ပလိၵ်ႈမၢၼ်ႈ ယိုဝ်းၵႃးၵူၼ်းမိူင်း တီႈၼႂ်းဢိူင်ႇမိူင်းၽူင်း ၸႄႈဝဵင်းတႃႈၶီႈလဵၵ်း လွင်ႈမၢတ်ႇၸဵပ်း လူႉတၢႆ ဢမ်ႇမီး။
ဝၼ်းတီႈ 4/12/2019 ယၢမ်းၵၢင်ၼႂ် မွၵ်ႈ 10 မူင်းၶိုင်ႈၼၼ်ႉ ၼၢင်းဝၼ်းလီ ဢႃယု 40 ပၢႆ ၵႂႃႇလွင်းသွမ်းလူႇတၢၼ်း ပၢင် ဝၢတ်ႈတိုဝ်းၵမ် တီႈဝတ်ႉမိူင်းၽူင်း(ၵ) သေ တေပွၵ်ႈႁိူၼ်းၶိုၼ်း ၺႃးပလိၵ်ႈမၢၼ်ႈ တီႈဝၢၼ်ႈပုင်ႇၼၼ်ႉ ဢဝ်ၵွင်ႈယိုဝ်းသႂ်ႇ တီႈရူတ်ႉၵႃး မၼ်းၼၢင်း ၼႂ်းၵႄႈဝၢၼ်ႈမႂ်ႇသီဝုၼ်းထွင်းလႄႈ ဝၢၼ်ႈၶူင်ႈဝၢၵ်ႈ ဢိူင်ႇမိူင်းၽူင်း(ၵ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်း ဢွၵ်ႇၶူင်း။
ၼၢင်းဝၼ်းလီ ၵေႃႉၺႃးယိုဝ်းၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ဝၢႆးသေၶႃႈႁဝ်း ၵႂႃႇလွင်းသွမ်းလူႇတၢၼ်းတီႈဝတ်ႉသေ တေပွၵ်ႈႁိူၼ်းၼၼ်ႉ ၺႃးပလိၵ်ႈမၢၼ်ႈ မွၵ်ႈ 10 ပၢႆ ပႂ်ႉၼိူဝ်သဵၼ်ႈတၢင်း မိူဝ်ႈၽွင်းၼၼ်ႉ တၢင်းၼႃႈၶႃႈႁဝ်း မီးၵႃးဝႆႉ ထႅင်ႈ 3 လမ်း။ ၵမ်းၼႆႉ ပလိၵ်ႈၵေႃႉၼိုင်ႈ ၼႄမိုဝ်းသေ ၶႃႈထၢင်ႇဝႃႈ ၵႃးတၢင်းၼႃႈၶႃႈၼၼ်ႉ မီးပၼ်ႁႃၼႆသေ ၶႃႈၵေႃႈထွႆၵႃး ပိၼ်ႇႁူဝ်ၵႃးပွၵ်ႈၶိုၼ်း။ မိူဝ်ႈၽွင်း ၶႃႈပိၼ်ႇႁူဝ်ၵႃးၶႃႈလွႆးလွႆးၼၼ်ႉ ပလိၵ်ႈဢၼ်ပႂ်ႉၼိူဝ်တၢင်း ၼၼ်ႉ ဢဝ်ၵွင်ႈယိုဝ်း သႂ်ႇၶႃႈ ၵမ်းလဵဝ်။ ၶႃႈၵူဝ်သေ ၼႅတ်ႈႁေႃႈၵႃးၶဝ်ႈမႃးတီႈဝတ်ႉ ဢၼ်ၶႃႈႁဝ်းၵႂႃႇလူႇတၢၼ်းၼၼ်ႉၶိုၼ်း ၵမ်းလဵဝ်” ဝႃႈၼႆ။
ပလိၵ်ႈမၢၼ်ႈ လမ်းမႃးၸွမ်းလင် ၼၢင်းဝၼ်းလီ ထိုင်ၼႂ်းဝတ်ႉမိူင်းၽူင်း။
ၼၢင်းဝၼ်းလီ သိုပ်ႇလၢတ်ႈဝႃႈ “ ယေးၶဝ်ဝႃႈ ထၢင်ႇပဵၼ်ၵႃးၵူၼ်းၵႃႉယႃႈၼႆသေ ၶဝ်ယိုဝ်းဝႃႈၼႆ။ ၵူၺ်းၵႃႈ ၵူၼ်းဝၢၼ်ႈ၊ သင်ၶၸဝ်ႈၶဝ် ဢၼ်မႃးၶဝ်ႈဝၢတ်ႈၼၼ်ႉ ဢွၼ်ၵၼ်တူၵ်းၸႂ် ။ ၶႃႈႁဝ်းၵေႃႈ တူၵ်းၸႂ်ၶႃႈဢေႃႈ။ ၵတ်ႉၵႃႈယင်းဢမ်ႇမၢတ်ႇၸဵပ်းလူႉတၢႆ” ဝႃႈၼႆ။
ၸၢႆးတၢၼ်း ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈဝႃႈ “ ၼႂ်းဢိူင်ႇမိူင်းၽူင်းႁဝ်းၶႃႈ ၵမ်ႈၼမ်ပဵၼ်ၸၢဝ်းတႆးႁဝ်းၶႃႈယူႇ။ ၶဝ် ဢမ်ႇလႆႈၶႂၢင်ႉယိုဝ်းၸိူင်ႉၼႆ ၶဝ်သမ်ႉယိုဝ်းၼႆ ႁဝ်းၶႃႈတႄႉ တိုၼ်းတေတၢင်ႇၶိုၼ်ႈတၢင်းၼိူဝ်။ ဢၼ်ၶဝ်ယိုဝ်းၼႆႉသမ်ႉပဵၼ်ၶၢဝ်းယၢမ်း 10 မူင်းၵၢင်ၼႂ်။ ႁဝ်းၶႃႈ ဢမ်ႇႁပ်ႉ လႆႈၶႃႈ။ သင်ဝႃႈ ႁဝ်းၶႃႈ ယူႇၼိမ်ၼိမ်ၼႆ ၶဝ်တေပေႉၵိၼ် ႁဝ်းၶႃႈ ၵႂႃႇၵူၺ်း” ဝႃႈၼႆ။
ၵႃးၼၢင်းဝၼ်းလီ ဢၼ်ၺႃးယိုဝ်းသႂ်ႇၼၼ်ႉ တင်းမူတ်းတိူဝ်ႉၺႃး 3 ႁွႆး။ ပလိၵ်ႈဝႃႈ တေမႄးပၼ်၊ တေသၢႆႈတႅၼ်းပၼ် ဢမ်ႇၼၼ် တေသိုဝ်ႉပၼ်ၵႃးလမ်းမႂ်ႇ ဝႃႈၼႆ။
“ ၶဝ်ဝႃႈ တေသၢႆႈတႅၼ်းပၼ်ၶိုၼ်း လွင်ႈလႆႈလူႉသုမ်းၸိူဝ်းၼၼ်ႉ။ လွင်ႈသၢႆႈတႅၼ်းၼၼ်ႉႁဝ်းၶႃႈဢမ်ႇပေႃးၵႃႈႁိုဝ်။ ၶႂ်ႈႁႂ်ႈၶဝ်ယႃႇႁဵတ်းၼႆတေႃႇၵူၼ်းမိူင်းထႅင်ႈၵူၺ်း ” ဝႃႈၼႆ။
ၵဵဝ်ႇလူၺ်ႈ ၵႃးၵူၼ်းမိူင်း ၺႃးယိုဝ်းၼႆႉသေ ၵူၼ်းမိူင်းတေႁဵတ်းလိၵ်ႈ တၢင်ႇထိုင်တီႈၸွမ်ၸိုင်ႈမိူင်းႁူမ်ႈတုမ်ၵႂႃႇၼႆ ၵူၼ်းပိုၼ်ႉ တီႈတႄႉ လၢတ်ႈၼႄၼင်ႇၼႆ။
