ၵူၼ်းဝၢၼ်ႈတႃႈလူင် ႁူမ်ႈၵၼ် သၢၼ်ၶတ်းၽွင်းလူင်ၾၢႆႇၾႆးၾႃႉ ဢၼ်တေမႃးဢႅဝ်ႇယဵမ်ႈတီႈဝၢၼ်ႈ

ၵူၼ်းဝၢၼ်ႈတႃႈလူင် ဢွၵ်ႇၶေႃႈပိုၼ်ၽၢဝ်ႇ သၢၼ်ၶတ်းၽွင်းလူင်ၾၢႆႇၾႆးၾႃႉ လူင်ပွင်ၸိုင်ႈမိူင်းတႆး ဢၼ်တေမႃးဢႅဝ်ႇ ယဵမ်ႈဝၢၼ်ႈ ဢၼ်ဢၢၼ်းပၼ်ႁႅင်း သၢင်ႈၾၢႆယႄးယႂႃႇတွၼ်ႈၼိူဝ် ၼိူဝ်မႄႈၼမ်ႉတူႈၼၼ်ႉ ဝႃႈၼႆ။

ဝၼ်းတီႈ 24/11/2019 ၵူၼ်းဝၢၼ်ႈတႃႈလူင်ဢွၵ်ႇလိၵ်ႈပိုၼ်ၽၢဝ်ႇသၢၼ်ၶတ်းလွင်ႈ လုင်းၸၢႆးသၢမ်တိပ်ႉလူင် ၽွင်းလူင် ၾၢႆႇၾႆး ၾႃႉ ၸႄႈမိူင်းတႆးလႄႈၽူႈမီးပုၼ်ႈၽွၼ်းၼႂ်းၸုမ်းလူင်ပွင်ၸိုင်ႈမိူင်းတႆး ၶႂ်ႈမႃးႁူပ်ႉထူပ်းၵူၼ်းဝၢၼ်ႈတႃႈလူင် ၸႄႈဝဵင်းသီႇပေႃႉ ပိူဝ်ႈတႃႇ ပၼ်ႁႅင်းသၢင်ႈၾၢႆယႄးယႂႃႇ တွၼ်ႈၼိူဝ် ၼိူဝ်မႄႈၼမ်ႉတူႈ ၼႂ်းၸိုင်ႈတႆးပွတ်းႁွင်ႇ။

ၸၢႆးထမ်းဢၢႆး ၽူႈဢွၼ်ႁူဝ်တူင်ႉၼိုင်/ ၽူႈၶၢၼ်ပၢၵ်ႇၸုမ်းၵူၼ်းဝၢၼ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တႄႇမိူဝ်ႈပီ 2014 မႃးၼၼ်ႉ ၵူၼ်းဝၢၼ်ႈ တႃႈလူင် ႁူမ်ႈၵၼ် သၢၼ်ၶတ်းၾၢႆႁၢဝ်ႈႁႅင်းမႃးယဝ်ႉၵမ်းၼိုင်ႈ လွင်ႈပိူၼ်ႈတေမႃးသၢင်ႈၾၢႆတွၼ်ႈ ၼိူဝ် မႄႈၼမ်ႉတူႈၼႆႉ။ ၵူၺ်းၵႃႈ ၽႂ်ၵေႃႈဢမ်ႇထွမ်ႇသဵင်ၵူၼ်းမိူင်း၊ ဢမ်ႇမီးၽႂ် သႂ်ႇၸႂ်သေ ၵႅတ်ႇၶႄႁႄႉၵင်ႈပၼ်ၵူၼ်း မိူင်း။ ယွၼ်ႉၼၼ်လႄႈ ၵူၼ်းဝၢၼ်ႈ တႃႈလူင်ႁဝ်းၶႃႈ ႁူမ်ႈၵၼ်သေ သၢၼ်ၶတ်း ဢမ်ႇပၼ်ၶဝ်ႈဝၢၼ်ႈ” ဝႃႈၼႆ။

ၸၢႆးထမ်းဢၢႆး လၢတ်ႈထႅင်ႈဝႃႈ “ ယူႇတီႈၽွင်းလူင်လုင်းၸၢႆးသၢမ်တိပ်ႉလူင်တႄႉဝႃႈ သူသၢၼ်ၶတ်းႁဝ်း ဢမ်ႇပၼ်ၶဝ်ႈ ဝၢၼ်ႈၸိူင်ႉၼႆ ႁဝ်းၶႃႈ တေႁဵတ်းႁိုဝ် ၸွႆႈထႅမ်သူ မၼ်းၸၢႆးတႄႉ တွပ်ႇလၢတ်ႈၼႄႁဝ်းၶႃႈၶိုၼ်းၸိူင်ႉၼႆ” ဝႃႈၼႆ။

ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ ဝၢၼ်ႈတႃႈလူင်ၼႆႉ မီးယူႇၼိူဝ်ၾင်ႇမႄႈၼမ်ႉတူႈ တၢင်းၼိူဝ်ၾၢႆယႄး ယႂႃႇတွၼ်ႈ ၼိူဝ် ဢၼ်ၶွမ်ႊပၼီႊၶႄႇ၊ သဝိတ်ႉသိူဝ်ႊလႅၼ်ႇ လႄႈၵျပၢၼ်ႇၶဝ်တိုၵ်ႉၶိုင်သၢင်ႈၼၼ်ႉသမ်ႉပဵၼ် ပိုၼ်ႉတီႈသိုၵ်းသိူဝ်။ သင်ဝႃႈၾၢႆ ၼႆႉသၢင်ႈယဝ်ႉတူဝ်ႈၸိုင် ၼမ်ႉတေယိုင်ႈထူမ်ႈပႅတ်ႈဝၢၼ်ႈတႃႈလူင်ဢၼ်မီးႁူဝ်ၵူၼ်းႁိမ်းၸမ် 700 ပႃးၸဵမ် ၶူဝ်းၵိုၵ်းပိုၼ်း လႄႈတီႈလိၼ်ဢၼ်မီးငႂ်ႈၾုၼ်ႇလီ ၸိူဝ်းၼၼ်ႉ ဝႃႈၼႆ။

ၼၢင်းလၢဝ်ၶမ်း ၵူၼ်းဝၢၼ်ႈတႃႈလူင် လၢတ်ႈဝႃႈ “ ႁဝ်းၶႃႈ ၵမ်းၵမ်းတုၵ်းယွၼ်းႁႂ်ႈၵိုတ်းယင်ႉၵၢၼ်သၢင်ႈၾၢႆယႄးယႂႃႇ တွၼ်ႈၼိူဝ် ၼႆႉမီးမႃးလၢႆပွၵ်ႈၼႃႇယဝ်ႉ။ ၵူၺ်းၵႃႈလူင်ပွင်ၸိုင်ႈဢမ်ႇထွမ်ႇသဵင်ၶေႃႈတုၵ်းယွၼ်းႁဝ်း။ ဢၼ်ၽွင်းလူင် မႃးၼႆႉၵေႃႈ မႃးပၼ်ႁႅင်းသၢင်ႈၾၢႆထႅင်ႈ၊ ၵွပ်ႈၼၼ်ႁဝ်းၶႃႈသမ်ႉ တေထူပ်းမၼ်းႁဵတ်းသင်?” ဝႃႈၼႆ။

ၼိူဝ်မႄႈၼမ်ႉတူႈၼႂ်းၸိုင်ႈတႆးပွတ်းႁွင်ႇၼႆႉ မီးၽႅၼ်ၵၢၼ်သၢင်ႈၾၢႆယႂ်ႇလူင် သၢမ်ဢၼ်ပႃးၸဵမ် ၾၢႆလူင် ဢၼ်တေ ႁဵတ်းဢွၵ်ႇႁႅင်းၾႆးၾႃႉ 735 မႄႊၵဝတ်ႊ တီႈယႄးယႂႃႇ တွၼ်ႈၵၢင် ၼႂ်းၸႄႈဝဵင်းၼွင်ၶဵဝ် တီႈမီးပၢင်တိုၵ်းသိုၵ်းသိူဝ်သေ ၶွမ်ႊပၼီႊ SN Power ဢၼ်လူင်ပွင်ၸိုင်ႈမိူင်းၼေႃႇဝူၺ်း ပဵၼ်ၸဝ်ႈၶွင်ၵေႃႉလူင်းတိုၼ်းၶိုင်သၢင်ႈ၊ ၾၢႆၼႆႉ မီးယူႇၼိူဝ်သၢႆ ဢိင်ႇသၼ်ႇ (ၽႅၼ်ႇလိၼ်ဝႆ) ၵျွၵ်ႉၵျႅၼ်ႉ တီႈဢၼ်ပဵၼ်ဢွင်ႈသုၼ်ၵၢင် ဢိင်ႇသၼ်ႇႁၢဝ်ႈႁႅင်း ၼႂ်းပိုၼ်းမိူင်းမၢၼ်ႈ။

လွင်ႈၼႆႉ ႁဵတ်းႁႂ်ႈလႆႈလီၵူဝ် လီၽၢၼ်ႈ ယွၼ်ႉႁႅင်းၼမ်ႉၼၵ်း ဢၢင်ႇၵဵပ်းၼမ်ႉၼၼ်ႉ ၸၢင်ႈႁဵတ်းႁႂ်ႈ ပဵၼ်ၼဵၼ် ဢိင်ႇ သၼ်ႇလႆႈ မိူၼ်ၼႂ်းမိူင်းလၢဝ်း တီႈဢၼ်ၽႅၼ်ႇလိၼ်ဝႆ ႁႅင်းထိုင် 6.1 ရိၵ်ႉတိူဝ်ႇ မိူဝ်ႈဝူင်ႈပူၼ်ႉမႃး၊ ၸၢင်ႈပဵၼ်ယွၼ်ႉႁႅင်း ၼမ်ႉၼၵ်း ၾၢႆသႆးယႃးပူရီး ၼိူဝ်မႄႈၼမ်ႉၶွင် ဢၼ်ၸင်ႇႁႃယဝ်ႉတူဝ်ႈပူၼ်ႉမႃးပႆႇႁိုင်ၼၼ်ႉယဝ်ႉ။ ဢၼ်ၵိုင်ႉၵၢင်ႉလီ ယုပ်းၽၢၼ်ႈ ဢၼ်ၼိုင်ႈတႄႉယွၼ်ႉမႄႈၼမ်ႉၶွင် တွၼ်ႈတၢင်းတႂ်ႈ ၵိုင်ႉၵၢင်ႉႁႅင်ႈႁႅင်း ၵွပ်ႈၾၢႆသႆးယႃးပူရီးၼၼ်ႉၵေႃႈ ပဵၼ်တီႈလီၾၢင်ႉတႄႉတႄႉ။

ဝၢၼ်ႈတႃႈလူင်ၼႆႉ ၸိုဝ်ႈလိုဝ်းလင်ယွၼ်ႉၼမ်ႉ ၸဵမ်းဝၢၼ် မၢၵ်ႇဝၢၼ် ဢၼ်ၽုၵ်ႇၸွမ်း သၽႃႇဝ။ ၵူၼ်းဝၢၼ်ႈ တႃႈလူင် မီးသူၼ်မၢၵ်ႇဝၢၼ်တီႈ ဢေႇသုတ်းမၼ်းၼိုင်ႈၵေႃႉ 2 ဢေႊၶိူဝ်ႊ ႁဵတ်းႁႂ်ႈမီးလၢႆးလႆႈငိုၼ်း 1,960,000 ပျႃး တေႃႇပီ။

ၼၢင်းလၢဝ်ၶမ်းလၢတ်ႈဝႃႈ “ၼမ်ႉမႄႈယႂ်ႇလူင် မိူၼ်မႄႈၼမ်ႉၶွင်ၼၼ်ႉ ၼမ်ႉႁႅင်ႈႁႅင်းသေယင်းယဵၼ်းပဵၼ်ၵႄႈၼမ်ႉ ဢွၼ်ႇၵႂႃႇ။ ပေႃးၼၼ်မႄႈၼမ်ႉတူႈႁဝ်းလူး သမ်ႉတေပဵၼ်ႁိုဝ်?” ဝႃႈၼႆ။