TYN တေၸတ်းႁဵတ်းပၢင်ႁူပ်ႉထူပ်း ၵူၼ်းၼုမ်ႇတႆး ပတ်းပိုၼ်ႉၸိုင်ႈမိူင်း ပွၵ်ႈၵမ်း 4 တီႈၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။

တႄႇဢဝ်ဝၼ်းတီႈ 27-29/12/2019 တႃႇၶၢဝ်းတၢင်း 3 ဝၼ်း ၵေႃႁူမ်ႈသၢင်ႈၵူၼ်းၼုမ်ႇတႆး Tai Youth Network (TYN) တေၸတ်းႁဵတ်းပၢင်ႁူပ်ႉထူပ်းၵူၼ်းၼုမ်ႇတႆး ပတ်းပိုၼ်ႉၸိုင်ႈမိူင်း ပွၵ်ႈၵမ်း 4 တီႈဝတ်ႉသၢႆလႅင်းမႂ်ႇ ဝၢၼ်ႈတူၼ်ႈ မူင်ႈ ထုင်ႉပူင်း ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

ၸၢႆးၼေႃႇသႅင် ၽူႈပွင်ၵၢၼ် ငဝ်ႈငုၼ်းလႄႈ ၽူႈၶၢၼ်ပၢၵ်ႇ မၢႆ (2) TYN လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ႁဝ်းၶႃႈ တေၸတ်းႁဵတ်း ပၢင်ႁူပ်ႉထူပ်းၵူၼ်းၼုမ်ႇတႆး ပတ်းပိုၼ်ႉၸိုင်ႈမိူင်း တေပဵၼ်ပၢင်ႁူပ်ႉထူပ်းၵၼ် ပွၵ်ႈၵမ်း 4 ၶႃႈ။ ယိူင်း ဢၢၼ်း တႄႉၵေႃႈ မိူၼ်ၵဝ်ႇၵူၺ်းၶႃႈ။ ပွၵ်ႈၼႆႉ ႁဝ်းၶႃႈတေတိူဝ်းမႃး ၵၢၼ်ဢုပ်ႇလွင်ႈၵၢၼ်လူင်းတိုၼ်းၼႂ်းမိူင်းတႆး မိူၼ် BRI ၸိူဝ်း ၼႆႉ မွၵ်ႇလၢတ်ႈၼႄၵူၼ်းၼုမ်ႇႁဝ်း ႁႂ်ႈပေႃးတိူဝ်းႁူႉမႃးလွင်ႈၵၢၼ်လူင်းတိုၼ်း။ ယဝ်ႉၵေႃႈ လႅၵ်ႈလၢႆႈၸုမ်း ပွင်ၵၢၼ် ၵေႃ ႁူမ်ႈသၢင်ႈၵူၼ်းၼုမ်ႇတႆးႁဝ်းၶႃႈထႅင်ႈ ၸိူဝ်းၼႆႉ” ဝႃႈၼႆ။

ၵူၼ်းၼုမ်ႇတႆး ဢၼ်မွၵ်ႇထိုင်မႃးၶဝ်ႈႁူမ်ႈ ပၢင်ႁူပ်ႉထူပ်း ပွၵ်ႈၵမ်း 4 ၼႆႉ တေမွၵ်ႇထိုင် ၼႂ်းမိူင်းတႆး ၵူႈၸႄႈဝဵင်း တၢင်း 3 ပွတ်း။ ၼႂ်းၸႄႈမိူင်းၶၢင်၊ မိူင်းယၢင်းလႅင်၊ မိူင်းယၢင်းၽိူၵ်ႇ၊ တိူင်းမၼ်းတလေး၊ ၸႄႈၵႅင်း၊ ပႃႇၵိူဝ်လႄႈ တႃႈၵုင်ႈ ၸိူဝ်းၼႆႉ။

ဝၢႆးသေၼၼ်ႉ ပေႃးထိုင်မႃး ဝၼ်းတီႈ 30/12/2019 သမ်ႉ တေမီးပၢင်ဢုပ်ႇၶႆႈ/ တၢၼ်ႈၶႆႈၼႄ လွင်ႈပိုၼ်ႉႁူႉလိၵ်ႈလၢႆး ပၢႆးႁၼ် ဝႃႈၼႆ။

ယူႇတီႈ ၵေႃႁူမ်ႈသၢင်ႈၵူၼ်းၼုမ်ႇတႆးၼႆႉ မီးၶေႃႈတႅပ်းတတ်းဝႆႉ 2 ပီၼိုင်ႈပွၵ်ႈ တေၸတ်းႁဵတ်းပၢင်ႁူပ်ႉထူပ်းၵူၼ်းၼုမ်ႇ တႆးလႄႈ လႅၵ်ႈလၢႆႈၽူႈပွင်ၵၢၼ် ၸိူဝ်းၼႆႉ။

ၵေႃႁူမ်ႈသၢင်ႈၵူၼ်းၼုမ်ႇတႆး TYN ၼႆႉ ပိူင်လူင်မၼ်း မီးယိူင်းဢၢၼ်းဝႆႉဝႃႈ ႁႂ်ႈၵူၼ်းၼုမ်ႇတႆး ပတ်းပိုၼ်ႉၸိုင်ႈမိူင်း ၸၢင်ႈ လႆႈၵပ်းသိုပ်ႇမိုတ်ႈၵိုဝ်းႁူႉၸၵ်း ၸမ်ၸႂ် ၶွၼ်ႈႁႅင်းၵၼ်၊ ႁႂ်ႈၸၢင်ႈလႅၵ်ႈလၢႆႈတၢင်းတူဝ်ထူပ်းတႃႁၼ်သေ ၵပ်းသိုပ်ႇၵွင်ႉ သၢၼ်ၵၼ် ၵႂၢင်ႈၶႂၢင်ၶိုၵ်ႉလိုၵ်ႉ ၶိုတ်းတၼ်း ၶၢဝ်းယၢမ်း၊ ႁႂ်ႈၸၢင်ႈႁူမ်ႈသၢင်ႈဝၢင်းၽႅၼ် ၼႃႈၵၢၼ်တူင်ႉၼိုင်ၵႄႈလိတ်ႈ လွင်ႈၶဵင်ႇတႃ တင်းပၼ်ႁႃ ၵူၼ်းၼုမ်ႇ ဝၼ်းမိူဝ်ႈ ၼႆႉ၊ ႁႂ်ႈၸၢင်ႈပူၵ်းပွင် ၽဝၸူဝ်ႈပၢၼ်ၵူၼ်းၼုမ်ႇ တႃႇတိူဝ်းၶိုၼ်ႈယႂ်ႇ မုၼ်းလႅင်း။ ယဝ်ႉၵေႃႈ ႁႂ်ႈၸၢင်ႈၶွတ်ႇၽွတ်ႈ လိူၵ်ႈ တင်ႈၸုမ်းဢွၼ်ႁူဝ်ဢၼ်မႂ်ႇၵႂႃႇ ၸိူဝ်းၼႆႉ။

ပၢင်ႁူပ်ႉထူပ်းၵူၼ်းၼုမ်ႇတႆးၼႆႉ ပွၵ်ႈၵမ်းၼိုင်ႈလႄႈပွၵ်ႈၵမ်းသွင် ၸတ်းႁဵတ်းတီႈဝဵင်းလိူဝ်ႇ၊ ပွၵ်ႈၵမ်းသၢမ် ၸတ်းႁဵတ်း တီႈဝဵင်းတေႃးၵျွႆးဢိၼ်း တိူင်းပႃႇၵိူဝ် လႄႈ ပွၵ်ႈၵမ်း 4 ၼႆႉတႄႉ တေၸတ်းႁဵတ်းတီႈထုင်ႉပူင်း ဝဵင်းတူၼ်ႈတီး။