ၸွမ်ၸိၵ်းသိုၵ်း မိၼ်းဢွင်ႇလၢႆႇ ဢႅဝ်ႇယဵမ်ႈၼႃႈလိၼ်ၽွင်းငမ်းတူဝ်ၵဝ်ႇပဢူဝ်း

ၽူႈၼမ်းၸိၵ်းၸွမ် တပ်ႉသိုၵ်း တပ်ႉမတေႃႇလူင်ပွင်ၸိုင်ႈမၢၼ်ႈ ၸွမ်သိုၵ်းလူင်မိၼ်းဢွင်ႇလၢႆႇ ဢႅဝ်ႇ ယဵမ်ႈပီႈၼွင်ႉ ပဢူဝ်းၼႂ်းၼႃႈလိၼ်ၽွင်းငမ်းတူဝ်ၵဝ်ႇပဢူဝ်း။

ဝၼ်းတီႈ 2 /12/2019 ၸွမ်သိုၵ်းလူင်မိၼ်းဢွင်ႇလၢႆႇ ဢႅဝ်ႇယဵမ်ႈ ၽူႈၼမ်းလႄႈၵူၼ်းမိူင်းပဢူဝ်း တီႈဝၢၼ်ႈၼွင် တယႃး ၸႄႈဝဵင်းပၢင်လွင်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇပဢူဝ်း။

ၾၢႆႇပွင်ႇၶၢဝ်ႇတပ်ႉသိုၵ်းလူင်ပွင်ၸိုင်ႈတႄႉပိုၼ်ၽၢဝ်ႇဝႆႉဝႃႈ ၸွမ်ၸိၵ်းသိုၵ်းမၢၼ်ႈ မႃးဢႅဝ်ႇယဵမ်ႈတူင်ႉတၵ်ႉသေ ဢုပ်ႇၵုမ် လွင်ႈၵၢၼ်ၽုၵ်ႇသွမ်ႈ လွင်ႈၸႂ်ႉလိၼ်ထၢတ်ႈ မေႇဢေႃးၸႃႇ လႄႈယႃႈၶႃႈမႅင်း ၸိူဝ်းၼႆႉ ဝႃႈၼႆ။

လိူဝ်ၼၼ်ႉ ၸွမ်ၸိၵ်းသိုၵ်းလူင် မွၵ်ႇလၢတ်ႈၶေႃႈၵႂၢမ်းၽွင်းႁူပ်ႉထူပ်းၵူၼ်းမိူင်းဝႃႈ – တပ်ႉသိုၵ်းတပ်ႉမတေႃႇၼႆႉ ပဵၼ်တႃႇ ၵႅတ်ႇၶႄၵူၼ်းမိူင်း၊ တႃႇယုၵ်ႉမုၼ်းပၼ်ပၢႆးမၢၵ်ႈမီး ၵၢၼ်ႁႃၵိၼ်လဵင်ႉတွင်ႉၵူၼ်းမိူင်းလႄႈ ယၢမ်းလဵဝ်ၵေႃႈ ယူႇတီႈတပ်ႉ သိုၵ်းတပ်ႉမတေႃႇသေ တေၸွႆႈထႅမ်တႃႇပူၵ်းပွင်ပၢႆးမၢၵ်ႈမီးၵူၼ်းမိူင်း ပဢူဝ်း ဝႃႈၼႆ။

တီႈပၢင်ႁူပ်ႉထူပ်းၵူၼ်းမိူင်းၼၼ်ႉ မၼ်းၸၢႆးလႆႈလၢတ်ႈလွင်ႈ ထၢတ်ႈၾုၼ်ႇမေႇဢေႃးၸႃႇသေဢမ်ႇၵႃး လၢတ်ႈပႃးတႃႇ တေ တင်ႈႁူင်းၵၢၼ်ၼဵင်ႈႁႅင်ႈ ၼႆႇလူးၵွၼ်ႇဝႃႈၼႆ။

ပူၼ်ႉမႃးလိူၼ်ၼူဝ်ႇဝႅမ်ႊၿိူဝ်ႊၼႆႉၵူၺ်း တေႃႇဢွင်ႇသၢၼ်းၸုၵျီႇ ဢၼ်ပဵၼ်ၽူႈၵိူဝ်းၵုမ်ၸိုင်ႈမိူင်းၼၼ်ႉ လႆႈဢႅဝ်ႇယဵမ်ႈ ဢူးဢွင်ႇၶမ်းထီႇ ၽူႈၼမ်းပဢူဝ်း PNO လႄႈ တၢင်ႇထီးထၢတ်ႈထႅင်ႈ။