းၶႃႈ။ ပလိၵ်ႈၶဝ်ၵေႃႈ ဢမ်ႇတီႉ၊ ဢမ်ႇႁဵတ်းတႄႉတႄႉၶႃႈ” ၵူၼ်းမိူင်း လႃႈသဵဝ်ႈ လၢတ်ႈၼႄၼင်ႇၼႆ။
ပူၼ်ႉမႃး မိူဝ်ႈဝၼ်းတီႈ 4/1/2020 ယၢမ်းႁူဝ်ၶမ်ႈၼၼ်ႉၵေႃႈ ၽူႈၸၢႆး 4 ၵေႃႉ ႁူမ်ႈၵၼ် ၸူၼ်ရူတ်ႉၶိူင်ႈဢၼ်ၵိုတ်းဝႆႉ ၼႃႈႁူင်းယႃလူင် ၸႄႈဝဵင်းလႃႈသဵဝ်ႈၼၼ်ႉ လႆႈၵႂႃႇ ရူတ်ႉၶိူင်ႈ 2 လမ်း ဝႃႈၼႆ။
မိူဝ်ႈဝၼ်းတီႈ 26/11/2019 ၼၼ်ႉၵေႃႈ ၽူႈၸၢႆးဢႃယု 40 ပီ ၵႂႃႇၶၢႆၶူဝ်း (တၢင်းလဵၼ်ႈလုၵ်ႈဢွၼ်ႇ) ၼၼ်ႉ ၺႃးၵူၼ်းႁၢႆႉ ၽူႈၸၢႆး 3 ၵေႃႉ ႁဵတ်းႁၢႆႉထိုင်တီႈပေႃးလႆႈႁၢမ်သူင်ႇႁူင်းယႃ လႃႈသဵဝ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ