ၵူၼ်းမိူင်းသႅၼ်ဝီ ဢမ်ႇလႆႈၸႂ် ၼိူဝ်ၵူၼ်းၽၵ်းၵႃႇ မႃးၸႂ်ႉပႃႇႁဵဝ်ႈႁူမ်ႈၸဝ်ႈၾႃႉ

ၼႂ်းပႃႇႁဵဝ်ႈ ၸဝ်ႈၾႃႉမိူင်းသႅၼ်ဝီၼၼ်ႉ မီးၵူၼ်းမိူင်းၽၵ်းၵႃႇ ၵႂႃႇၵေႃႇသၢင်ႈႁဵတ်းဝႆႉ ၶုမ်ၵုတ်း (ပဝ်ႇၽၢင်း) 2 ဢၼ် တႃႇဝႆႉ ၾင်ၵူၼ်းမိူင်းၽၵ်းၵႃႇ 2 ၵေႃႉၼႆလႄႈ ၵူၼ်းမိူင်းသႅၼ်ဝီ ဢမ်ႇလႆႈၸႂ် ဢွၼ်ၵၼ်သၢၼ်ၶတ်း ဝႆႉယွၼ်ႉဢမ်ႇၸႂ်ႈၶိူဝ်းၸဝ်ႈ ၶႆႇသႅင်ၽၼ်းၶမ်း ဝႃႈၼႆ။

ပႃႇႁဵဝ်ႈၸဝ်ႈၾႃႉၼႆႉ မီးဝႆႉၼႂ်းဝၢၼ်ႈၵွင်းႁေႃ(ဝဵင်းၸၢၼ်း) ဢိူင်ႇၵွင်းႁေႃ ၸႄႈဝဵင်းသႅၼ်ဝီ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ။ မီးၶုမ်ၵုတ်းၶိူဝ်းၸဝ်ႈၶိူဝ်းၶုၼ်လွၼ်ႉလွၼ်ႉ။ ဢၼ်ပဵၼ်ၵူၼ်းမိူင်းသေတေမႃးၾင်ၼႂ်းဝၢင်းၼႆႉ ၶဝ်သွင်ၵေႃႉၼႆႉ ပဵၼ်ဢွၼ်တၢင်းသုတ်း။

ၸၢႆးထုၼ်းလူႇ ၵူၼ်းဝၢၼ်ႈၼွင်ဢူၼ် လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈဢၼ်မႃးႁဵတ်းၶုမ်ၵုတ်းၼႆႉတႄႉ ႁဝ်းၶႃႈ ၵူၼ်းမိူင်း ဢမ်ႇလႆႈႁူႉၸွမ်းလွင်ႈသင်သေဢိတ်း။ ၵူၺ်းၵႃႈ ငိၼ်းဝႃႈ တေမႃးၾင်ၽဝ်ႇလုပ်ႇ ၸဝ်ႈၼၢင်းမူဝ်ၶမ်းၼႆလႄႈ မႃးႁဵတ်း။ ဢၼ်မႃးႁဵတ်းၼႆႉ မီးဝႆႉ 3 ၶုမ် ထၢင်ႇဝႃႈ ၼၢင်းၾႃႉၶဝ်ၼွၼ်းၽႄးလၢႆၸဝ်ႈယူဝ်ႉၼႆ။ ၵမ်းၼႆႉ ဢၼ်မႃးဝႆႉတီႈၶုမ်ၼႆႉ 1 ၸဝ်ႈၵူၺ်း။ ၵိုတ်းထႅင်ႈ 2 ၶုမ်ၼၼ်ႉသမ်ႉ လႆႈႁူႉဝၢႆးလင်ဝႃႈ ဝႆႉပၼ်ၵူၼ်းမိူင်းၽၵ်းၵႃႇ 2 ၵေႃႉ ဢၼ်ဢမ်ႇၸႂ်ႈ ၶိူဝ်းၸဝ်ႈ ၾႃႉ လွင်ႈၼႆႉ ႁဝ်းၶႃႈ ဢမ်ႇလႆႈၸႂ်၊ ဢမ်ႇၵိုင်ႇလီပဵၼ် လီမီးၶႃႈ” ဝႃႈၼႆ။

ဢိင်ၼိူဝ်လွင်ႈၼႆႉ ၽူႈတၢင်တူဝ်ၵူၼ်းဝၢၼ်ႈ 4 ဝၢၼ်ႈ ႁူမ်ႈၵၼ်သေ လူင်းလၢႆးမိုဝ်းတႅမ်ႈလိၵ်ႈယိုၼ်ႈထိုင် တီႈလုမ်းသၽႃး ၽူႈတႅၼ်း ၸႄႈဝဵင်းသႅၼ်ဝီဝႆႉ တုၵ်းယွၼ်းႁႂ်ႈၸွႆႈၵႄႈလိတ်ႈပၼ်ႁႃ လွင်ႈၼႆႉ ဝႃႈၼႆ။

ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ၶဵတ်ႇလိူၵ်ႈတင်ႈ မၢႆ 3 ၸႄႈတွၼ်ႈလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵဵဝ်ႇၵပ်းလူၺ်ႈလွင်ႈ ၼႂ်းဝၢင်းပႃႇႁဵဝ်ႈ(သၢင်းၶျႅင်း) ၸဝ်ႈၾႃႉၶုၼ်သၢင်ႇတူၼ်ႈႁုင်း မိူင်းသႅၼ်ဝီၼႆႉ တေႃႈလဵဝ် မီးၵူၼ်းမႃး ႁဵတ်းၵေႃႇၵၢႆႇဝႆႉၶုမ် တႃႇၾင်ၵူၼ်းမိူင်းၽၵ်းၵႃႇ (ၵူၼ်းမိူင်းယူဝ်းယူဝ်း) ၼႆ။ ဢၼ်ၼႆႉ ဢမ်ႇၸႂ်ႈၶိူဝ်းၸဝ်ႈၾႃႉသေ သမ်ႉ တေမႃးၾင်ႁဵတ်းသင်ၼႆ ၵူၼ်းမိူင်းၵမ်ႈၼမ် တူၵ်ႇတၵ်ႉသေ သၢၼ်ၶတ်းမႃး။ ၵူၼ်းမိူင်းၵေႃႈ ဝူၼ်ႉဝႃႈ ႁဵတ်းသင် ၶဝ်သမ်ႉ ဢမ်ႇၸႂ်ႈၶိူဝ်းၸဝ်ႈၾႃႉ သမ်ႉတေမႃးၾင်တီႈၼႆႈ။ ပဵၵ်ႉသမ်ႉဝႃႈ မၼ်းပဵၼ်ၵူၼ်းၵတ်ႉၵူၼ်း ၶႅၼ်ႇႁဵတ်းၵၢၼ်ပၼ်ၵူၼ်း တင်းၼမ်တၢၼ်ႇႁိုဝ်ၵေႃႈလၢႆး ၵွပ်ႈပိူဝ်ႈဢမ်ႇၸႂ်ႈၶိူဝ်းၸဝ်ႈၾႃႉလႄႈ ပေႃးမႃးၾင်တီႈၼႆႈ ၽႂ်ၵေႃႈတေၶႂ်ႈယိူင်ႈသေ ၽႂ်ၵေႃႈ တေၶႂ်ႈမႃးၾင်တီႈၼႆႈ။ ဝၢႆးမႃးတေလေႃးလႄးၵၼ်ၵႂႃႇမူတ်း ၵူဝ်မၼ်းသူၼ်ႈသဵၼ်းသၢၼ်ၵၼ်ၵႂႃႇၼႆ ၵူၼ်းမိူင်းသႅၼ်ဝီ ႁဝ်း ၶႃႈ မႆႈၸႂ်သေ ၸင်ႇသၢၼ်ၶတ်းၶိုၼ်ႈမႃးၶႃႈ” ဝႃႈၼႆ။

သိုပ်ႇလၢတ်ႈဝႃႈ “ ၵမ်ႈၽွင်ႈႁၼ်ထိုင်ဝႃႈ သုၼ်ႇတူဝ်ၵူၼ်းသေၵေႃႉၵေႃႉပၼ်ၶႂၢင်ႉ ႁႂ်ႈမႃးၾင်ၵေႃႈလၢႆး ဢမ်ႇၼၼ်ၵေႃႈ မုၵ်ႉၸုမ်းသေဢၼ်ဢၼ် တႅပ်းတတ်းသေ မႃးၾင်ၵေႃႈယဝ်ႉ။ လွင်ႈၼႆႉ မၼ်းပႆႇသၢင်ႇထုၵ်ႇ ၶဝ်ၵိုင်ႇလီထၢမ်သဵင်ၵၢင်ၸႂ် ၵူၼ်းမိူင်းယူႇ။ ၵွပ်ႈပိူဝ်ႈဝႃႈ မၼ်းပဵၼ်လိၼ်ၸဝ်ႈၾႃႉ၊ လိၼ်ၵိုၵ်းပိုၼ်းမၼ်းၵဵဝ်ႇပေႃႈမႄႈၵူၼ်းမိူင်း မၼ်းဢမ်ႇၵဵဝ်ႇ သုၼ်ႇ တူဝ်ၵူၼ်းၼိုင်ႈၵေႃႉလႄႈ မုၵ်ႉၸုမ်းၼိုင်ႈဢၼ်ၵူၺ်း ၵိုင်ႇလီထွမ်ႇၵၢင်ၸႂ်ၵူၼ်းမိူင်းၼမ်ၼမ်သေ ဢဝ်ၶေႃႈတူၵ်းလူင်း ၵၼ်သေၵွၼ်ႇ ၵူၼ်းမိူင်းၵမ်ႈၽွင်ႈတႄႉ ႁၼ်ထိုင်ၸိူင်ႉၼၼ်ၶႃႈ။ တွၼ်ႈတႃႇႁဝ်းၶႃႈတႄႉ ၸွမ်းၼင်ႇ ပဵၼ်ၽူႈတၢင် တူဝ်ၵူၼ်းမိူင်းလႄႈ ႁဝ်းၶႃႈတႄႉ တေထွမ်ႇသဵင်ၵၢင်ၸႂ်ၵူၼ်းမိူင်း ဢၼ်တၢင်ႇလၢတ်ႈမႃးၼၼ်ႉသေ ႁဝ်းၶႃႈ တေဢွၼ်ၵၼ် ႁႃလၢႆးတၢင်းႁႂ်ႈမၼ်းပေႃးသၢင်ႇထုၵ်ႇ တေႁဵတ်းႁိုဝ် ၵႄႈလိတ်ႈၼႆ ႁဝ်းၶႃႈဝူၼ်ႉ ဝႆႉယူႇၶႃႈ” ဝႃႈၼႆ။

ၶုမ်ၵုတ်း(ပဝ်ႇၽၢင်း) 2 ဢၼ်ၼႆႉ ၵေႃႇၵၢႆႇႁဵတ်းသၢင်ႈဝႆႉ ၼႂ်းဝၢင်းပႃႇႁဵဝ်ႈ ၸဝ်ႈၾႃႉသႅၼ်ဝီၼႆႉ ႁဵတ်းဝႆႉတွၼ်ႈတႃႇ လုင်း ထုၼ်းၽေႇ(ပေႃႈၾႃႉမႄႈမိူင်းၼႂ်းသႅၼ်ဝီ) လႄႈ လုင်းသြႃႇၶမ်းလႅင် (ပဵၼ်ၵူၼ်းမိူင်းၽၵ်းၵႃႇ ပဵၼ်ၼွင်ႉၶူၺ်မေးၸဝ်ႈၾႃႉ ၸဝ်ႈသိူဝ်ႁူမ်ႇ) ဝႃႈၼႆ။

ၸၢႆးမိၼ်ႉထုၼ်း ႁူဝ်ပဝ်ႈ ၵေႃလိၵ်ႈလၢႆး ၸႄႈဝဵင်းသႅၼ်ဝီ လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈဢၼ်ႁဝ်းၶႃႈ ႁဵတ်းဝႆႉ ၶုမ်ၵုတ်း 2 ဢၼ်ၼႆႉ ၼၢင်းၾႃႉ ၸဝ်ႈၼၢင်းမူဝ်ၶမ်းႁဵတ်းလိၵ်ႈလူင်းမႃးပၼ်ႁဝ်းၶႃႈ လုင်းထုၼ်းၽေႇ တင်း လုင်းသြႃႇၶမ်းလႅင်ၼႆႉ ပေႃးၶဝ်ၸဝ်ႈသဵင်ႈၵၢမ်ႇၵႂႃႇၼႆ ႁႂ်ႈဢဝ်ၵႂႃႇဝႆႉၼႂ်းၼၼ်ႉ။ ယဝ်ႉၵေႃႈ ႁဝ်းႁဵတ်းပၢင်ၵုမ်လူင် ၼႂ်းၵေႃလိၵ်ႈလၢႆးႁဝ်းၶႃႈသေ မီး ၶေႃႈ တႅပ်းတတ်းၵၼ်ၶႃႈဢေႃႈ။ တူၵ်းလူင်းၵၼ် မီးၶေႃႈတႅပ်းတတ်း 7 ၶေႃႈသေ ၸင်ႇတေမႃး ႁဵတ်းၶုမ်ၵုတ်းၼႆႉၶႃႈဢေႃႈ” ဝႃႈၼႆ။