Thursday, March 28, 2024

ၵူၼ်းၸေႊလၢၼ်ႉၵေႃႉၼိုင်ႈ ထုၵ်ႇၸုမ်းယိပ်းၵွင်ႈၵၢင်ႇတီႉၵႂႃႇ ႁၢႆတူဝ်ဝႆႉ

Must read

ၵူၼ်းယူႇၼႂ်းၸေႊလၢၼ်ႉၵေႃႉၼိုင်ႈ ထုၵ်ႇၸုမ်းယိပ်းၵွင်ႈၵၢင်ႇၸုမ်းၼိုင်ႈ မႃးတီႉဢဝ်တီႈႁိူၼ်းၵႂႃႇ၊ တေႃႇထိုင်ယၢမ်းလဵဝ် ပႆႇပွႆႇပၼ်ၶိုၼ်း။ လုၵ်ႈလၢင်းမေးၼၢင်းတၢင်းႁိူၼ်း တိုၵ်ႉထၢမ်ႁႃၶၢဝ်ႇ လႄႈ မုင်ႈမွင်းပႂ်ႉပွၵ်ႈၶိုၼ်းႁိူၼ်း။

ပူၼ်ႉမႃးမိူဝ်ႈၽွင်းႁူဝ်လိူၼ်ၵျႅၼ်ႊၼိဝ်ႊရီႊ 2018 ၶၢဝ်းယၢမ်းၵၢင်ၶမ်ႈ၊ တီႈဝဵင်းၸေႈလၢၼ်ႉ ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ မီးၸုမ်းယိပ်းၵွင်ႈၵၢင်ႇၸုမ်းၼိုင်ႈ မႃးတီႉၺွပ်းၵႂႃႇၵူၼ်းၸၢႆးၵေႃႉၼိုင်ႈ ဢႃယုမွၵ်ႈ 45 ပီ၊ တီႈႁိူၼ်းမၼ်းၸၢႆး ဝဵင်းၸေႈလၢၼ်ႉ၊ ႁၢၼ်ႉတေႃႇထိုင်မိူဝ်ႈလဵဝ် ယင်းပႆႇပွႆႇပၼ်ပွၵ်ႈၶိုၼ်းႁိူၼ်း-ၼႆယဝ်ႉ။

- Subscription -

မေးၼၢင်းမၼ်းၸၢႆး ၵေႃႉထုၵ်ႇတီႉၺွပ်းၵႂႃႇၼႆႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- “မိူဝ်ႈလဵဝ် မၼ်းၵႂႃႇမီးတီႈလႂ်၊ ၸုမ်းလႂ်မႃးတီႉၺွပ်းၵႂႃႇၼၼ်ႉ ပႆႇလႆႈႁူႉ၊ တိုၵ်ႉထၢမ်ၶၢဝ်ႇထၢမ်ငၢဝ်းဝႆႉလၢႆတီႈလၢႆတၢင်းယူႇ။ ႁဝ်းၶႃႈတႄႉ ဢမ်ႇၶႂ်ႈၸီႉၼႄးဝႃႈပဵၼ်ၸုမ်းလႂ်၊ သၢႆၸႂ်ၵူၼ်းၼိုင်ႈၵေႃႉဢၼ်ဝႃႈၼႆႉ မၼ်းလမ်ႇလွင်ႈတႄႉတႄႉ၊ ၵူၺ်းၵႃႈ ပိူဝ်ႈတႃႇမၼ်းတေပူၼ်ႉလွတ်ႈမႃးလႄႈ ႁဝ်းၶႃႈပႆႇၶႂ်ႈဢွၵ်ႇၸိုဝ်ႈဢွၵ်ႇသဵင်”- ဝႃႈၼႆ။

ၵူၼ်းၸၢႆးၵေႃႉဢၼ် ထုၵ်ႇတီႉၺွပ်းၵႂႃႇသေ တၢင်းႁိူၼ်းတၢင်းယေးမေးၼၢင်း ဢမ်ႇၶႂ်ႈဢွၵ်ႇၸိုဝ်ႈၼႆႉ ဢွၼ်တၢင်းၼႆႉ ယၢမ်ႈႁၢပ်ႇၵိုတ်ႉၼႃႈၵၢၼ်ၼႂ်းၸုမ်းသိုၵ်းၵူၼ်းမိူင်း (ပျီႇတုၸိတ်ႉ)သႅင်ၵႅဝ်ႉ ဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။ မႃးယူႇသဝ်းတီႈၸေႊလၢၼ်ႉသေ ႁေႃႈလူတ်ႉၵႃး 12 လေႃႉတိုၵ်ႉလႆႈၶၢဝ်းတၢင်းမွၵ်ႈ 1 ပီ-ၼႆယဝ်ႉ။

ၼႂ်းပိုၼ်ႉတီႈၸေႊလၢၼ်ႉ ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ ပွတ်းလႅၼ်လိၼ်မိူင်းတႆး-မိူင်းၶႄႇၼႆႉ မီးၸုမ်းယိပ်းၵွင်ႈၵၢင်ႇလၢႆလၢႆၸုမ်းတူင်ႉၼိုင်ယူႇသဝ်းဝႆႉ။ ၼွၵ်ႈၼိူဝ်သေ တပ်ႉသိုၵ်းလူင်ပွင်ၸိုင်ႈမၢၼ်ႈယဝ်ႉ မီးတပ်ႉသိုၵ်းၸိုင်ႈတႆး RCSS/SSA ၊ SSPP/SSA ၊ သိုၵ်းၶၢင် KIA ၊ သိုၵ်းတဢၢင်း TNLA ၸိူဝ်းၼႆႉ။

ၸုမ်းယိပ်းၵွင်ႈၵၢင်ႇ ဢၼ်မႃးတီႉၵႂႃႇၼႆႉ လႆႈႁူႉဝႃႈ မိူဝ်ႈၽွင်းမိူဝ်းတီႈႁိူၼ်းၼၼ်ႉ မိူဝ်ႈတႄႇမၼ်းၶဝ်လၢတ်ႈ ၵႂၢမ်းမၢၼ်ႈတေႃႇၵၼ်။ ၽိူဝ်ႇမႄႈၸဝ်ႈ ၵူၼ်းၵေႃႉၺႃးတီႉၼၼ်ႉ ႁွင်ႉႁႆႈၵေႃႈ ၶဝ်လၢတ်ႈတွပ်ႇၵႂၢမ်းတႆးဝႃႈ- ပေႃးဢဝ်ၵႂႃႇၸွပ်ႇထတ်းထဵတ်ႈထၢမ်ယဝ်ႉ တေပွႆႇမႃးၶိုၼ်းယူႇ-ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း