ပၢင်ၵုမ်သၽႃး ၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 17 တေၸတ်းႁဵတ်း ၼႂ်းၵၢင်လိူၼ်ၻီႊသႅမ်ႊၿိူဝ်ႊ 2019 ၼႆႉ။

ပေႃးထိုင်မႃး ဝၼ်းတီႈ 16/12/2019 ၸိုင် ယူႇတီႈလုမ်းသၽႃးၸႄႈမိူင်းတႆး တေၸတ်းႁဵတ်းပၢင်ၵုမ်သၽႃး ပွၵ်ႈၵမ်း 2 ၵမ်း ထူၼ်ႈ 17 တီႈလုမ်းသၽႃး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

ၼၢင်းၵွင်ၶမ်း ၽူႈတႅၼ်းသၽႃး ၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ပႃႇတီႇႁူဝ်သိူဝ် ၸႄႈဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈ ဝႃႈ “ ၸႂ်ႈၶႃႈ ဢေႃႈ တေပဵၼ်ၼႂ်းၵၢင်လိူၼ်ၼႆႉ။ ဢၼ်လမ်ႇလွင်ႈမၼ်း ဢၼ်ႁဝ်းၶႃႈ လႆႈတၢင်ႇဝႆႉတႄႉ လွင်ႈပၵ်းပိူင်ၾႆး ၾႃႉလႄႈ လွင်ႈ ပၵ်းပိူင်လဵင်ႉလူတူဝ်သတ်း 2 ဢၼ်ၼႆႉၶႃႈ ယူႇတီႈပႃႇတီႇႁဝ်းၶႃႈသေ တၢင်ႇဝႆႉ” ဝႃႈၼႆ။

ပၢင်ၵုမ်သၽႃး ၵမ်းထူၼ်ႈ 16 ၼၼ်ႉ ၸတ်းႁဵတ်း ၼႂ်းဝၼ်းတီႈ 17 ထိုင် 24 လိူၼ်သႅပ်ႊထႅမ်ႊၿိူဝ်ႊ 2019 ၼႂ်းပၢင်ၵုမ် သ ၽႃးၼႆႉ ၽူႈတႅၼ်းသၽႃး 28 ၵေႃႉ လႆႈပိုတ်ႇၵႂၢမ်းထၢမ် 59 ဢၼ် ဝႃႈၼႆ။

ၽူႈတႅၼ်းၸိူဝ်းၶဝ်ႈႁူမ်ႈပၢင်ၵုမ်သၽႃး ၸႄႈမိူင်းတႆး ၼႂ်းပွၵ်ႈၵမ်း 2 ၼႆႉ ပႃႇတီႇသၢင်ႇသီႈ 31 ၵေႃႉ၊ ပႃႇတီႇႁူဝ်သိူဝ် 27 ၵေႃႉ၊ ပႃႇတီႇၼူၵ်ႉယုင်း 24 ၵေႃႉ၊ ပႃႇတီႇတဢၢင်း 7 ၵေႃႉ၊ ပႃႇတီႇပဢူဝ်း 6 ၵေႃႉ၊ ပႃႇတီႇလႃးႁူႇ 2 ၵေႃႉ၊ ပႃႇတီႇဝႃႉ ၻီႊမူဝ်ႊ ၶရေႊတိၵ်ႉ 2 ၵေႃႉ၊ ပႃႇတီႇသိူဝ်ၽိူၵ်ႇ 1 ၵေႃႉ၊ ပႃႇတီႇၵူဝ်းၵၢင်ႉ 1 ၵေႃႉ၊ ပႃႇတီႇၸိူဝ်ႉၸၢတ်ႈၽွမ်ႉႁူမ်ႈဝႃႉ 1 ၵေႃႉ၊ ပႃႇတီႇ ဢႃးၶႃႇ 1 ၵေႃႉ၊ ပႃႇတီႇ လီသူး 1 ၵေႃႉ၊ သုၼ်ႇတူဝ် 1 ၵေႃႉလႄႈ ၽူႈတႅၼ်းတပ်ႉသိုၵ်းလူင်ပွင်ၸိုင်ႈမၢၼ်ႈ 36 ၵေႃႉ မီးၽူႈ တႅၼ်းၶဝ်ႈႁူမ်ႈ တင်း မူတ်း 140 ၵေႃႉ။