ၶၢပ်ႈတူဝ်တၢႆ ၸၢႆးၸၢမ်ႇ ဢၼ်ၺႃးတႅင်းတၢႆ တီႈၵုင်းထဵပ်ႈၼၼ်ႉ ပီႈၼွင်ႉဢူၺ်းၵေႃႉ ဢဝ်ၵႂႃႇလုမ်းလႃး ပူၼ်ႉၶၢပ်ႈတူဝ် တီႈၵဵင်းမႆႇ ၵေႃႉပဵၼ် ပီႈၼၢင်းၸၢႆးၸၢမ်ႇလၢတ်ႈ။

ၼၢင်းၶမ်းလီ ၵေႃႉပဵၼ်ပီႈၼၢင်း ၸၢႆးၸၢမ်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၶၢပ်ႈတူဝ်တၢႆ ၼွင်ႉၸၢႆးၶႃႈႁဝ်းတႄႉ တေဢဝ်မႃး လုမ်းလႃးတီႈၵဵင်းမႆႇ တီႈဝတ်ႉလွင်ႉၶုၼ်ႇ ၸႄႈဝဵင်းလွႆသၵဵတ်းၶႃႈ။ မိူဝ်ႈၼႆႉ ဝၼ်းတီႈ 3/12/2019 တိုၵ်ႉဢဝ်ၶိုၼ်ႈမႃး တၢင်းၵဵင်းမႆႇယူႇၶႃႈ။ ဝႃႈတေပူၼ်ႉၶၢပ်ႈတူဝ် ၼႂ်းဝၼ်းလႂ်ဢၼ်ဝႃႈၼၼ်ႉ ပႆႇႁူႉၶႃႈ။ ၵဵဝ်ႇလူၺ်ႈလွင်ႈၵၢၼ်တၢႆတႄႉ ႁဵတ်းႁိုဝ်လႄႈထိုင်တီႈပေႃး လႆႈၶႃႈႁႅမ်ၵၼ်ၼၼ်ႉတႄႉ ၶႃႈႁဝ်းၵေႃႈ ပႆႇလႆႈႁူႉၶေႃႈမုလ်းမၼ်းလီလီၶႃႈ ႁဵတ်းႁိုဝ်လႄႈ ပဵၼ်ဢၼ်ဝႃႈၼၼ်ႉ” ဝႃႈၼႆ။

ၸၢႆးၸၢမ်ႇ ဢႃယု 19 ပီၼႆႉ ၺႃးၵူၼ်း 2 ၵေႃႉလမ်းတႅင်းမိူဝ်ႈဝၼ်းတီႈ 1/12/2019။ တႅင်းၺႃးၸွမ်းပုမ် ၸွမ်းၼႃႈတႃသေ မၼ်းၸၢႆးလႆႈလူႉတၢႆ ၵႂႃႇၼႂ်းႁၢၼ်ႉၶၢႆၶူဝ်းၶွင် တီႈၼိုင်ႈ တီႈၵုင်းထဵပ်ႈ။

ၸၢႆးၸၢမ်ႇ ဢႃယု 19 ပီၼႆႉ ပဵၼ်လုၵ်ႈၸၢႆး (လုင်းဢုင်း) – ပႃႈဢုင်ႇ၊ မီးပီႈၼွင်ႉႁူမ်ႈတွင်ႉၵၼ် 5 ၵေႃႉ မၼ်းၸၢႆးပဵၼ်ၵေႃႉ ထူၼ်ႈ 3 ယူႇပွၵ်ႉ 2 ၵိင်ႇၸႄႈဝဵင်းၵႃလိ ၸႄႈဝဵင်းၵုၼ်ႁဵင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ဝႃႈၼႆ။