ၸၢႆးၼုမ်ႇ ဢႃယု 20 ပၢႆ ယူႇပွၵ်ႉမဵဝ်ႉမ ဝဵင်းတူၼ်ႈတီး ဝႅၼ်တူၵ်းၼမ်ႉၼွင် ၶႃႈတူဝ်တၢႆ ပဵၼ်ယွၼ်ႉသင်ပႆႇႁူႉ။

ၼွင်ႉမွၵ်ႇမူဝ်ႁဵဝ်းၶမ်း ၽူႈသိုဝ်ႇၶၢဝ်ႇ ၸုမ်းၶၢဝ်ႇၽူႈတွႆႇႁွၵ်ႈ ႁၢႆးငၢၼ်းလၢတ်ႈၼႄဝႃႈ “ ၸႂ်ႈၶႃႈဢေႃႈ ပဵၼ်ၽူႈၸၢႆး ဢႃယု မွၵ်ႈ 20 ပၢႆၼႆႉ ဝႅၼ်တူၵ်းၼမ်ႉၼွင်။ တေႃႈလဵဝ် တူဝ်တၢႆမၼ်းၸၢႆးတႄႉ ၸဝ်ႈၼႃႈတီႈဢဝ်ၵႂႃႇဝႆႉတီႈႁူင်းယႃလူင်ၸဝ်ႈ ၸၢမ်ႇထုၼ်းယဝ်ႉ၊ ပဵၼ်ယွၼ်ႉသင်တႄႉတႄႉလႄႈမၼ်း ဝႅၼ်တူၵ်းတၢႆ ဢၼ်ဝႃႈၼၼ်ႉတႄႉ ဢမ်ႇပႆႇႁူႉ၊ ၸဝ်ႈၼႃႈတီႈ တိုၵ်ႉၵူတ်ႇထတ်းယူႇ” ဝႃႈၼႆ။

ဝၼ်းတီႈ 10/1/2020 မိူဝ်ႈၼႆႉ ယၢမ်းၵၢင်ၼႂ် ၵူဝ်ႇတီႇႁႃႉၸေႃး ဢႃယု 23 ပီ ၶီႇရူတ်ႉၶိူင်ႈမႃးၵိုတ်းႁိမ်းၼွင်ၵၼၢႆႇၵၢၼ်ႇ ဢၼ် မီးတီႈပွၵ်ႉၵျွင်းၵျီးၸုသေ ဝႅၼ်တူၵ်းၼမ်ႉၵႂႃႇ။ ၵူၼ်းဝၢၼ်ႈလႄႈ ၸဝ်ႈၼႃႈတီႈမႃးႁူမ်ႈၵၼ်လူင်းႁႃ ႁိုင်မွၵ်ႈၶိုင်ႈ ၸူဝ်ႈမူင်း ၸင်ႇႁၼ်တူဝ်တၢႆမၼ်းၸၢႆး ဢၢႆႈၸၢႆးတူၼ်ႈတီးၵေႃႉၼိုင်ႈလၢတ်ႈ။

မိူဝ်ႈလၢႆပီပူၼ်ႉမႃးၼၼ်ႉၵေႃႈ တီႈၼွင်ၼႆႉ ယၢမ်ႈမီးၵူၼ်းမႃးတူၵ်းတၢႆယူႇ ဢၢႆႈၸၢႆးလၢတ်ႈၼႄၼင်ႇၼႆ။

တေႃႈလဵဝ် ယူႇတီႈၽူႈမီးပုၼ်ႈၽွၼ်းပလိၵ်ႈၶဝ် တိုၵ်ႉၵူတ်ႇထတ်းလွင်ႈပိူင်ပဵၼ်ၵၢၼ်တၢႆၼႆႉ ဝႆႉတီႈႁူင်းပလိၵ်ႈၸႄႈဝဵင်း တူၼ်ႈတီးဝႆႉယူႇ ဝႃႈၼႆ။

ၼွင်ၵၼၢႆႇၵၢၼ်ႇၼႆႉ ၵူၼ်းမိူင်းတူၼ်ႈတီး ႁူမ်ႈၵၼ်ၶုတ်းဝႆႉ ၸဵမ်မိူဝ်ႈပီ 1978-80 ပူၼ်ႉမႃး။ တၢင်းၵႂၢင်ႈမီးမွၵ်ႈ 7 ဢေႊ ၶိူဝ်ႊ။ ၶင်ၼမ်ႉလွႆဝႆႉသေ ၶိုၼ်းသူင်ႇၵႂႃႇၸူးၼွင်ဢူးၶမ်းၽွင်ႈ၊ ၸႅၵ်ႇပၼ်ၵူၼ်းပွၵ်ႉၸႂ်ႉပဵၼ်ၼမ်ႉၵိၼ်ၼမ်ႉၸႂ်ႉၽွင်ႈ။