ၵူၼ်း 4 ၵေႃႉ ၸူၼ်ရူတ်ႉၶိူင်ႈၵူၼ်းမိူင်း တီႈၼႃႈႁူင်းယႃလူင် လႃႈသဵဝ်ႈ တၼ်းလႆႈရူတ်ႉၶိူင်ႈၵႂႃႇ 2 လမ်း။
ဝၼ်းတီႈ 4/1/2020 ယၢမ်းႁူဝ်ၶမ်ႈ 5 မူင်းၼၼ်ႉ မီးၽူႈၸၢႆး 4 ၵေႃႉ ၸူၼ်ရူတ်ႉၶိူင်ႈဢၼ်ၵိုတ်းဝႆႉၼႃးႁူင်းယႃလူင် ၸႄႈ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉလႆႈၵႂႃႇ 2 လမ်း ဝႃႈၼႆ။
ၽူႈတူင်ႉၼိုင်တူင်ႇဝူင်းၵူၼ်း ၵေႃႉၼိုင်ႈ တီႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၵူၼ်းႁၢႆႉၸိူဝ်းၼၼ်ႉ ၸူၼ်ဢဝ်ရူတ်ႉၶိူင်ႈၼႂ်းမိုဝ်းၸဝ်ႈၶွင်ရူတ်ႉၵမ်းလဵဝ်ယဝ်ႉ။ ၸဝ်ႈရူတ်ႉၶိူင်ႈႁၢမ်ႈယူႇၵေႃႈ ၶဝ်ပၢႆဢဝ် မၢၵ်ႇႁိၼ် သိုင်းသႂ်ႇ ၸဝ်ႈရူတ်ႉၶိူင်ႈသေ လၢၵ်ႈၸၼ်ဢဝ်ၵႂႃႇလူးၵွၼ်ႇ” ဝႃႈၼႆ။
ၵူၼ်းႁၢႆႉၸိူဝ်းၼၼ်ႉ ယၢမ်းလဵဝ် ပၢႆႈလွတ်ႈဝႆႉ။
“ တေႃႈလဵဝ် ၼႂ်းၸႄႈဝဵင်းလႃႈသဵဝ်ႈႁဝ်းၶႃႈၼႆႉ ၶႂ်ႈလီၵူဝ်မႃးတိၵ်းတိၵ်းၶႃႈယဝ်ႉ။ ၵမ်ႉလၵ်ႉလုၵ်ႈဢွၼ်ႇဝႃႇ၊ ၸူၼ်ၵၼ်ဝႃႇ၊ ၾၼ်းၵၼ်ဝႃႇ၊ လၵ်ႉၵူၼ်းလူင်ၵေႃႈ မီးထႅင်ႈၵွၼ်ႇတေႃႈလဵဝ်ၼႆႉ။ ၵူၼ်းသူႇသမ်းၵိၼ်ယႃႈမဝ်းၵမ်ၵေႃႈၼမ်၊ ယႃႈမဝ်းၵမ် ၵေႃႈၼမ်” ၵူၼ်းပိုၼ်ႉတီႈ လႃႈသဵဝ်ႈ လၢတ်ႈၼႄၼင်ႇၼႆ။
မိူဝ်ႈပူၼ်ႉမႃး ဝၼ်းတီႈ 26/11/2019 ယၢမ်းၵၢင်ၶမ်ႈ 8 မူင်းၼၼ်ႉၵေႃႈ ၽူႈၸၢႆးဢႃယု 40 ပီ ၵႂႃႇၶၢႆၶူဝ်းၵိၼ်ယမ်ႉလႄႈ (တၢင်းလဵၼ်ႈလုၵ်ႈဢွၼ်ႇ) ၽွင်းမၼ်းၸၢႆး ၶီႇရူတ်ႉၶိူင်ႈတေပွၵ်ႈႁိူၼ်းၼၼ်ႉ ၺႃးၵူၼ်းႁၢႆႉ ၽူႈၸၢႆး 3 ၵေႃႉ လၢၵ်ႈမိတ်ႈ ၾၼ်းသႂ်ႇ မၼ်းၸၢႆး တီႈႁိမ်းဝၢၼ်ႈၼႃးဢၢႆႈၶၢင် ၸႄႈဝဵင်းလႃႈသဵဝ်ႈ။
