ၵႃးလူင် 12 လေႃႉ လမ်းၼိုင်ႈ ပိၼ်ႈတူၵ်းႁူၺ်ႈ ၼႂ်းၵႄႈမိူင်းပွၼ် တင်း လွႆလႅမ် မီးၵူၼ်းမၢတ်ႇၸဵပ်း 4 ၵေႃႉ လူႉတၢႆ 3 ၵေႃႉ။
ဝၼ်းတီႈ 5/1/2020 ယၢမ်းဝၢႆးဝၼ်းမွၵ်ႈ 4 မူင်းၶိုင်ႈၼၼ်ႉ ၵႃးလူင် 12 လေႃႉ ပိၼ်ႈၶႂမ်ႈတူၵ်းႁူၺ်ႈ ၼႂ်းၵႄႈမိူင်းပွၼ် – လွႆ လႅမ် ၼႂ်းၸႄႈဝဵင်းလွႆလႅမ် ၸိုင်ႈတႆးပွတ်းၸၢၼ်း။
ႁွင်ႈၵၢၼ်ၾၢႆႇၶႄၾႆး ၸႄႈဝဵင်းလွႆလႅမ် ပိုၼ်ၽၢဝ်ႇဝႆႉဝႃႈ “ၵႃးလူင် 12 လေႃႉ ဢၼ်ပိၼ်ႈတူၵ်းႁူၺ်ႈၼႆႉ ယွၼ်ႉပလိၵ်ႈ ၶၢတ်ႇ။ ၵူၼ်းမႃးၸွမ်းၵႃး မီး 7 ၵေႃႉ။ တၢႆ 3 ၵေႃႉ။ မၢတ်ႇၸဵပ်း 4 ၵေႃႉ။ ၵူၺ်းၵႃႈ ဢၼ်မၢတ်ႇၸဵပ်းၼၼ်ႉ ဢမ်ႇထိုင်တီႈ လႆႈမႆႈၸႂ်” ဝႃႈၼႆ။
ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈၾၢႆႇၸွႆႈထႅမ် လႆႈၵႂႃႇၸွႆႈဢဝ် ၵူၼ်းမၢတ်ႇၸဵပ်းလႄႈ ၵူၼ်းလူႉတၢႆၸိူဝ်းၼၼ်ႉ ဢွၵ်ႇမႃးသေ သူင်ႇႁူင်းယႃလွႆလႅမ်မူတ်းယဝ်ႉ ဝႃႈၼႆ။
