ၵူၼ်းၼုမ်ႇတႆး လၢႆၸႄႈဝဵင်း တေႁူမ်ႈၵၼ် ပၼ်ႇရူတ်ႉထိပ်ႇ ၶဝ်ႈႁူမ်ႈပၢင်ပွႆးဝၼ်းၸိူဝ်ႉၸၢတ်ႈၸိုင်ႈတႆး တီႈငဝ်ႈၸိုင်ႈလွႆ တႆးလႅင်း။
ပေႃးထိုင်မႃး ဝၼ်းတီႈ 7/2/2020 ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈတဵမ် 73 ပီၸိုင် ၵူၼ်းၼုမ်ႇ ၼႂ်းမိူင်းတႆး လၢႆလၢႆၸႄႈဝဵင်း တေႁူမ်ႈၵၼ် ပၼ်ႇရူတ်ႉထိပ်ႇ ၵႂႃႇၶဝ်ႈႁူမ်ႈပၢင်ပွႆး တီႈငဝ်ႈၸိုင်ႈလွႆတႆးလႅင်း ပွၵ်ႈၵမ်းႁႅၵ်ႈ ယိူင်းဢၢၼ်း ပၼ်ႇရူတ်ႉထိပ်ႇ ပၼ်ႁႅင်းၸႂ် ၽူႈႁၢပ်ႇၵၢၼ်ၸိူဝ်ႉၸၢတ်ႈတီႈၼိူဝ်လွႆတႆးလႅင်း။
ၸၢႆးဢွၼ်ၶိူဝ်း ၽူႈယၢမ်ႈပၼ်ႇရူတ်ႉထိပ်ႇ ၼႂ်းၸႄႈမိူင်းတႆးပတ်းပိုၼ်ႉလႄႈ ၼႂ်းတိူင်းထုင်ႉလိၼ်ပဵင်း လၢတ်ႈတီႈၽူႈတွႆႇ ႁွၵ်ႈဝႃႈ “ မိူဝ်ႈတႄႇမၼ်းတႄႉ ႁဝ်းၶႃႈ တေၶိုၼ်ႈတၢင်းသွင်ၾၢႆႇ လုၵ်ႉႁူဝ်မိူင်းၵႂႃႇၾၢႆႇၼိုင်ႈ၊ ယဝ်ႉၵေႃႈ လုၵ်ႉတၢင်းတႃႈၶီႈ လဵၵ်းၵႂႃႇၾၢႆႇၼိုင်ႈ။ ၵူၺ်းၵႃႈ မၢင်ၵေႃႉဢမ်ႇတူဝ်ႈတၼ်းလႄႈ ဢဝ်ဢမ်ႇပဵၼ်ၸွမ်းၵေႃႈမီးသေ ယွၼ်ႉၼၼ် ႁဝ်းၶႃႈ ၸင်ႇ ဝႃႈ တေလုၵ်ႉတၢင်း တႃႈၶီႈလဵၵ်းသေ ၵႂႃႇၵူၺ်းၶႃႈ။ တၢင်းႁူဝ်မိူင်းတႄႉ တေဢမ်ႇပဵၼ်ယဝ်ႉၶႃႈ၊ တေႃႈလဵဝ်တႄႉ တိုၵ်ႉၸူႉ တုမ်ၵူၼ်းၵၼ်ဝႆႉယူႇ။ ဝႃႈတေမီးၵၼ်လၢႆၵေႃႉ” ဝႃႈၼႆ။
ဢၼ်ဢွၼ်ႁူဝ်ၵူၼ်းၼုမ်ႇပၼ်ႇရူတ်ႉထိပ်ႇပွၵ်ႈၼႆႉ ပဵၼ်ၸၢႆးဢွၼ်ၶိူဝ်း သွင်ပီၼွင်ႉလႄႈ ၸၢႆးသၢႆလိူၼ်သႂ် ၵူၼ်းၼုမ်ႇတႆး ဢၼ်ပၼ်ရူတ်ႉထိပ်ႇၵႂႃႇထိုင်မိူင်းယၢင်း၊ မိူင်းမွၼ်း၊ ၵေႃႇသွင် ၸိူဝ်းၼၼ်ႉ ဝႃႈၼႆ။
မၼ်းၸၢႆးသိုပ်ႇလၢတ်ႈဝႃႈ “ လွင်ႈတီႈတေပၼ်ႇရူတ်ႉထိပ်ႇၶိုၼ်ႈၼိူဝ်လွႆတႆးလႅင်းၼႆႉ ယွၼ်ႉၵူၼ်းမိူင်းႁဝ်းၵေႃႈ လႆႈၶၢမ်ႇ တၢမ်ႇသိုၵ်းသိူဝ်မႃးပီယၢဝ်းၶၢဝ်းႁိုင်သေ လွင်ႈတႃႇတေပျေႃႇမူၼ်ႈၸွမ်းၸၢတ်ႈပၢၼ်ၼႆႉ မၼ်းဢမ်ႇမီး ယွၼ်ႉဝႃႈ ၵၢၼ်ႁႃ ၵိၼ်လဵင်ႉတွင်ႉ၊ ၵၢၼ်ဝၢၼ်ႈၵၢၼ်မိူင်း၊ ၵၢၼ်သိုၵ်းၵၢၼ်သိူဝ် သုၵ်းသၵ်းၸွမ်းၼႃႈၵၢၼ်ၽွင်ႈသေ ႁဝ်းဝႃႈ ၶႂ်ႈပၼ်ရူတ်ႉ ထိပ်ႇပၼ်ႁႅင်းၸႂ် ၵေႃႉဢၼ်ႁဵတ်းၵၢၼ်ၸိူဝ်ႉၶိူဝ်း/ ၸၢတ်ႈလႄႈ ၼွင်ႉၼွင်ႉတီႈၼိူဝ်လွႆၸိူဝ်းၼၼ်ႉၵေႃႈပႃး” ဝႃႈၼႆ။
ၶပ်ႉမၢႆ ၵၢၼ်ဢွၵ်ႇၶၢဝ်းတၢင်း ပၼ်ႇရူတ်ႉထိပ်ႇတႄႉ ဝၼ်းတီႈ 30/1/2020 ႁူမ်ႈတူဝ်ၵၼ်တီႈတႃႈၶီႈလဵၵ်း။ 31/1/2020 ၸတ်းပၢင် ၵုမ်တႃႇဢွၵ်ႇ ၶၢဝ်းတၢင်း၊ ဝၼ်းတီႈ 1/2/2020 တႄႇဢွၵ်ႇမႄႈသၢႆ ထိုင် ဝဵင်းပႃႇပဝ်ႉ။ 2/2/2020 ဝဵင်းပႃႇပဝ်ႉ ထိုင် ၵဵင်းမႆႇ၊ ဝၼ်းတီႈ 3/2/ 2020 ၵဵင်းမႆႇ ထိုင်မိူင်းပၢႆး။ ဝၼ်းတီႈ 4/2/2020 မိူင်းပၢႆး ထိုင် ပၢင်မၢၵ်ႇၽႃႈ။ 5/2/2020 ပၢင်မၢၵ်ႇၽႃႈ ထိုင် လွႆတႆးလႅင်း။ ဝၼ်းတီႈ 6-8/2/2020 သမ်ႉ ၶဝ်ႈႁူမ်ႈပၢင်ပွႆးဝၼ်းၸိူဝ်ႉၸၢတ်ႈလႄႈ ဢႅဝ်ႇယဵမ်ႈ။
ၶပ်ႉမၢႆ ၶၢဝ်းတၢင်းပွၵ်ႈသမ်ႉ ဝၼ်းတီႈ 9/2/2020 လုၵ်ႉငဝ်ႈၸိုင်ႈလွႆတႆးလႅင်း ထိုင် မိူင်းပၢႆး။ ဝၼ်းတီႈ 10/2/2020 မိူင်းပၢႆး ထိုင် ၵဵင်းမႆႇ။ 11/2/2020 ဢႅဝ်ႇလွႆပုၺ်း၊ လွႆသုထဵပ်းလႄႈ ႁူၺ်ႈတိုင်းထဝ်ႈ။ ဝၼ်းတီႈ 12/2/2020 လွႆၶမ်း၊ လွႆဢိၼ်းထ ၼူၼ်း 1 ၶိုၼ်း။ 13/2/2020 လွႆဢိၼ်းထၼုၼ်း – ၽႃၶျေႃႉ- ၵဵင်းမႆႇ။ ဝၼ်းတီႈ 14/2/2020 ဢႅဝ်ႇၼႂ်းတူဝ်မိူင်းၵဵင်းမႆႇ။ ဝၼ်း တီႈ 15/2/2020 ၵဵင်းမႆႇ ထိုင်ဝဵင်းပႃႇပဝ်ႉ။ ဝၼ်းတီႈ 16/2/2020 ဝဵင်းပႃႈပဝ်ႈ ထိုင် ၵဵင်းႁၢႆး။ ဝၼ်းတီႈ 17/2/2020 ပွၵ်ႈၶိုၼ်း မႄႈသၢႆ – တႃႈၶီႈလဵၵ်း။
ၸၢႆးဢွၼ်ၶိူဝ်းၸၢႆးသႅင်ႁၢၼ် သွင်ပီႈၼွင်ႉၼႆႉ တႄႇပၼ်ႇလူတ်ႇထိပ်ႇမႃး မိူဝ်ႈဝၼ်းတီႈ 13/01/2019 ပူၼ်ႉမႃးသေ တႄႇ ဢဝ် ဝဵင်းၵဵင်းမႆႇ ၸိုင်ႈထႆး ပၼ်ႇၶိုၼ်ႈမႃး တၢင်းၵဵင်းႁၢႆး၊ မႄႈသၢႆ။ မိူင်းတႆးပွတ်းဢွၵ်ႇ၊ ပွတ်းၸၢၼ်းလႄႈ ပွတ်းႁွင်ႇ။ ယဝ်ႉ ၵေႃႈပၼ်ႇလူင်းၵႂႃႇ ၸႄႈမိူင်းယၢင်းလႅင်၊ ၸႄႈမိူင်းမွၼ်း၊ တိူင်းတႃႈၵုင်ႈ၊ ၼေႇပျီႇတေႃႇ၊ ဝဵင်းလိူဝ်ႇလႄႈ ပူးၵမ်ႇ ၸဵမ်ၸိူဝ်း ၼႆႉ လႆႈၸႂ်ႉၶၢဝ်းယၢမ်း မွၵ်ႈ 3 လိူၼ် ဝႃႈၼႆ။
ၸၢႆးဢွၼ်ၶိူဝ်းလႄႈၸၢႆးသႅင်ႁၢၼ်သွင်ပီႈၼွင်ႉၼႆႉၸႃႇတိတီႈၵိူတ်ႇပဵၼ်ဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း။
