ပၢင်ၵုမ်ၸိူဝ်ႉၸၢတ်ႈ တႆးလႅင် ပွၵ်ႈၵမ်း 2 ဢၼ်ဢၢင်ႈတေၸတ်းႁဵတ်း ၼႂ်းပီ 2019 လိူၼ်ၻီႊသႅမ်ႊၿိူဝ်ႊၼႆႉ ဢမ်ႇပဵၼ် ၸတ်းသေ တေၶၢႆႉၵႂႃႇၸတ်းႁဵတ်းၼႂ်းပီ 2020 တေမႃးၼႆႉ။
ဢူးၸေႃးဝိၼ်းထုၼ်း ၶွမ်ႊမတီႊ ပွင်ပဵၼ်ပၢင်ၵုမ် လၢတ်ႈဝႃႈ “ ႁဝ်းၶႃႈ တေၸတ်းႁဵတ်းပၢင်ၵုမ် ၼႂ်းလိူၼ်ၻီႊသႅမ်ႊၿိူဝ်ႊ ၼႆႉ ဢမ်ႇပဵၼ်ယဝ်ႉၶႃႈ။ ႁဝ်းၶႃႈ ႁွင်ႈပၢင်ၵုမ်ၵၼ်သေ လႅပ်ႈတေၶၢႆႉၵႂႃႇၸတ်းႁဵတ်း ၼႂ်းပီ 2020 ဢၼ်တေမႃးၼႆႉ” ဝႃႈၼႆ။
ၵွၼ်ႇတေပဵၼ်မႃးပၢင်ၵုမ်ၸိူဝ်ႉၸၢတ်ႈတႆးလႅင် ပွၵ်ႈၵမ်း 2 ၼႆႉ မိူဝ်ႈဝၼ်းတီႈ 8 လိူၼ်သႅပ်ႊထႅမ်ႊၿိူဝ်ႊ 2019 ၼၼ်ႉ ယူႇ တီႈၶွမ်ႊမတီႊပၢင်ၵုမ်ၸိူဝ်ႉၸၢတ်ႈလႄႈ ၸုမ်းၸႄႈဝဵင်း လႆႈဢုပ်ႇၵုမ်ငူပ်ႉငီႉလႆႈၸႂ်ၵၼ် တီႈတိူၵ်ႈသွၼ်လိၵ်ႈ ၵျွင်းဢွၵ်ႇ ၸႄႈဝဵင်းမိူင်းၵွင် ဝႃႈၼႆ။
ဢူးတိၼ်ႇငူၺ်ႇလေး ၸုမ်းဢွၼ်ႁူဝ် ပၢင်ၵုမ်ၸိူဝ်ႉၸၢတ်ႈတႆးလႅင် လၢတ်ႈဝႃႈ “ တွၼ်ႈတႃႇ တေႁဵတ်းပၢင်ၵုမ်ၼႆႉ။ တေ လႆႈႁႃငိုၼ်းၵွင်ၵၢင်ၶႃႈဢေႃ။ ပေႃးမီးငိုၼ်းၵွင်ၵၢင်ယဝ်ႉ ၸင်ႇတေၸတ်းႁဵတ်းလႆႈၶႃႈဢေႃႈ။ တေႃႈလဵဝ်တႄႉ လႆႈသုတ်ႉ ၶၢႆႉဝၼ်းဝႆႉ။ ၵူၺ်းၵႃႈ တေႁဵတ်းမိူဝ်ႈလႂ် ဢၼ်ဝႃႈၼၼ်ႉ ပႆႇႁူႉ။ ယူႇတီႈငိုၼ်းၵွင်ၵၢင်ထႅင်ႈၵမ်ႉ ၼိုင်ႈၵွၼ်ႇၶႃႈ” ဝႃႈၼႆ။
ပၢင်ၵုမ်ၸိူဝ်ႉၸၢတ်ႈတႆးလႅင် ဢၼ်တေၸတ်းႁဵတ်းပွၵ်ႈၵမ်း 2 ၼႆႉ တေဢုပ်ႇဢူဝ်းၵၼ် ဢၼ်လႆႈၸႂ်တႅပ်းတတ်းဝႆႉ မိူဝ်ႈ ပၢင်ၵုမ် ပွၵ်ႈၵမ်း 1 ၼၼ်ႉ ဝႃႈၼႆ။
ပၢင်ၵုမ်ၸိူဝ်ႉၸၢတ်ႈတႆးလႅင် ပွၵ်ႈၵမ်း 1 ၼၼ်ႉ လႆႈၸတ်းႁဵတ်း မိူဝ်ႈပီ 2016 လိူၼ်မၢတ်ႊၶျ်ႊ တီႈဝဵင်းလိူဝ်ႇ (မၼ်း တလေး) သေ လႆႈၸႂ်ၵၼ်ဝႃႈ တႃႇတုၵ်းယွၼ်းလူင်ပွင်ၸိုင်ႈ ႁႂ်ႈမၵ်းမၼ်ႈပၼ် ၸႄႈမိူင်းတႆးလႅင် ဝႃႈၼႆ။
ၶေႃႈမုလ်း – shannivoice
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ