ၸုမ်းၾိုၵ်းသွမ်ႉလၢႆးၶႅၼ်ႉတႆး “ၸဝ်ႈၶုၼ်မၢဝ်း” ၼမ်ႉၶမ်း ၸတ်းႁဵတ်းပၢင်ႁူပ်ႉထူပ်းလႄႈ ၵိၼ်ၶဝ်ႈႁူမ်ႈမူႇ လူပ်း/ ဝၢႆးၸဵင် ပီမႂ်ႇတႆး 2114 ၼီႈ တီႈၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ မီးၽူႈၶဝ်ႈႁူမ်ႈပၢင်ပွႆး 200 ပၢႆ။
ဝၼ်းတီႈ 14/12/2019 လုၵ်ႈၸုမ်းၶူးလၢႆးၸဝ်ႈၶုၼ်မၢဝ်း ၸတ်းႁဵတ်းပၢင်ႁူပ်ႉထူပ်း လႄႈ ၵိၼ်ၶဝ်ႈႁူမ်ႈမူႇ ၼႂ်းတိုဝ်ႉတၢင်း ၶူးလၢႆးလူင် လုင်းသြႃႇၵျေႃႇထေး လႆႈပူင်သွၼ်ပၼ်ပၢင်သွၼ်လၢႆးၶႅၼ်ႉလႄႈ ၶွတ်ႇၽွတ်ႈၸုမ်း ၸဝ်ႈၶုၼ်မၢဝ်း တီႈထုင်ႉ မၢဝ်း ၼႂ်းပီ 2019 ၼႆႉ။ ပၢင်ႁူပ်ႉထူပ်း ၵိၼ်ၶဝ်ႈႁူမ်ႈမူႇၼႆႉ ၸတ်းႁဵတ်းတီႈႁူင်းၵူၼ်းၼုမ်ႇ ဝတ်ႉ/ၵျွင်းၼွင်မႃႉလူင် ၸႄႈ ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။
ၸၢႆးဢွၼ်ႇပိုၼ်းတႆး လုၵ်ႈၸုမ်းၸဝ်ႈၶုၼ်မၢဝ်း ၽူႈပွင်ၵၢၼ် လၢတ်ႈတီႈၽူႈတွႆႇႁွၵ်ႈဝႃႈ “ ၶူးလၢႆးလူင် လုင်းသြႃႇၵျေႃႇထေး ႁဝ်း မီးယိူင်းဢၢၼ်း ပူၵ်းပွင်ၼမ်ႉၵတ်ႉၵူၼ်းၼုမ်ႇၼေႃႇတႅၼ်းၶိူဝ်း တႃႇပိုၼ်ၽႄႈၾိင်ႈငႄႈလၢႆးၶႅၼ်ႉတႆး လႆႈၼမ်၊ ၾိုၵ်းလႄႈၶႅၼ်ႉ လႅၼ်ႈလႄႈၸိူင်း ပေႃးပဵၼ်တႆးလူဝ်ႇမေႃလၢႆးၵူႈၵေႃႉ။ ၼင်ႇႁိုဝ် ၵူၼ်းၼုမ်ႇတႆးႁဝ်း တေၸၢင်ႈမေႃၵၢင်း ယၢၼ်လႆႈၽေးယႃႈမဝ်းၵမ်သေ ၸင်ႇလႆႈၸတ်းႁဵတ်းၶွတ်ႇၽွတ်ႈတင်ႈၸုမ်းၸဝ်ႈၶုၼ်မၢဝ်း ၼႂ်းထုင်ႉမၢဝ်းႁဝ်းမႃးၶႃႈ ယဝ်ႉ။ ယဝ်ႉၵေႃႈ ယိၼ်းၸူမ်းၶွပ်ႈၸႂ်ထိုင် ၽူႈမီးၼမ်ႉၸႂ် ၸဝ်ႈတႃႇၼ ပၼ်ဢွင်ႈတီႈပၢင်ပွႆးလႄႈ ပၢင်လဵၼ်ႈမၢၵ်ႇၼင် ၸိူဝ်းၼႆႉၶႃႈ” ဝႃႈၼႆ။
လိူဝ်ၼၼ်ႉ ၼႂ်းပၢင်ႁူပ်ႉထူပ်းလႄႈ ၵိၼ်ၶဝ်ႈႁူမ်ႈမူႇၵၼ်ၼၼ်ႉ ၸတ်းႁဵတ်းပႃးပၢင်ဢုပ်ႇၶႆႈ ၵဵဝ်ႇလူၺ်ႈလွင်ႈၶွတ်ႇၽွတ်ႈ တင်ႈၸုမ်း ၸဝ်ႈၶုၼ်မၢဝ်းလႄႈ လွင်ႈလၢႆးၶႅၼ်ႉတႆး ၸိူဝ်းၼႆႉ။ ၽူႈမႃးဢုပ်ႇၶႆႈၼႄသမ်ႉ ႁူဝ်ပဝ်ႈ ၼႂ်းဝၢၼ်ႈၼွင်မႃႉလူင် ၸၢႆးၸၢမ်ႇ သူဝ်း၊ လုင်းသြႃႇမၢဝ်းၶမ်း၊ ၶူးလၢႆးသြႃႇသၢင်ႇဢုင်း၊ ၸၢႆးတုမ်ႇၶၢဝ်လႄႈ ၶူးလၢႆးလူင် လုင်းသြႃႇၵျေႃႇထေး ၸဵမ် ၸိူဝ်းၼႆႉ။
မီးပႃးပၢင်မူၼ်ႈသိူဝ်းႁွင်ႉၽဵင်းၵႂၢမ်း၊ တၢင်းၵႃႈလၢႆး ၶႅၼ်ႉတႆး ပိုၼ်ႉထၢၼ် (108) လွၵ်း။ ပၢင်လဵၼ်ႈမၢၵ်ႇၼင်၊ မီးလုၵ်ႈၸုမ်း ၸဝ်ႈၶုၼ်မၢဝ်း ၼမ်ႉၶမ်း၊ မူႇ ၸေႊ၊ ဝၢၼ်ႈၼွင်မႃႉတႃ ၶဝ်ႈႁူမ်ႈမိုတ်ႈၵိုဝ်းၸမ်ၸႂ်ၵၼ်သေ ၵိၼ်ၶဝ်ႈႁူမ်ႈမူႇလူပ်းၸဵင်ၵႂႃႇ ဝႃႈၼႆ။
ၸၢႆးဢွၼ်ႇပိုၼ်းတႆး သိုပ်ႇလၢတ်ႈဝႃႈ “ ယူႇတီႈၶူးလၢႆး လုင်းသြႃႇၵျေႃႇထေးႁဝ်း လႆႈၵႂႃႇတႄႇပိုတ်ႇပၢင်သွၼ် လၢႆးၶႅၼ်ႉတႆး ထႅင်ႈ တီႈဝၢၼ်ႈၼွင်မႃႉတႃ ၸႄႈဝဵင်းၼမ်ႉၶမ်း တႄႇဢဝ် ဝၼ်းတီႈ 30/11/2019 တေႃႇထိုင် 31/12/2019 တင်းမူတ်းမီး လုၵ်ႈႁဵၼ်း 107 ၵေႃႉ၊ ငဝ်းၶၢမ်ႇပိုၼ်ႉ ဢၼ်ပူင်သွၼ် လၢႆးၶႅၼ်ႉ 108 လွၵ်း။ ယူႇတီႈ လုင်းသြႃႇၵျေႃႇထေးႁဝ်း လႆႈပူင်သွၼ် ပၼ်ၼႂ်းပီ 2019 ၼႆႉ လုၵ်ႈၸုမ်းၸဝ်ႈၶုၼ်မၢဝ်း တီႈထုင်ႉမၢဝ်း မိူၼ်ၼင်ႇ ၼမ်ႉၶမ်း၊ မူႇၸေႊ၊ ဝၢၼ်ႈၼွင်မႃႉတႃ ၸိူဝ်းၼႆႉ ႁူမ်ႈၵၼ်တင်းမူတ်းမီး 300 ပၢႆယဝ်ႉ” ဝႃႈၼႆ။
