Friday, March 29, 2024

ပလိၵ်ႈၽဵဝ်ႈသူၼ်ယႃႈယူႇသေတႃႉ ၼႂ်းၸႄႈတွၼ်ႈတူၼ်ႈတီး သူၼ်ယႃႈဢမ်ႇလူတ်းယွမ်း

Must read

ၵူၼ်းပိုၼ်ႉတီႈ ၸႄႈတွၼ်ႈတူၼ်ႈတီးဝႃႈ ပလိၵ်ႈ တီႇၽဵဝ်ႈသူၼ်ယႃႈၾိၼ်ႇ ၵူႈပီယူႇသေတႃႉ ပႆႇႁၼ်သူၼ်ယႃႈလူတ်း ယွမ်းသင် ဝႃႈၼႆ။

Photo by – CCDAC Myanmar/ ပလိၵ်ႈတီႇၽဵဝ်ႈသူၼ်ယႃႈၾိၼ်ႇ ၼႂ်းၸႄႈတွၼ်ႈတူၼ်ႈတီး

တႄႇဢဝ် 29 လိူၼ်ၼူဝ်ႊဝႅမ်ႊၿိူဝ်ႊ ထိုင် 12 လိူၼ်ၻီႊသႅမ်ႊၿိူဝ်ႊ 2019 ၼႆႉ ပလိၵ်ႈၾၢႆႇၽဵဝ်ႈမူၺ်ႉ ယႃႈမဝ်းၵမ် ပိုၼ် ၽၢဝ်ႇဢွၵ်ႇဝႃႈ ပလိၵ်ႈဢွၼ်ၵၼ်တီႇၽဵဝ်ႈသူၼ်ယႃႈၾိၼ်ႇ ၼႂ်းၸႄႈတွၼ်ႈတူၼ်ႈတီး ၸိုင်ႈတႆးပွတ်း ၸၢၼ်း တင်းမူတ်း ၽဵဝ်ႈၵႂႃႇယဝ်ႉ 1,100 ဢေႊၶိူဝ်ႊပၢႆ ဝႃႈၼႆ။

- Subscription -

ၸၢႆးပႃႉ ၵူၼ်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ “ လႆႈႁၼ်ပလိၵ်ႈၶဝ် တီႇၽဵဝ်ႈသူၼ်ယႃႈၾိၼ်ႇမႃးၵူႈပီ ၵူၺ်းၵႃႈ ဢမ်ႇ တွၼ်ႉႁၼ်လူတ်းယွမ်းသင်မႃး” ဝႃႈၼႆ။

ႁွင်ႈၵၢၼ်ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဢွၵ်ႇဝႆႉဝႃႈ “ သူၼ်ယႃႈဢၼ်လႆႈတီႇၽဵဝ်ႈပႅတ်ႈယဝ်ႉ ၼႂ်းၸႄႈဝဵင်း ပၢင်လွင်း 817.5 ဢေႊၶိူဝ်ႊလႄႈ ၸႄႈဝဵင်းၾၢႆၶုၼ်သမ်ႉ 357 ဢေႊၶိူဝ်ႊ ၵွပ်ႈၼႆ ၼႂ်းၸႄႈတွၼ်ႈတူၼ်ႈတီး ဢၼ်လႆႈတီႇ ၽဵဝ်ႈသူၼ်ယႃႈၾိၼ်ႇၼႆႉ တင်းမူတ်း 1,169 ဢေႊၶိူဝ်ႊယဝ်ႉ ဝႃႈၼႆ။

ၸၢႆးပႃႉ သိုပ်ႇလၢတ်ႈဝႃႈ “ ပေႃးထိုင်မႃးၶၢဝ်းၼႆႉ ပလိၵ်ႈၶဝ် ၵႂႃႇတီႇၽဵဝ်ႈသူၼ်ယႃႈၵူႈပီ။ ၵူၼ်းဢၼ်ၽုၵ်ႇၵေႃႈ တိုၵ်ႉ ၽုၵ်ႇယူႇ။ သင်ဝႃႈ ၽုၵ်ႇမၢၵ်ႇၶဝ်ႈတဝ်ႈၼမ်ႉသမ်ႉ ဢမ်ႇမီးလွၵ်းၵၢတ်ႇဢွင်ႈတီႈၶၢႆသေ လွင်ႈသဵၼ်ႈတႃႈသၢႆတၢင်းၵေႃႈ ဢမ်ႇႁဵတ်းသၢင်ႈပၼ် ၵႂႃႇမႃးလႆႈလီ။ ယွၼ်ႉၼၼ်ႉ ၸင်ႇဝႃႈ ၵၢၼ်ၽုၵ်ႇသူၼ်ယႃႈၾိၼ်ႇၼႆႉ တိုၵ်ႉသိုပ်ႇမီးယူႇၼၼ်ႉ ယဝ်ႉ”ဝႃႈၼႆ။

တေႃႈလဵဝ်ၼႆႉ ၼႂ်းမိူင်းတႆး ဢၼ်ၽုၵ်ႇသွမ်ႈယႃႈၼမ်လိူဝ်တီႈသုတ်း ပဵၼ်ၼႂ်းၸႄႈဝဵင်းပၢင်လွင်း ဝႃႈၼႆ။

တွၼ်ႈတႃႇၼႂ်းမိူင်းႁူမ်ႈတုမ် ၸႄႈမိူင်းဢၼ်ၽုၵ်ႇသွမ်ႈသူၼ်ယႃႈၾိၼ်ႇ ပေႃးတေမူၺ်ႉႁၢႆၵႂႃႇၼၼ်ႉ ယူႇတီႈ UNODC မီးၶူင်းၵၢၼ်တႃႇတေၽုၵ်ႇသွမ်ႈတႅၼ်းတၢင်သူၼ်ယႃႈ ဝႃႈၼႆ။

ၼႂ်းၸႄႈမိူင်း ဢၼ်ၽုၵ်ႇသူၼ်ယႃႈၾိၼ်ႇဝႆႉသမ်ႉ မိူၼ်ၼင်ႇ ၸႄႈမိူင်းၶၢင်၊ ၶျၢင်း၊ ယၢင်းၽိူၵ်ႇလႄႈ ၸႄႈမိူင်းတႆး ၸိူဝ်းၼႆႉ ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း