ၾႆးမႆႈဝတ်ႉသၢႆထမ်းလႅင်း ဝၢၼ်ႈၼွင်သွမ်း ၸႄႈဝဵင်းၵေးသီး လင်ၼိုင်ႈ ၶူဝ်းၶွင်ၼႂ်းဝိႁၢရ် ဢမ်ႇတၼ်းလႆႈသင် ဝႃႈၼႆ။
ဝၼ်းတီႈ 3/1/2020 ယၢမ်းၵၢင်ၶိုၼ်း မွၵ်ႈ 10:20 မူင်း ၾႆးမႆႈဝတ်ႉသၢႆထမ်းလႅင်း ဝၢၼ်ႈၼွင်သွမ်း ယွၼ်ႉၾႆးတဵၼ်း လူမ်ႉ သေ လုၵ်ႉႁုပ်ႇမႆႈဝတ်ႉ ဝႃႈၼႆ။
ၵူၼ်းဝၢၼ်ႈ ၼွင်သွမ်း ဢႃယု မွၵ်ႈ 40 ပီ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈဢၼ်ၾႆးလႆႈမႆႈၵႂႃႇၼႆႉတႄႉ ပဵၼ်ယွၼ်ႉၵွပ်ႈ တႆႈတဵၼ်းဝႆႉတီႈၶဵင်ႇၽြႃးသေၼွၼ်းလပ်းၵႂႃႇ လႆႈႁူႉၼင်ႇၼႆ”။
လွင်ႈလူႉသုမ်းတႄႉ ဢမ်ႇပႆႇၼပ်ႉ သွၼ်ႇၵႃႈၶၼ်မၼ်းလႆႈ။ ဢၼ်ႁုပ်ႈလႆႈႁူဝ်ယွႆႈမၼ်းၵမ်ႈၽွင်ႈတႄႉ မိူၼ်ၼင်ႇ ၶွမ်ႊ ၽိဝ်ႊတိူဝ်ႊ 2 ၶိူင်ႈ၊ ၸၢၵ်ႈဢိတ်ႇ လိၵ်ႈ 2 ၶိူင်ႈ၊ ငိုၼ်း 2,600,000 ပျႃး၊ ၽႃႈႁူမ်ႇၶူဝ်းၼွၼ်းတင်းသဵင်ႈ၊ မွင်းတူၼ်းလူင် 1 လုၵ်ႈ၊ ၽိူၼ်လႄႈ မေႃႈဝၢၼ်ႇတင်းသဵင်ႈ၊ ၵွင်မွင်းသႅင်ႇ 2 သိူင်း၊ ပပ်ႉႁူင်းတူၺ်းလိၵ်ႈ 500 ပပ်ႉပၢႆ၊ ပပ်ႉထမ်းပိတၵၢတ်ႈ ၸဝ်ႈ ပၢၵ်ႇပၢႆလႄႈ ၽြႃးရၶႅင်ႇလူင်ဢၼ်တဵၵ်းၶမ်းတႄႉဝႆႉ သူႇၼိုင်ႈ၊ ဢၼ်ဢမ်ႇၼပ်ႉသွၼ်ႇလႆႈထႅင်ႈ တင်းၼမ်။
“ရႁၢၼ်းသင်ၶၸဝ်ႈတႄႉ လွတ်ႈၽေးလီယူႇၵူႈတူၼ်၊ ယၢမ်းၾႆးတိုၵ်ႉတႄႇလုၵ်ႉမႆႈၼၼ်ႉ ၸဝ်ႈသၢင်ႇဢွၼ်ႇၶဝ် ဢၼ် ၼွၼ်းၼိူဝ်ဝတ်ႉၼၼ်ႉ ၼꧣ်ႈလႅၼ်ႈလူင်းဝတ်ႉ ဢဝ်တူဝ်လွတ်ႈလႆႈႁင်းၽႂ်မၼ်း မီးၸဝ်ႈရႁၢၼ်းတူၼ်ၼိုင်ႈၵူၺ်း ၶႃ မၼ်းၸဝ်းလႆႈၶတ်းၵႂႃႇဢိတ်းၼိုင်ႈ ၵွပ်ႈပိူဝ်ႈမိူဝ်ႈၾႆးတႄႇမႆႈၼၼ်ႉ မၼ်းၸဝ်ႈလႅၼ်ႈၵႂႃႇတွႆႇမွင်းလူင်သေ ၼႅတ်ႈဝႅၼ် တူၵ်းဝတ်ႉလႄႈ ၸင်ႇလႆႈၶႃၶတ်းၵႂႃႇ” ၵူၼ်းဝၢၼ်ႈၼွင်သွမ်းလၢတ်ႈၼႄၼင်ႇၼႆ။
ဝၢႆးသေ ၾႆးမႆႈ ႁိုင်ၵႂႃႇမွၵ်ႈ ၶိုင်ႈၸူဝ်ႈမူင်းၼၼ်ႉ ၸင်ႇမီး ၵႃး ၶႄၾႆး 3 လမ်း မႃးၸွႆႈႁူတ်းၾႆး ဝႃႈၼႆ။
ဝတ်ႉသၢႆထမ်းလႅင်းၼႆႉ ၸဝ်ႈၵွၼ်းဝတ်ႉပဵၼ်သြႃႇၸဝ်ႈၸေႃးတိၵ၊ ဝတ်ႉလင်ၼႆႉ တႄႇၵေႃႇသၢင်ႈမႃးယဝ်ႉတူဝ်ႈမိူဝ်ႈပီ ၵေႃးၸႃႇ 1353 ၶု၊ ပီၶရိတ်ႉ 1992 ဝႃႈၼႆ။
ဝတ်ႉသၢႆထမ်းလႅင်းၼႆႉ မီးၾၢႆႇတၢင်းတူၵ်းတၢင်းလူင်၊ ဢိူမ်ႈတၢင်းလူင်သဵၼ်ႈတၢင်းလၢႆးၶႃႈ – ၵေးသီး၊ မီးတၵ်ႉၵႃႇၶိုၼ်ႈ ဝတ်ႉ ႁူၵ်းဝၢၼ်ႈ မိူၼ်ၼင်ႇ ဝၢၼ်ႈၼွင်သွမ်း၊ ၵုင်းလိူဝ်ႇ၊ ၽၢႆမူင်ႈ၊ ႁူဝ်ၼႃး၊ ဝၢၼ်ႈလၵ်း၊ ၶွၵ်းၼွႆႉ ၸိူဝ်းၼႆႉ။
လႅင်ႇၶၢဝ်ႇ – ၸၢႆးလိူၼ်တႆး
