ၸုမ်းတူင်ႉၼိုင်တူင်ႇဝူင်းတႆးလႄႈ ႁႅင်းၵၢၼ်တႆး ႁူမ်ႈၵၼ် ၵမ်ႉၸွႆႈ ၵူၼ်းပၢႆႈၽေးသိုၵ်း ၼႂ်းၸိုင်ႈတႆးပွတ်းႁွင်ႇ။

ဝၼ်းတီႈ 13/12/2019 ယူႇတီႈႁႅင်းၵၢၼ်တႆး တင်းမုၵ်ႉၸုမ်းၸၢဝ်းၶိူဝ်းတႆး ၼႂ်းၸိုင်ႈထႆး ႁူမ်ႈၵၼ် ၸွႆႈၵမ်ႉထႅမ်ပၼ် ၵူၼ်း ပၢႆႈၽေးသိုၵ်း တီႈဝတ်ႉ/ ၵျွင်း ထမ်ႇမရူင်ႇ ပွၵ်ႉ 8 ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ တႃႇငိုၼ်းထႆး 22,550 ဝၢတ်ႇ ( မႅၼ်ႈငိုၼ်းမၢၼ်ႈယူႇ 11 သႅၼ်ပျႃး) ဝႃႈၼႆ။

ၶူဝ်းၶွင်ဢၼ်လႆႈၵမ်ႉထႅမ်ၸွႆႈၵူၼ်းပၢႆႈၽေးသိုၵ်းသမ်ႉ မိူၼ်ၼင်ႇ ၶဝ်ႈသၢၼ် 15 ထူင်၊ ပႃဢႅပ်ႇ 3 တိူၵ်ႈ၊ ထူဝ်ႇလိူင် 2 ထူင်၊ ၼမ်ႉမၼ်း 2 ပုင်း၊ ၵျႃႇသၢၼ်ႇ 3 ၵဵၼ်၊ ၽၵ်းမီႇလႅင် 1 ထူင်၊ ၽၵ်းမီးၽိူၵ်ႇ 1 ထူင်။ လိူဝ်ၼၼ်ႉ ၵိူဝ်ၽွင်ဝၢၼ် ၸဵမ်ၸိူဝ်းၼႆႉ။

ၼၢင်းထူၺ်းဢိင်ႇ ၵႅမ်ႁူဝ်ပဝ်ႈ 2 မုၵ်ႉၸုမ်းၸၢဝ်းၶိူဝ်းတႆး မိူင်းၵွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈလိူၼ် 8 ပီ 2019 ၼႆႉ ဢိင်ၼိူဝ်ငဝ်းလၢႆး ၼႂ်းမိူင်းတႆးပွတ်းႁွင်ႇ မီးပၢင်တိုၵ်းၵိူတ်ႇၶိုၼ်ႈ ၼႂ်းၵႄႈသိုၵ်းမၢၼ်ႈလႄႈ သိုၵ်းၸၢဝ်းၶိူဝ်းႁၢဝ်ႈႁႅင်း ႁဵတ်းႁႂ်ႈ ၵူၼ်းမိူင်းၼႂ်းမိူင်းတႆးႁဝ်းပွတ်းႁွင်ႇ လႆႈထူပ်းၽေးပၢင်တိုၵ်းၸွမ်းလႄႈ ယိူင်းဢၢၼ်းဢၼ်ၼႆႉသေ တႃႇၸွႆႈထႅမ်ပီႈၼွင်ႉ ထူပ်းၽေးသိုၵ်း။ မိူဝ်ႈဝၼ်းတီႈ 19/8/2019 ၼၼ်ႉ ႁဝ်းၶႃႈ မုၵ်ႉၸုမ်းၸၢဝ်းၶိူဝ်းတႆး ၸိုင်ႈထႆး ၸင်ႇလႆႈဢွၼ်ႁူဝ်ပီႈၼွင်ႉ တႆး ႁႅင်းၵၢၼ်ယၢၼ်မိူင်းႁဝ်းၶႃႈသေ လူႇၶၢမ်ႇယွၼ်းတၢင်းၵမ်ႉၸွႆႈထႅမ် တီႈပီႈၼွင်ႉတႆး ယၢၼ်မိူင်းႁဝ်းၶႃႈ မႃးယူႇယဝ်ႉ။ တေႃႇထိုင် ဝၼ်းမိူဝ်ႈၼႆႉ ႁဝ်းၶႃႈလႆႈႁပ်ႉငိုၼ်းၵမ်ႉၸွႆႈ တီႈပီႈၼွင်ႉႁဝ်းၶႃႈတင်းသဵင်ႈ မီးယူႇငိုၼ်းထႆး 198,001 ဝၢတ်ႇ” ဝႃႈၼႆ။

လိူဝ်ၼၼ်ႉ ငိုၼ်းၵမ်ႉၸွႆႈ ပီႈၼွင်ႉႁႅင်းၵၢၼ်တႆး ၵူႈတီႈၸွႆႈထႅမ်ၶဝ်ႈမႃးၼၼ်ႉ လႆႈၸွႆႈထႅမ်မိူဝ်း တီႈၵူၼ်းပၢႆႈၽေးသိုၵ်း ၼၼ်ႉသမ်ႉ မိူဝ်ႈဝၼ်းတီႈ 21/8/2019 ၸွႆႈထႅမ်မိူဝ်းၼႂ်းၸႄႈဝဵင်းလႃႈသဵဝ်ႈ တႃႇငိုၼ်းထႆး 20,500 ဝၢတ်ႇ (မႅၼ်ႈငိုၼ်း မၢၼ်ႈ 10 သႅၼ်ပျႃး)၊ မိူဝ်ႈဝၼ်းတီႈ 1/9/2019 ၸွႆႈထႅမ်မိူဝ်း ၼႂ်းၸႄႈဝဵင်းလႃႈသဵဝ်ႈထႅင်ႈ 8,280 ဝၢတ်ႇ (မႅၼ်ႈငိုၼ်းမၢၼ်ႈ ယူႇ 4 သႅၼ်ပျႃး)၊ မိူဝ်ႈဝၼ်းတီႈ 12/12/2019 ၼၼ်ႉ လႆႈၸွႆႈထႅမ်ၵူၼ်းပၢႆႈၽေးသိုၵ်း တီႈၵျွင်းထမ်ႇမရူင်ႇ ၸႄႈဝဵင်းၵျွၵ်ႉ မႄး 22,550 ဝၢတ်ႇ မႅၼ်ႈငိုၼ်း 11 သႅၼ်ပျႃးသေ ႁူမ်ႈတုမ် ငိုၼ်းဢၼ်လႆႈၸွႆႈထႅမ်မိူဝ်းတင်းသဵင်ႈ 51,330 ဝၢတ်ႇ (မႅၼ်ႈ ငိုၼ်းမၢၼ်ႈ 25 သႅၼ်ပျႃး)၊ ငိုၼ်းၵိုတ်းဢၼ်ဢမ်ႇပႆႇလႆႈၸွႆႈမိူဝ်း ၵိုတ်းယူႇ ငိုၼ်းထႆး တင်းမူတ်း 144,671 ဝၢတ်ႇ” ယူႇတီႈ မုၵ်ႉၸုမ်းၸၢဝ်းၶိူဝ်းတႆး ၸိုင်ႈထႆး ပိုၼ်ၽၢဝ်ႇပွင်ႇလႅင်းဝႆႉၼင်ႇၼႆ။

ၼၢင်းထူၺ်းဢိင်ႇ သိုပ်ႇလၢတ်ႈဝႃႈ “ ငိုၼ်းဢၼ်ၵိုတ်းယူတင်းသဵင်ႈၼၼ်ႉ ယွၼ်ႉပိူဝ်ႈသင်လႄႈ ဢမ်ႇပႆႇဢဝ်ၸွႆႈထႅမ်မိူဝ်း တင်းသဵင်ႈၼႆ တေၸၢင်ႈပဵၼ်ၶေႃႈထၢမ်ဝႆႉယူႇ။ မိူဝ်ႈဝၼ်းတီႈ 12/12/2019 ၼၼ်ႉ ႁဝ်းၶႃႈ မုၵ်ႉၸုမ်းၸၢဝ်းၶိူဝ်းတႆး လႄႈ ႁူမ်ႈပႃးပီႈၼွင်ႉတႆးႁဝ်းၶႃႈ ၼႂ်းမိူင်းၵွၵ်ႇလၢႆမူႇလၢႆးၸုမ်း လႆႈဢုပ်ႇၵုမ်တူၵ်းလူင်းလႆႈၸႂ်ၵၼ်ဝႃႈ ငိုၼ်းဢၼ်ၵိုတ်းၼႆႉ တေ ဢဝ်ဝႆႉပဵၼ် ငိုၼ်းတိုၼ်းတႃႇၵမ်ႉၸွႆႈထႅမ်ပီႈၼွင်ႉထူပ်းၽေး ၼႂ်းမိူင်းတႆးႁဝ်း ႁႂ်ႈပေႃးၶိုတ်းတၼ်း မိူဝ်ႈၽွင်းမီးၽေး မိူၼ် ၼင်ႇ ၽေးပၢင်တိုၵ်း၊ ၽေးၾိင်ႈသၽႃႇဝ ၸဵမ်ၸိူဝ်းၼႆႉ။ ယွၼ်ႉပိူဝ်ႈၼၼ် ႁဝ်းၶႃႈ ၸင်ႇဢွၼ်ၵၼ်မၵ်းမၼ်ႈ တၢင်ႇၸိုဝ်ႈ ငိုၼ်းဢၼ်ၵိုတ်းလိူဝ်ဝႆႉၼၼ်ႉဝႃႈ “ ငိုၼ်းတိုၼ်းၵမ်ႉၸွႆႈ ပီႈၼွင်ႉထူပ်းၽေး ၼႂ်းမိူင်းတႆး ပီႈၼွင်ႉတႆးယၢၼ်မိူင်း” ၼႆသေ ႁႂ်ႈပဵၼ်ငိုၼ်းတိုၼ်းၶၢဝ်းယၢဝ်း တႃႇၵမ်ႉၸွႆႈပီႈၼွင်ႉထူပ်းၽေးၼႂ်းမိူင်းတႆးၵႂႃႇ” ဝႃႈၼႆ။

“ၼႂ်းဝၼ်းမိူဝ်းၼႃႈၼၼ်ႉ သင်ဝႃႈ မီးပီႈၼွင်ႉႁဝ်းၶႃႈ ၼႂ်းမိူင်းတႆး လႆႈထူပ်းၽေးၵိုင်ႉၵၢင်ႉ ၵိူတ်ႇၶိုၼ်ႈမႃးၼႆ ႁဝ်းၶႃႈ တေ ဢဝ်ငိုၼ်းဢၼ်ၵိုတ်းယူႇၼႆႉ ၸွႆႈထႅမ်ၵႂႃႇႁႂ်ႈပေႃးၶိုတ်းတၼ်းသေ တေဢမ်ႇပၼ်ငိုၼ်း ဢၼ်ပီႈၼွင်ႉႁဝ်းၶႃႈ ၵမ်ႉထႅမ်မႃး ၼၼ်ႉ ႁူင်ႈႁၢႆၵႂႃႇသေဝၢတ်ႇသေပျႃးၼႆၼၼ်ႉ ႁဝ်းၶႃႈယွၼ်းပွင်ႇလႅင်းထိုင် ပီႈၼွင်ႉႁဝ်းၶႃႈၼင်ႇၼႆ” ၼၢင်းထူၺ်းဢိင်ႇ သပ်းလႅင်းလၢတ်ႈၼႄၵႂႃႇၼင်ႇၼႆ။