ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းတီႉလႆႈၶိူင်ႈတူမ်ႈႁုင်ယႃႈမဝ်းၵမ် တႃႇၶၼ်ငိုၼ်း 2,430 သႅၼ် ၸဝ်ႈၶွင် ပၢႆႈလွတ်ႈ ဝႆႉ ၼႂ်းၸႄႈဝဵင်းၼွင်ၶဵဝ်။

ဝၼ်းတီႈ 10/12/2019 ယၢမ်းၵၢင်ၶမ်ႈ ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၵူတ်ႇထတ်းတီႉလႆႈ ၶိူင်ႈတူမ်ႈယႃႈၼႂ်းၵႃးလူင် 18 လေႃႉလမ်း ၼိုင်ႈ ဢၼ်ၵိုတ်းဝႆႉႁိမ်းၶၢင်ႈတၢင်း ၼိူဝ်သဵၼ်ႈတၢင်း ၼွင်ၶဵဝ် – ဝဵင်းလိူဝ်ႇ ၼႂ်းၸႄႈဝဵင်းၼွင်ၶဵဝ် ၸိုင်ႈတႆး ပွတ်းႁွင်ႇ။ တီႉလႆႈၶိူင်ႈတူမ်ႈႁုင်ယႃႈမဝ်းၵမ် (ၼမ်ႉဢႅတ်ႉသိတ်ႉ ႁၢႆၻရူဝ်ႊၵလူဝ်ႊရိတ်ႉ) 16,200 လီႊတႃႊ မႅၼ်ႈငိုၼ်း မၢၼ်ႈယူႇ 2,430 သႅၼ်ပျႃး။

ႁွင်ႈၵၢၼ်ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ပိုၼ်ၽၢဝ်ႇဝႃႈ ၸိုဝ်ႈၵူၼ်းႁေႃႈၵႃး ႁွင်ႉ မွင်ႇသီႇႁႃႉဢွင်ႇ ပဵၼ်ၵူၼ်းတိူင်းပႃႇ ၵိူဝ် ၸႄႈဝဵင်းၵျွၵ်ႉတတႃး၊ တေႃႈလဵဝ် တူဝ်ၵူၼ်းႁေႃႈၵႃးၼၼ်ႉ ပၢႆႈလွတ်ႈဝႆႉ ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈပလိၵ်ႈ လႆႈပိုတ်ႇလိူင်ႈဝႆႉတီႈႁူင်းပလိၵ်ႈၸႄႈဝဵင်းၼွင်ၶဵဝ် ၸွမ်းၼင်ႇပၵ်းပိူင်မၢႆမီႈဝၢၼ်ႈ မိူင်းမီး ၼၼ်ႉ ဝႃႈၼႆ။

ၼွၵ်ႈလိူဝ်ၼၼ်ႉ မိူဝ်ႈဝၼ်းတီႈ 9/12/2019 ယၢမ်းၵၢင်ၶမ်ႈမွၵ်ႈ 8 မူင်းၼၼ်ႉၵေႃႈ ပလိၵ်ႈၾၢႆႇၽဵဝ်ႈယႃႈမဝ်းၵမ် ၵူတ်ႇ ထတ်းတီႉလႆႈ ယႃႈဢႆႊသ် (Ice) ၼမ်ႉၼၵ်း 660 ၵီႊလူဝ်ႊ၊ ၶၼ်ငိုၼ်း 532,800 သႅၼ်ပျႃး တီႈၵႃးလမ်းၼိုင်ႈ ၼႂ်းၸႄႈ ဝဵင်းလၢႆႇ တိူင်းတႃႈၵုင်ႈ။ တေႃႈလဵဝ် လႆႈပိုတ်ႇလိူင်ႈဝႆႉတီႈ ႁူင်းပလိၵ်ႈပတွၵ်ႉၶျွင်း ဝႃႈၼႆ။