ပၢင်တိုၵ်းပႆႇယဵၼ်လႄႈ ၵူၼ်းဝၢၼ်ႈပၢႆႈၶဝ်ႈဝဵင်းၵျွၵ်ႉမႄးထႅင်ႈ

ၵူၼ်းမိူင်း ဢွၼ်ၵၼ်ပၢႆႈၽေးသိုၵ်း ႁွတ်ႈၽႅဝ် တီႈဝဵင်းၵျွၵ်ႉမႄးထႅင်ႈ တေႃႈလဵဝ် ႁူပ်ႉလွင်ႈယၢပ်ႇၽိုတ်ႇ လွင်ႈၶဝ်ႈၼမ်ႉ တၢင်းၵိၼ်လႄႈ ၶူဝ်းၼုင်ႈတၢင်းဝႆၵၼ်။

ဝၼ်းတီႈ 10/12/2019 ယၢမ်းၵၢင်ၶမ်ႈ ၵူၼ်းဝၢၼ်ႈဢုမ်းဢုၺ်း ဢိူင်ႇၵုၼ်ၵေႃႇ ဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉ/ၵျွင်းထမ်မရုင်ႇ ပွၵ်ႉ 8 ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။ ယွၼ်ႉပိူဝ်ႈ သိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်း တဢၢင်း TNLA ၵႆႉတုမ်ႉတိူဝ်ႉၽႃႇၺႃးပဵၼ်ပၢင်တိုၵ်းၵၼ် ဝႃႈၼႆ။

ဢူးတိၼ်ႇမွင်ႇတဵင်း ၸုမ်းၸွႆႈထႅမ်တူင်ႇဝူင်းၵူၼ်း ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်းၶမ်ႈဝႃးၼႆႉ ၵူၼ်း ဝၢၼ်ႈပၢႆႈႁွတ်ႈၽႅဝ်မႃး 43 ၵေႃႉ။ တေႃႈလဵဝ် ဢၼ်လူဝ်ႇတႄႉ ၶဝ်ႈၼမ်ႉတၢင်းၵိၼ်ၶႃႈဢေႃႈ။ လိူဝ်ၼၼ်ႉ ၽႃႈႁူမ်ႇ၊ သိူဝ်ႈ ၼႃဢုၼ်ႇၸိူဝ်းၼႆႉၵေႃႈ လူဝ်ႇၼမ်။ ယွၼ်ႉပိူဝ်ႈဝႃး ၵူၼ်းဝၢၼ်ႈ ဢမ်ႇတၼ်းလႆႈသင် ၼႅတ်ႈဢွၼ်ၵၼ် ပၢႆႈဢွၵ်ႇမႃးၵမ်း လဵဝ်လႄႈ” ဝႃႈၼႆ။

ယွၼ်ႉပိူဝ်ႈဝႃႈ တၢင်းပွတ်းဢိူင်ႇၵုၼ်ၵေႃႇၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်းၼႆႉ ၵႆႉတုမ်ႉတိူဝ်ႉ ၽႃႇၺႃး ပဵၼ်ပၢင်တိုၵ်းၵၼ်ယူႇတႃႇသေႇ ဝႃႈၼႆ။

ၸုမ်းၸွႆႈထႅမ်တူင်ႇဝူင်းၵူၼ်း ဢိုမ်းတမၢဝ်း ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးႁဝ်းၶႃႈတႄႉ ၵႆႉ လႆႈပၢႆႈၸိူင်ႉၼႆ။ တေႃႈလဵဝ် ပၢင်တိုၵ်းၼႆႉ ဢမ်ႇပဵၼ် ယွၼ်ႉဝႃႈ ၵူၼ်းဝၢၼ်ႈၵူဝ်ပဵၼ်ပၢင်တိုၵ်းၵၼ်လႄႈ ဢွၼ်ၵၼ်ငိူင်ႉ ဝႄႈဝႆႉ ဢွၼ်တၢင်း” ဝႃႈၼႆ။

မိူဝ်ႈဝၼ်းတီႈ 7/12/2019 ၼၼ်ႉၵေႃႈ ၵူၼ်းဝၢၼ်ႈၵုၼ်ၵေႃႇ 80 ပၢႆ ဢွၼ်ၵၼ်ပၢႆႈမႃးသွၼ်ႈယူႇဝႆႉၸွမ်းႁိူၼ်းပီႈၼွင်ႉၽႂ် မၼ်း တီႈဝဵင်းၵျွၵ်ႉမႄး ဝႃႈၼႆ။

“ ၵူၼ်းပၢႆႈၽေးသိုၵ်း မၢင်ၵေႃႉ ပၢႆႈၵႂႃႇသွၼ်ႈႁိူၼ်းပီႈၼွင်ႉၽႂ်မၼ်း မီးလွင်ႈယၢပ်ႇၽိုတ်ႇ သင်ဝႃႈ ၵူၼ်းပၢႆႈ ၽေးႁဝ်း ၵႂႃႇ ၶွၼ်ႈတုမ်ၵၼ် တီႈလဵဝ်တႄႉ လီၶႃႈဢေႃႈ” ၸုမ်းၸွႆႈထႅမ်တူင်ႇဝူင်းၵူၼ်း ဢိုမ်းတမၢဝ်း ၸႄႈဝဵင်းၵျွၵ်ႉမႄး လၢတ်ႈၼႄ ၼင်ႇၼႆ။

ၼႂ်းၸႄႈဝဵင်းၵျွၵ်ႉမႄးၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉသိုၵ်းတဢၢင်း TNLA ၼႆႉ တႄႇပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းလိူၼ်ၼူဝ်ႊဝႅမ်ႊၿိူဝ်ႊမႃး ၵူၼ်းမိူင်း 700 ပၢႆလႆႈဢွၼ်ၵၼ်ပၢႆႈၽေးသိုၵ်း။