ၶူဝ်ၼမ်ႉတူင်း ဢၼ်ၵၢႆႇၼႂ်းၵႄႈ လႃႈသဵဝ်ႈ – မိူင်းယႆၼၼ်ႉ ၵူၼ်ႇပင်းလူင်းၽၢၵ်ႇၼိုင်ႈ ၵႃးလမ်းၼိုင်ႈပိၼ်ႈၶမ်ၶူဝ် မီးၵူၼ်းမၢတ်ႇၸဵပ်း။
မိူဝ်ႈၼႆႉ ဝၼ်းတီႈ 12/12/2019 ယၢမ်းၵၢင်ဝၼ်း ၶူဝ်ၼမ်ႉတူင်း ဢၼ်မီးၼႂ်းၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈ တႆးပွတ်းႁွင်ႇၼၼ်ႉ ၵူၼ်ႇပင်းၵႂႃႇၶိုင်ႈၼိုင်ႈလႄႈ ၵႃးလမ်းၼိုင်ႈၵေႃႈ ၶမ်ဝႆႉ ၵူၼ်းလႆႈမၢတ်ႇၸဵပ်းၸွမ်း 2 ၵေႃႉ ဝႃႈၼႆ။
ဢူးၺီႇယၢၼ်း ၽူႈၼင်ႈလုမ်းၵပ်းသၢၼ်တပ်ႉသိုၵ်းဝႃႉ တီႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ လိၼ်ၵူၼ်ႇပင်းၶႃႈ ဢေႃႈ။ ၵႃးလမ်းၼိုင်ႈလႆႈပိၼ်ႈၸွမ်း ၵူၺ်းၵႃႈဢမ်ႇတူၵ်းလူင်းၵႂႃႇၼႂ်းၼမ်ႉ။ မီးၵူၼ်းလႆႈမၢတ်ႇၸဵပ်းၸွမ်း 2 ၵေႃႉ။ ဢမ်ႇ မၢတ်ႇၸဵပ်းႁၢဝ်ႈႁႅင်း ၵႃႈႁိုဝ်” ဝႃႈၼႆ။
ၸၢႆးၶမ်း ၸဝ်ႈၵႃး ဢၼ်လႅၼ်ႈတၢင်း လႃႈသဵဝ်ႈ – မိူင်းယႆ – တၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “လႆႈငိၼ်းဝႃႈ ယွၼ်ႉၵႃး တၢင်ႇၶူဝ်း ၼၵ်းလႄႈ လိၼ်တၢင်းတႂ်ႈမၼ်းဢမ်ႇႁပ်ႉၶၢမ်ႇလႆႈသေ လႆႈၵူၼ်ႇပင်းၼႆဝႃႇ။ ယူႇတီႈၶႃႈႁဝ်းထၢင်ႇတႄႉ ပဵၼ်ယွၼ်ႉၵၢၼ် ၵေႃႇ သၢင်ႈၶူဝ်ၼၼ်ႉ ဢမ်ႇၵႅၼ်ႇၶႅင်လႄႈ ရူတ်ႉၵႃးၵႂႃႇမႃးၵေႃႈ ဢမ်ႇပေႃးမီးလွင်ႈလွတ်ႈၽေး ယၢမ်းလဵဝ်ၵေႃႈ ၵႃးဢွၼ်ႇ တႄႉ ၵႂႃႇမႃးယူႇ။ သဵၼ်ႈတၢင်းၵေႃႈ ဢမ်ႇဢိုတ်း” ဝႃႈၼႆ။
သဵၼ်ႈတၢင်းလႄႈၶူဝ် ဢၼ်ၵၢႆႇၸူးၵၼ် တင်း မိူင်းယႆ – လႃႈသဵဝ်ႈၼၼ်ႉ တုၵ်းယွၼ်းႁႂ်ႈ လူင်ပွင်ၸိုင်ႈ ၶိုၼ်းမႄးၵေႃႇ ၵုမ်းသၢင်ႈႁႂ်ႈၵႅၼ်ႇၶႅင်မၼ်ႈၵိုမ်းသေၵမ်း ၸဝ်ႈၵႃး ဢၼ်လႅၼ်ႈတၢင်းပွတ်းတွၼ်ႈၼၼ်ႉ လႄႈၵူၼ်းမိူင်း တုၵ်းယွၼ်း လၢတ်ႈၼႄၼင်ႇၼႆ။
