လူမ်းလႅင်ႉ၊ မၢၵ်ႇႁဵပ်း ၾူၼ်လူင် ၽတ်ႉတူၵ်းသႂ်ႇ ႁိူၼ်းၵူၼ်း ၼႂ်းၸႄႈဝဵင်းသီႇပေႃႉ လင်ၶႃးႁိူၼ်းလူႉၵွႆ 100 ပၢႆ။
လူမ်းလႅင်ႉၶဝ်ႈမိူဝ်ႈ ဝၼ်းတီႈ 1/1/2020 ယၢမ်းၵၢင်ၶိုၼ်းမွၵ်ႈ 9 မူင်းၶိုင်ႈ ႁိူၼ်းၵူၼ်းဝၢၼ်ႈႁူဝ်ၼွင်၊ ၵုင်းပႅၼ်ႈ၊ ၵုင်းသႃႇ ပွၵ်ႉ 1 တင်း ပွၵ်ႉ 2 ၼႂ်းဢိူင်ႇၵုင်းသႃႇ ၸႄႈဝဵင်းသီႇပေႃႉ လူႉလႅဝ်ၵႂႃႇ 167 လင်။
လုင်းသႅင်ႁၢၼ် ၽူႈၵွၼ်းဢိူင်ႇၵုင်းသႃႇ လၢတ်ႈတီႈၽူႈတွႆႇႁွၵ်ႈဝႃႈ “ လင်ၶႃးႁိူၼ်း ဢၼ်လူမ်းပတ်ႉဢဝ်ၵႂႃႇတႄႉ တေၺႃး မွၵ်ႈ 21-22 လင်ၼႆႉ။ ယဝ်ႉၵေႃႈ ဢၼ်ၵွၵ်းဢဝ် လင်ၶႃးမုင်းၵႂႃႇ ၼိုင်ႈၶိုင်ႈသမ်ႉ တေမီးမွၵ်ႈ 78 လင်၊ လိူဝ်ၼၼ်ႉ ဢၼ် ၽတ်ႉဢဝ်ၽႃႁိူၼ်းၵႂႃႇတႄႉ တေမီးမွၵ်ႈ 1-2 လင်ၼႆႉ။ လိူဝ်ၸိူဝ်းၼၼ်ႉတႄႉ လူႉၵွႆၵၼ်ၵမ်ႈၽွင်ႈ” ဝႃႈၼႆ။
တေႃႈလဵဝ် ၵူၼ်းဝၢၼ်ႈ ၸိူဝ်းၺႃးၽေးလူမ်းလႅင်ႉၽတ်ႉသႂ်ႇလင်ၶႃးႁိူၼ်း၊ ၽႃႁိူၼ်းလူႉၵွႆၼမ် ၸိူဝ်းၼၼ်ႉ မၢင်ၵေႃႉ လႆႈ ၶၢႆႉၵႂႃႇ သွၼ်ႈယူႇဝႆႉၸွမ်းႁိူၼ်းပီႈၼွင်ႉၽႂ်မၼ်းဝႆႉ။
“ သဝ်လၵ်းၾႆးၵေႃႈ ႁၵ်းလူမ်ႉ တင်းမူတ်း 19 သဝ်။ ၵူၼ်းဝၢၼ်ႈမၢတ်ႇၸဵပ်းလူႉတၢႆတႄႉ ဢမ်ႇမီး။ လူမ်းလႅင်ႉၽတ်ႉမႃး ဢွၼ်တၢင်း၊ ယဝ်ႉၵေႃႈ မၢၵ်ႇႁဵပ်းတူၵ်း။ ဝၢႆးၼၼ်ႉ ၾူၼ်ၸင်ႇတူၵ်း” လုင်းသႅင်ႁၢၼ်လၢတ်ႈၼႄၼင်ႇၼႆ။
ယွၼ်ႉပိူဝ်ႈ မၢၵ်ႇႁဵပ်းတူၵ်းလူမ်းၽတ်ႉသေ သူၼ်မၢၵ်ႇၶိူဝ်သူမ်ႈ၊ သူၼ်မၢၵ်ႇၵဵင် ၸိူဝ်းၼႆႉ လႆႈလူႉသုမ်းတင်းၼမ်။
လုင်းသႅင်ႁၢၼ်လၢတ်ႈဝႃႈ “ ဢမ်ႇထၢင်ႇဝႃႈ တေလူႉၵွႆၼမ်ပဵၼ်ထၢၼ်ႇၼႆႉ တေႃႈလဵဝ်တႄႉ တႃႇၵူၼ်းဝၢၼ်ႈပေႃးတေပူၵ်း တင်ႈႁိူၼ်းယေးၽႂ်မၼ်းၶိုၼ်းၼၼ်ႉ လူဝ်ႇတၢင်းၸွႆႈထႅမ်ၶႃႈဢေႃႈ ယၢမ်းလဵဝ်တႄႉ ၾၢႆႇလူင်ပွင်ၸိုင်ႈ မႃးၵမ်ႉထႅမ်ငိုၼ်းဝႆႉ 92 သႅၼ်ပျႃး” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ