သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း သိုပ်ႇပဵၼ်ပၢင်တိုၵ်းၵၼ် ၼႂ်းၸႄႈဝဵင်းၼမ်ႉသၼ်ႇ ႁၢဝ်ႈႁႅင်း ၵူၼ်းမိူင်း ႁဵင်ပၢႆ လႆႈဢွၼ်ၵၼ်ပၢႆႈၽေးသိုၵ်း ဝႃႈၼႆ။
တပ်ႉသိုၵ်းလူင်ပွင်ၸိုင်ႈမၢၼ်ႈ တင်း တပ်ႉသိုၵ်းတဢၢင်း TNLA ပဵၼ်ပၢင်တိုၵ်းၵၼ်မႃး တင်ႈတႄႇ ဝၼ်းတီႈ 11/11/ 2019 မႃးၼႆႉ ထိုင်ဝၼ်းမိူဝ်ႈၼႆႉ သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸႄႈဝဵင်းၼမ်ႉသၼ်ႇ ၸိုင်ႈတႆးပွတ်းႁွင်ႇ။
ၵူဝ်ႇဢပၢမ်း ၸုမ်းၸွႆႈထႅမ်တူင်ႇဝူင်း ဢိုမ်းတမၢဝ်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ႁဝ်းၶႃႈလႆႈၵႂႃႇၸွႆႈ ၵူၼ်းပၢႆႈၽေး သိုၵ်း တီႈဝၢၼ်ႈၵျွၵ်ႉၽိဝ်ႇလေး တေမီးႁူဝ်ၵူၼ်း 600 ပၢႆ။ တၢင်ႇတီႈသမ်ႉတေမီးထႅင်ႈ 1,000 ပၢႆ။ တေႃႈလဵဝ် ၵူၼ်းပၢႆႈၽေး သိုၵ်းၼႆႉ ဝၢၼ်ႈပၢင်ၼိမ်း၊ ဝၢၼ်ႈၵျွၵ်ႉၽိဝ်ႇလေးလႄႈ မၢၼ်ႈၶၢဝ် ၸႄႈဝဵင်းၵျွၵ်ႉမႄး ပၢႆႈဢွၵ်ႇမႃး ” ဝႃႈၼႆ။
ၾၢႆႇပွင်ႇၶၢဝ်ႇ တပ်ႉသိုၵ်းတဢၢင်းတႄႉ ပိုၼ်ၽၢဝ်ႇဝႆႉဝႃႈ မိူဝ်ႈဝႃး ဝၼ်းတီႈ 21/11/2019 ယၢမ်းၵၢင်ၼႂ်ၸဝ်ႉ သိုၵ်းလူင်ပွင် ၸိုင်ႈ မၢၼ်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ၵမ်းၼိုင်ႈ၊ ယၢမ်းၵၢင်ၼႂ် 7 မူင်းၶိုင်ႈ ထႅင်ႈၵမ်းၼိုင်ႈ။
ၵူဝ်ႇဢပၢမ်း သိုပ်ႇလၢတ်ႈဝႃႈ “ တေႃႈလဵဝ် တွၼ်ႈတႃႇ ၵူၼ်းပၢႆႈၽေးသိုၵ်းတႄႉ လူဝ်ႇၶဝ်ႈၼမ်ႉတၢင်းၵိၼ်။ တၢင်ႇတီႈၵေႃႈ လူဝ်ႇမိူၼ် ၵၼ်ၶႃႈဢေႃႈ ယွၼ်ႉဝႃႈ ၵႂႃႇယၢပ်ႇသေ ဢမ်ၵႂႃႇႁွတ်ႈထိုင်။ ႁဝ်းၶႃႈ ႁွတ်ႈထိုင်လႆႈတီႈဝၢၼ်ႈၵျွၵ်ႉၽိဝ်ႇလေးၼႆႉၵူၺ်း။ ၵူၼ်းပၢႆႈၽေးသိုၵ်းတၢင်ႇတီႈၵေႃႈ လူဝ်ႇတၢင်းၸွႆႈထႅမ်မိူၼ်ၵၼ်ယူႇ” ဝႃႈၼႆ။
ၼွၵ်ႈလိူဝ်ၼၼ်ႉ ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈၵႆႉဢဝ်ၶိူင်ႈမိၼ် ပၼ်ႇလဵပ်ႈ ၵူၼ်းဝၢၼ်ႈၼႂ်းပိုၼ်ႉတီႈ လၢတ်ႈၼႄ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ