ၶႅၵ်ႇတွင်ႈတဵဝ်း ၵူၼ်းၼွၵ်ႈမိူင်း 2 ၵေႃႉ ယဵပ်ႇၺႃးမၢၵ်ႇမႅင်းၾင်လိၼ် ၼႂ်းၸႄႈဝဵင်းသီႇပေႃႉ တၢႆ 1 မၢတ်ႇ 1 ဝႃႈၼႆ။
ဝၼ်းတီႈ 26/11/2019 ယၢမ်းၵၢင်ၶမ်ႈ 5 မူင်း ၵူၼ်းၼွၵ်ႈမိူင်း ဢႃႊၵျိၼ်ႊၵျိၼ်ႊၼႃႊ 2 ၵေႃႉ လုၵ်ႉဝဵင်းသီႇပေႃႉ ၶီႈရူတ်ႉၶိူင်ႈ ၵႂႃႇတၢင်းဝၢၼ်ႈပၢင်ႇၺွင်ႇ ၵႂႃႇယဵပ်ႇၺႃးမၢၵ်ႇ မႅင်းၾင်လိၼ် ၼႂ်းၵႄႈဝၢၼ်ႈပၢင်ၺွင်ႇလႄႈ ဝၢၼ်ႈၵုၼ်းႁေႃ ၸႄႈဝဵင်းသီႇ ပေႃႉ ၸိုင်ႈတႆးပွတ်းႁွင်ႇ။
ၵူဝ်ႇမဵဝ်း ၸုမ်းၸွႆႈထႅမ် ၵူၼ်းမၢတ်ႇၸဵပ်းလူႉတၢႆ ၸုမ်းၼႄႇၸီးမၶျုး (နယ်စည်းမခြား ပရဟိတ သီပေါ) လၢတ်ႈတီႈၽူႈတွႆႇ ႁွၵ်ႈဝႃႈ “ ၵူၼ်းၼွၵ်ႈ မိူင်း 2 ၵေႃႉၼၼ်ႉ ယဵပ်ႇၺႃးမၢၵ်ႇမႅင်းၾင်လိၼ် ၽူႈၸၢႆးၵေႃႉၼိုင်ႈ လႆႈလူႉတၢႆ၊ ထႅင်ႈၵေႃႉၼိုင်ႈ လႆႈ တိူဝ်ႉမၢတ်ႇၸဵပ်း။ လႆႈ ၼမ်းသူင်ႇၵႂႃႇ တီႈႁူင်းယႃသီႇပေႃႉယဝ်ႉ” ဝႃႈၼႆ။
ဢွင်ႈတီႈ ဢၼ်ၵူၼ်းၼွၵ်ႈမိူင်း 2 ၵေႃႉ ၵႂႃႇယဵပ်ႇၺႃးမၢၵ်ႇၼၼ်ႉ ပဵၼ်ဢွင်ႈတီႈ ဢၼ်ႁၢမ်ႈႁႄႉ မၵ်းတတ်းဢမ်ႇပၼ်ၵူၼ်း ၼွၵ်ႈမိူင်း ၵႂႃႇဢႅဝ်ႇ ဝႃႈၼႆ။
ဢၢႆႈၸၢႆး ၽူႈႁပ်ႉၵူၼ်းတွင်ႈတဵဝ်း/ ၼွၵ်ႈမိူင်း ဢႅဝ်ႇလႄႇ လၢတ်ႈတီႈၽူႈတွႆႇႁွၵ်ႈဝႃႈ “ ဢွင်ႈတီႈၸိူဝ်းၼၼ်ႉ ပဵၼ်ဢွင်ႈတီႈ ႁၢမ်ႈဝႆႉ၊ ဢမ်ႇပၼ်ၽႂ်ၵႂႃႇမႃး ၵူၺ်းၵႃႈ ၵူၼ်းၼွၵ်းမိူင်း ဢၼ်မႃးတွင်ႈ တဵဝ်း ၼႂ်းၸႄႈဝဵင်းသီႇပေႃႉၼႆႉ ၼမ်တႄႉတႄႉ လွင်ႈ ၶဝ်မႃးဢႅဝ်ႇၼႆႉၵေႃႈ ၶဝ်ႁၢင်ႈႁႅၼ်းမႃးႁင်းၵူၺ်းၶဝ် ဢၼ်ၶဝ်ႁွင်ႉ ၵူၼ်းၼမ်းတၢင်း/ ပိၼ်ႇၽႃသႃပၼ်ၶဝ်ၼၼ်ႉ မၼ်းမီး ဢေႇၼႃႇ” ဝႃႈၼႆ။
ႁိမ်းႁွမ်းၼႂ်းၸႄႈဝဵင်းသီႇပေႃႉၼႆႉ ပဵၼ်ဢွင်ႈတီႈပၢင်တိုၵ်းၵၼ်သေ တွၼ်ႈတႃႇၵူၼ်းၼွၵ်ႈမိူင်း ၵႂႃႇဢႅဝ်ႇယဵမ်ႈ/ တွင်ႈတဵဝ်း ၼၼ်ႉ ႁႂ်ႈဢွၼ်ၵၼ်ၾၢင်ႉသတိၵၼ်ၵႂႃႇမႃး ဢၢႆႈၸၢႆးပၼ်ၾၢင်ႉၼင်ႇၼႆ။
ထႅင်ႈၼိုင်ႈလွင်ႈသမ်ႉ ၸွမ်းႁိမ်းႁွမ်း ဝဵင်းသီႇပေႃႉၼႆႉ မီးလွင်ႈၾင်မၢၵ်ႇမႅင်းၵေႃႈမီးလႄႈ သင်ဝႃႈ ၵူၼ်းၼွၵ်ႈမိူင်း တေၵႂႃႇဢႅဝ်ႇလႂ် တီႈလႂ်ၼႆ ႁႂ်ႈၽူႈၼမ်းတၢင်း ၽူႈလူင်ႉလႅၼ်ႇ ဢွၼ်ၼမ်းၵႂႃႇၼႆ တေလီ ဝႃႈၼႆ။
ၼႂ်းၸႄႈဝဵင်းသီႇပေႃႉလႄႈ ၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ သိုၵ်းလူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇ ၵႆႉပဵၼ် ပၢင်တိုၵ်းၵၼ်၊ ယဝ်ႉၵေႃႈ ၵႆႉမီးလွင်ႈႁၢင်ႈၵၢင်မၢၵ်ႇမႅင်းလႄႈ တူင်ႉၼိုင်ၵႂႃႇမႃး ယူႇတႃႇသေႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ