ၸုမ်းလုၵ်ႈႁဵၼ်းလႄႈ ၸုမ်းၶူး တေႁူမ်ႈၵၼ် ၸတ်းႁဵတ်းပၢင်ႁႅၼ်းလူႇတၢၼ်းလႄႈ ပၢင်ၶုၵ်းထူပ်း ၶူးၸၢႆးမူး တီႈ ဝတ်ႉၾႃႉ ဝဵင်း ဢိၼ်း လႅၼ်လိၼ်တႆး – ထႆး။

ပေႃးထိုင်မႃး ဝၼ်းတီႈ 31/12/2019 – 01/01/2020 ၸိူဝ်းပဵၼ်ၸုမ်းလုၵ်ႈႁဵၼ်းလႄႈ ၸုမ်းၶူး ႁူင်းႁဵၼ်းၸိူဝ်ႉၸၢတ်ႈ ပၢင်ၵမ်ႉၵေႃႇ ၊ႁူမ်ႈလူၺ်ႈ ပီႈၼွင်ႉဝၢၼ်ႈလၵ်းတႅင်ႇ၊ ဝၢၼ်ႈပဵင်းလူင် ဢိၵ်ႇဢူၺ်းၵေႃႉဢူၺ်းသႄႈ တင်းလုၵ်ႈလၢင်း ၶူးၸၢႆး မူး (မေႃသွၼ်ႁူၺ်ႈၸွႆး) တေႁူမ်ႈၵၼ်ႁႅၼ်းလူႇတၢၼ်းပၼ်ၶူးမူး ၊ ပၢင်ၶုၵ်းထူပ်းၶွပ်ႈၶူပ်ႇ ၶူးၸၢႆးမူး ဢၼ်လႆႈ သဵင်ႈၵၢမ်ႇၵႂႃႇ ၶွပ်ႈၶူပ်ႇ 25 ပီ။ ဢွင်ႈတီႈၸတ်းႁႅၼ်းလူႇတၢၼ်းပၼ်လႄႈ ပၢင်ၶုၵ်းထူပ်းသမ်ႉ တေၸတ်းႁဵတ်းတီႈ ဝတ်ႉ ၾႃႉဝဵင်းဢိၼ်း ဢိူင်ႇပဵင်းလူင် ၸႄႈဝဵင်း ဝဵင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆး (လႅၼ်လိၼ်တႆး – ထႆး) ဝႃႈၼႆ။

မႄႈၶူးႁၢၼ်ၼူၼ်း ၵႅမ်ၽူႈၵွၼ်းႁူင်းႁဵၼ်းၸိူဝ်ႉၸၢတ်ႈ ပၢင်ၵမ်ႉၵေႃႇ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈလုၵ်ႈႁဵၼ်း သေ ႁူမ်ႈၵၼ် တေၸတ်းႁဵတ်းပၢင်ႁႅၼ်းလူႇတၢၼ်းပၼ်ၶူးၸၢႆးမူး လႄႈ ၶူးသွၼ် ၸိူဝ်းဢၼ်လႆႈလူႉ ႁၢႆတၢႆ ၵႂႃႇၸိူဝ်းၼၼ်ႉသေ တေမီးပၢင်လူႇတၢၼ်း ၵၼ်ႇတေႃးၶူး ၵူၼ်းထဝ်ႈၵူၼ်းၵႄႇ။ ယဝ်ႉၵေႃႈ လုၵ်ႈႁဵၼ်းၶဝ် တေမီးပၢင်ႁူပ်ႉထူပ်းၵၼ်၊ ဢုပ်ႇဢူဝ်းၵၼ်၊ ငူပ်ႉငီႉၵၼ် မိူၼ်ၼင်ႇ ၽႂ်မီးတီႈလႂ်၊ ၽႂ်ႁဵတ်းသင်ဝႆႉ၊ ဢၼ်ၶူးၶဝ် ယၢမ်ႈသွၼ် ဝႆႉပၼ်ၸိူင်ႉႁိုဝ်၊ ပူၵ်းပွင်ပၼ်ဝႆႉၸိူင်ႉႁိုဝ် ၸဵမ်ၸိူဝ်းၼႆႉ လုၵ်ႈႁဵၼ်းၶဝ် တေမႃးဢုပ်ႇဢူဝ်းပိၼ်ႇပႆႇၵၼ်ၵႂႃႇ ”ဝႃႈၼႆ။

ယိူင်းဢၢၼ်းတႄႉ မိူဝ်းၼႃႈမႃး ၼင်ႇႁိုဝ်တေမီးလွင်ႈၸမ်ၸႂ်ၵၼ် ၊ ၼင်ႇႁိုဝ်တေၸၢင်ႈၵပ်းသိုပ်ႇ ၵပ်းသၢၼ်ၵၼ်တႃႇ ၸွႆႈထႅမ်ၼႂ်းၵၢၼ်ၵိၼ်လူႇလူႉတၢႆ၊ လိူဝ်ၼၼ်ႉ ၼိုင်ႈပီ ၼိုင်ႈပွၵ်ႈႁႂ်ႈလႆႈၸူႉၶွၼ်ႈတုမ်ၵၼ် ႁူပ်ႉထူပ်းၵၼ်ၵႂႃႇ – ဝႃႈၼႆ။

ၶပ်ႉမၢႆပၢင်ႁႅၼ်းလူႇတၢၼ်းလႄႈ ပၢင်ၶုၵ်းထူပ်းသမ်ႉ ၼႂ်းဝၼ်းတီႈ 31/12/2019 ယၢမ်းၵၢင်ၼႂ် တေထွမ်ႇလိၵ်ႈ ၊ ပၢင် ၶေႉၶႅင်ႇႁွင်ႉၽဵင်းၵႂၢမ်းၸၢႆးမူး၊ ၸၼ်ႁၢင်ႈ/ တႅမ်ႈဝွၵ်း ၵဵဝ်ႇၵပ်းၸၢႆးမူး၊ ၵၢပ်ႈသွမ်းဝၼ်းသင်ၶၸဝ်ႈလႄႈ လဵင်ႉလူပီႈ ၼွင်ႉၶႅၵ်ႇ ၵူၼ်းထဝ်ႈ ၽူႈမႃးၶဝ်ႈႁူမ်ႈ။ ယၢမ်းၵၢင်ၶမ်ႈသမ်ႉ တေမီးပၢင်မူၼ်ႈသိူဝ်းပၢၼ်မႂ်ႇ၊ ဢုပ်ႇၶႆႈၼႄပိုၼ်းလႄႈ လွင်ႈတူင်ႉ ၼိုင်ႁဵတ်းသၢင်ႈၶူးၸၢႆးမူး ယဝ်ႉၵေႃႈ ႁူမ်ႈၵၼ်ႁၢင်ႈႁႅၼ်းႁပ်ႉတွၼ်ႈပီမႂ်ႇလုမ်ႈၾႃႉ 2020 ။

ၶပ်ႉမၢႆ ဝၼ်းတီႈ 1/1/2020 သမ်ႉ ယၢမ်းၵၢင်ၼႂ် ၵၢပ်ႈသွမ်းၼႂ်သင်ၶၸဝ်ႈ၊ ႁူမ်ႈၵၼ်ၵႂႃႇဝၢင်းတူင်ႇမွၵ်ႇတီႈၶုမ်ၵုတ်းၶူး ၸၢႆး မူး၊ ထွမ်ႇလိၵ်ႈထွမ်ႇထမ်း၊ ၵၢပ်ႈသွမ်းဝၼ်းသင်ၶၸဝ်ႈ၊ လဵင်ႉလူၶႅၵ်ႇၽူႈမႃးၶဝ်ႈႁူမ်ႈလႄႈ လူႇတၢၼ်းယၢတ်ႇၼမ်ႉ။ ယၢမ်းဝၢႆးဝၼ်းသမ်ႉ ၸုမ်းလုၵ်ႈႁဵၼ်းဢွၼ်ၵၼ်ၵၼ်ႇတေႃႇၶူး။ ယၢမ်းၵၢင်ၶမ်ႈသမ်ႉမွပ်ႈသူးၵူႈလွင်ႈလွင်ႈ၊ သိုပ်ႇပၢင်မူၼ်ႈ သိူဝ်းပၢၼ်မႂ်ႇ ၸဵမ်ၸိူဝ်းၼႆႉ။

ၶူးၸၢႆးမူး (မေႃသွၼ်ႁူၺ်ႈၸွႆး) ၼႆႉ လႆႈလူႉသဵင်ႈၵၢမ်ႇၵႂႃႇ မိူဝ်ႈဝၼ်းတီႈ 26/12/1994 တီႈႁိူၼ်းယေး ဝၢၼ်ႈလၵ်းတႅင်ႇ ဢိူင်ႇပဵင်းလူင် ၸႄႈဝဵင်း ဝဵင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆး (လႅၼ်လိၼ်တႆး – ထႆး)။ မိူဝ်ႈသဵင်ႈၵၢမ်ႇဢႃယုလႆႈ 34 ပီ။

ပိုၼ်းၵႅပ်ႈၸၢႆးမူး တေပိုၼ်ဢွၵ်ႇပၼ်ပီႈၼွင်ႉ လူႇဢၢၼ်ႇၵၼ် ၼႂ်းဝၼ်းတီႈ 26/12/2019 ဢၼ်တေထိုင်ၼႆႉ။