ပၢင်ဢုပ်ႇဢူဝ်း လွင်ႈၵႅတ်ႇၶႄႁႄႉၵင်ႈ ၶူဝ်းတိုၼ်းသၽႃႇဝ ၾိင်ႈတိုၼ်းပဵၼ် တီႈဝဵင်းလၢႆးၶႃႈ

သင်ၶၸဝ်ႈလႄႈ ၵူၼ်းမိူင်း လၢႆးၶႃႈ မွၵ်ႈ 200 ၵေႃႉ/ၸဝ်ႈ ၸဝ်ႈၶဝ်ႈႁူမ်ႈလဵပ်ႈႁဵၼ်း လွင်ႈလွၵ်းလၢႆးၵႅတ်ႇၶႄႁႄႉၵင်ႈ ၶူဝ်းတိုၼ်း သ ၽႃႇဝ ၾိင်ႈတိုၼ်းပဵၼ် တီႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း။

ဝၼ်းတီႈ 10/12/2019 ယၢမ်းၵၢင်ၼႂ် 10 မူင်းတေႃႇထိုင် 4 မူင်းဝၢႆးဝၼ်း ယူႇတီႈၸုမ်း MATA (မြန်မာနိုင်ငံပွင့်လင်းမြင် သာမှု တာဝန်ယူမှု ဆိုင်ရာအရပ်ဖက်မဟာမိတ်အဖွဲ့) မႃးသပ်းလႅင်းပၼ်တၢင်းႁူႉ ၵဵဝ်ႇၵပ်းလွၵ်းလၢႆး ႁႄႉၵင်ႈ ၵၢၼ်ၶုတ်း ထၢၼ်ႇ ႁိၼ် ၶူဝ်းၶွင်သၽႃႇဝ ၼိူဝ်လိၼ်တႂ်ႈလိၼ် ပေႃးမီးၶွမ်ႊပၼီႊ မႃးၶုတ်းယႃႉၸိုင် ၵူၼ်းမိူင်းတေႁဵတ်းႁိုဝ် ၵႅတ်ႇၶႄ ႁႄႉၵင်ႈ ၸိူဝ်းၼႆႉ။ ပၢင်သပ်းၸႅင်ႈပၼ်တၢင်းႁူႉၼႆႉ ၸတ်းႁဵတ်းတီႈဝတ်ႉၵျွင်းၶမ်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။

ၸဝ်ႈၶူး ၵေႃးသၼ်လ ဝတ်ႉ/ ၵျွင်းပွင် ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈၸုမ်း MATA ၶဝ်မႃးသပ်းလႅင်း လၢတ်ႈၼႄၼႆႉ ၵူၼ်းမိူင်းၸိူဝ်းဢမ်ႇႁူႉပွင်ႇလွင်ႈမၢႆမီႈၸိူဝ်းၼၼ်ႉၵေႃႈ ၶဝ်ႁူႉပွင်ႇလႅင်းၵၼ်မႃး၊ ႁတ်းႁၢၼ်လႄႈ ႁတ်း တေႃႇသူႈပၼ်ႁႃမႃး တေလႆႈၵႂႃႇတိူင်ႇလၢတ်ႈတီႈလႂ် ၸဵမ်ၸိူဝ်းၼႆႉၵေႃႈပွင်ႇလႅင်းမႃး။ ၼွၵ်ႈလိူဝ်ၼၼ်ႉ ယူႇတီႈၸုမ်းၶဝ် မႃး သပ်းလႅင်းၼႄၼႆႉ ၶဝ်ပႃးမႃးၾၢႆႇမၢႆမီႈ (ဉပဒေ) ၸိူဝ်းၼႆႉ” ဝႃႈၼႆ။

မေႃႇထၢၼ်ႇႁိၼ် ဢၼ်ဢွၵ်ႇဝႆႉၼႂ်းၸႄႈဝဵင်းလၢႆးၶႃႈၼႆႉ တင်းမူတ်းတေမီးမွၵ်ႈ 5-6 တီႈ ဝႃႈၼႆ။

ၸဝ်ႈၶူး ၵေႃးသၼ်လ သိုပ်ႇလၢတ်ႈဝႃႈ “ ဢၼ်ၵူၼ်းမိူင်းႁဝ်းၶႃႈႁူပ်ႉထူပ်းႁၢဝ်ႈႁႅင်း လွင်ႈၵၢၼ်ၶုတ်းထၢၼ်ႇႁိၼ်ၼႆႉသမ်ႉ တေပဵၼ်တီႈဝၢၼ်ႈၼမ်ႉလိၼ်း ဢိူင်ႇၼႃးမၢင်း၊ ယဝ်ႉၵေႃႈ ဢၼ်ပၼ်ႁႃတိုၵ်ႉဢၢင်ႈတေၶဝ်ႈမႃးၵေႃႈ တေပဵၼ်တီႈဢိူင်ႇ ဝၢၼ်ႈလိူဝ်ႇ၊ ဢိူင်ႇႁၢႆးသႅင်လႄႈ ဢိူင်ႇထုင်ႉယိူင်း ၸိူဝ်းၼႆႉ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၵူၼ်းဝၢၼ်ႈၼမ်ႉလိၼ်း၊ ဝၢၼ်ႈၼွင်လိူဝ်ႇလႄႈဝၢၼ်ႈမႂ်ႇပၢင်ႇပဵင်း ႁူမ်ႈၵၼ်သေ တုၵ်းယွၼ်း သၢၼ်ၶတ်း ႁႂ်ႈၶွမ်ႊပၼီႊလွႆၶႄႇၼၵႃး ဢၼ်ၶဝ်ႈမႃးၶုတ်းထၢၼ်ႇႁိၼ် တီႈႁိမ်းဝၢၼ်ႈၼမ်ႉလိၼ်း ယၢၼ်ၵႆဝၢၼ်ႈ မွၵ်ႈ 800 ထတ်း(ပေႇ) ဢၼ်မီးတၢင်းၾၢႆႇၸၢၼ်းဝၢၼ်ႈ ၼႂ်းဢိူင်ႇၼႃးမၢင်း ၸႄႈဝဵင်းလၢႆးၶႃႈၼၼ်ႉ ႁႂ်ႈၵိုတ်းယင်ႉလႄႈ ႁႂ်ႈထွၼ်ဢွၵ်ႇ ပၼ်ၼႂ်းပိုၼ်ႉတီႈၽႂ်းၽႂ်း ဝႃႈၼႆ။