ၼႂ်းတိုဝ်ႉတၢင်း ပၢင်ပွႆးပီမႂ်ႇတႆး 2114 ၼီႈၼႆႉသေ ၸုမ်းၵူၼ်းၼုမ်ႇ ငဝ်ႈငုၼ်း SSPP ၸတ်းႁဵတ်းပၢင်ပွႆးယုၵ်ႉယွင်ႈဝၼ်း ၵိူတ်ႇ ၸၢႆးသၢႆမၢဝ်း ဢႃယု ၶွပ်ႈတဵမ် 75 ပီ။
ယူႇတီႈ ၸုမ်းၵူၼ်းၼုမ်ႇ ငဝ်ႈငုၼ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ဢွၼ်ႁူဝ်ၸတ်းႁဵတ်း ပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး 2114 ၼီႈ တီႈထၢတ်ႈမူၺ်ႇတေႃႇ ၵဵင်းလိူၼ် ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ ပၢင်ပွႆး ၼႆႉ တႄႇၸတ်းႁဵတ်း ၼႂ်းဝၼ်းတီႈ 25-27/11/2019 ။
“ ပီၼႆႉ ၸတ်းႁဵတ်း ပၢင်ပွႆးပီမႂ်ႇတႆးလႄႈ ၸတ်းပႃးပၢင်ပွႆးယုၵ်ႉယွင်ႈဝၼ်းၵိူတ်ႇၸၢႆးသၢႆမၢဝ်း ၶွပ်ႈတဵမ် ဢႃယု 75 ပီ။ ယဝ်ႉ ၵေႃႈ ၸတ်းႁဵတ်းပႃး ဝႂ်ၸၢမ်းၵၢမ်ႇတႃႇႁႃငိုၼ်းၵွင်ၵၢင်ၵႃႈယူတ်းယႃ ၸၢႆးသၢႆမၢဝ်းပႃးထႅင်ႈ” ၵူၼ်းၼုမ်ႇ ဢၼ်တူင်ႉၼိုင်ၼႂ်း SSPP ၵေႃႉၼိုင်ႈ လၢတ်ႈၼႄၼင်ႇၼႆ။
ၼႂ်းပၢင်ပွႆးပီမႂ်ႇတႆးၼႆႉ မီးပၢင်ၼႄတၢင်းၵႃႈ ၵူႈဢိူင်ႇ၊ ၵူႈဝၢၼ်ႈ ၶဝ်ႈႁူမ်ႈ ၶေႉၶဵင်ႇၵၼ် လိူဝ်ၼၼ်ႉ လဵၼ်ႈၸဵင် ၸိူဝ်းၼႆႉ။
ၼွၵ်ႈလိူဝ်ၼၼ်ႉ မီးၽူႈႁွင်ႉၽဵင်းၵႂၢမ်း ၸိုဝ်ႈသဵင်ယႂ်ႇ မႃးလဝ်ႇမူၼ်ႈတူၼ်ႈၸႂ်ပၼ် မိူၼ်ၼင်ႇ ၸၢႆးလၢဝ်သႂ်၊ ၸၢႆးသၢႆမၢဝ်း၊ ၸၢႆးသၢႆၾူၼ်၊ ၼၢင်းၼုမ်ႇၼုတ်း၊ ၸၢႆးငဝ်းႁၢၼ်ၾႃႉ လႄႈ ဢိၵ်ႇထႅင်ႈလၢႆလၢႆၵေႃႉ။ ၸုမ်းတွႆႇတိုင်ႈသမ်ႉ ပဵၼ်ႁႅင်းသၢမ်ႁႅင်း လႄႈ တိုၵ်ႉႁႅင်း ၸိူဝ်းၼႆႉ။
လႅင်ႇၶၢဝ်ႇ – ၸၢႆးလႅင်း
