ၽူႈၸၢႆး 2 ၵေႃႉ ပဵၼ်ၵူၼ်းမိူင်းၼမ်ႉသၼ်ႇ ယဵပ်ႇၺႃးမၢၵ်ႇမႅင်းၾင်လိၼ် လူႉတၢႆထင်တီႈၵေႃႉၼိုင်ႈ၊ မၢတ်ႇၸဵပ်းၵေႃႉ ၼိုင်ႈ။
ဝၼ်းတီႈ 11/12/2019 ယၢမ်းၵၢင်ဝၼ်းမွၵ်ႈ 12 မူင်း ၵူၼ်းဝၢၼ်ႈပၢင်ၼိမ်း ၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ ယွၼ်ႉၼမ်ႉဢမ်ႇမႃးသေ တေၵႂႃႇၶႆႈႁူဝ်ၼမ်ႉ တႃႇမႃးၵိၼ်ၸႂ်ႉ ၽုၵ်ႇသွမ်ႈၼၼ်ႉ ၸၢႆးၼၼ်ႇတႃႇ ဢႃယု 23 ပီ လႄႈ ဢူးမျႃႉၸေႃး ဢႃယု 56 ပီ ယဵပ်ႇၺႃးမၢၵ်ႇမႅင်းၾင် လိၼ် တၢႆထင်တီႈ 1 ၵေႃႉ မၢတ်ႇၸဵပ်း 1 ၵေႃႉ။
မၢႆးဢပမ်း ၸုမ်းၸွႆႈထႅမ်တူင်ႇဝူင်းၵူၼ်း ဢိုမ်းတမၢဝ်း လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမိူင်းဢၼ်ယဵပ်ႇၺႃးမၢၵ်ႇသေ လူႉ တၢႆလႄႈ မၢတ်ႇၸဵပ်းတႄႉ ဢမ်ႇပေႃးပဵၼ်ႁႅင်းၵႃႈႁိုဝ်။ ၵေႃႉဢၼ်လႆႈတၢႆၵႂႃႇၼၼ်ႉတႄႉ ယွၼ်ႉတူၵ်းၸႂ်ႁႅင်းၼႃႇလႄႈ လူႉ တၢႆ။ ဢူးမျႃႉၸေႃးတႄႉ တိူဝ်ႉၺႃးၸွမ်းၼႃႈဢူၵ်းလႄႈ ၶႃၸိူဝ်းၼႆႉ ၵူၺ်းလႄႈ ဢမ်ႇပေႃးလႆႈမႆႈၸႂ် လႆႈပေႃႉထၢတ်ႈမၢၼ်ႇ ၵူၺ်း” ဝႃႈၼႆ။
ဢူးမျႃႉၸေႃး ဢႃယု 56 ပီတႄႉ လႆႈသူင်ႇၶဝ်ႈယူတ်းယႃတူဝ် တီႈႁူင်းယႃလူင် ၵျွၵ်ႉမႄး မိူဝ်ႈဝႃး ယၢမ်းၵၢင်ၶမ်ႈ 7:30 မူင်း။
မၢႆးဢပမ်း လၢတ်ႈဝႃႈ “ မၢၵ်ႇမႅင်းဢၼ်ၵူၼ်းမိူင်းယဵပ်ႇၺႃးၼႆႉ ၾင်ယူႇဝႆႉၸွမ်းႁိမ်းဝၢၼ်ႈၵူၺ်း။ လွင်ႈၵူၼ်းဝၢၼ်ႈယဵပ်ႇ ၺႃးမၢၵ်ႇမႅင်းၼႆႉ ၶႂ်ႈဝႃႈ မီးယူႇ ၵူႈဝၼ်းၶႃႈယဝ်ႉ” ဝႃႈၼႆ။
လုင်းလႃႉ ၵူၼ်းမိူင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ၼႃႈလိၼ်သိုၵ်းၼႆႉ ဢမ်ႇမီးလွင်ႈလွတ်ႈၽေး။ သင်ပဵၼ်လႆႈ ဢွင်ႈတီႈပဵၼ်ပၢင်တိုၵ်းၵၼ်ၸိူဝ်းၼၼ်ႉ ဢမ်ႇလူဝ်ႇၾင်မၢၵ်ႇမႅင်းတေႃႇၵၼ်ၼႆ တေလီ ၶႃႈဢေႃႈ။ သင်ဢမ်ႇပဵၼ်ပၢင် တိုၵ်းၵေႃႈ လွင်ႈမၢၵ်ႇမႅင်းၼႆႉ ႁဝ်းၶႃႈ ၵူၼ်းမိူင်းတိုၵ်ႉလႆႈၵူဝ်ႁႄယူႇ၊ ယဵပ်ႇၺႃး ၽႃႇၺႃးယူႇၵူႈဝၼ်း” ဝႃႈၼႆ။
ၼႂ်းပီၼႆႉၵူၼ်းမိူင်း ၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ ၵႆႉယဵပ်ႇၺႃးမၢၵ်ႇမႅင်းၾင်လိၼ် ၶႂ်ႈဝႃႈ ႁၢႆႉၸႃႉလိူဝ်မႃးၵူႈပွၵ်ႈ ပေႃး ၼပ်ႉသွၼ်ႇတူၺ်း ၽတ်ႉၽဵင်ႇၵၼ်ၸိုင် ၵူၼ်းမိူင်းယဵပ်ႇၺႃးမၢၵ်ႇၼိုင်ႈဝၼ်းလႂ် ၼိုင်ႈၵေႃႉ။ ၸုမ်းၸွႆႈ ထႅမ်တူင်ႇဝူင်းၵူၼ်း ၸႄႈဝဵင်းၵျွၵ်ႉမႄး လၢတ်ႈၼႄၼင်ႇၼႆ။
လိူဝ်ၼၼ်ႉ ၼႂ်းၸႄႈဝဵင်းၵျွၵ်ႉမႄးတင်း သီႇပေႃႉၼႆႉ ပဵၼ်ဢွင်ႈတီႈ ၸုမ်းယိပ်းၵွင်ႈၵၢင်ႇ တူင်ႉၼိုင်ၵႂႃႇမႃး မိူၼ်ၼင်ႇ တပ်ႉ သိုၵ်းလူင်ပွင်ၸိုင်ႈမၢၼ်ႈလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းၼႆႉသေ လွင်ႈႁၢင်ႈၵၢင်မၢၵ်ႇမႅင်းၵေႃႈၼမ် ဝႃႈၼႆ။
ပူၼ်ႉမႃး ဝၼ်းတီႈ 6/12/2019 ၼၼ်ႉၵေႃႈ ၵူၼ်းဝၢၼ်ႈၶုမ်ႇငိုၼ်း ၸႄႈဝဵင်းၵျွၵ်ႉမႄး 2 ၵေႃႉ ၵႂႃႇသူၼ်ၼဵင်ႈသေ ယဵပ်ႇၺႃး မၢၵ်ႇမႅင်းၾင်လိၼ် လႆႈမၢတ်ႇၸဵပ်းႁၢဝ်ႈႁႅင်း လႆႈတေႃႉသူင်ႇႁူင်းယႃ ဝဵင်းလိူဝ်ႇ ဝႃႈၼႆ။
