ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2114 ၼီႈ တီႈဝဵင်းတူၼ်ႈတီး မီးပီႈၼွင်ႉတႆး တီႈၸမ်ၵႆ ၼႂ်းမိူင်း/ ၼွၵ်ႈမိူင်း မႃးၶဝ်ႈ ႁူမ်ႈ ၵိုၼ်းၶွၼ်ႈၼမ်။
ဝၼ်းတီႈ 21/11/2019 ယၢမ်းႁူဝ်ၶမ်ႈ မွၵ်ႈ 5 မူင်းၶိုင်ႈၼၼ်ႉ ယူႇတီႈလုင်းၸၢႆးထုၼ်းမျႃႉ ႁူဝ်ပဝ်ႈ ၵေႃပွင်ပဵၼ်ပၢင်ပွႆးပီမႂ်ႇ တႆး 2114 ၼီႈ လႄႈၻွၵ်ႊတိူဝ်ႊလိၼ်းထုတ်ႉ ၸွမ်ၽွင်း လူင် ၸႄႈမိူင်းတႆး ႁူမ်ႈၵၼ် ပိုတ်ႇပၢင်ပွႆး တီႈပၢင်ႇပွႆႇႁူင်းၾႆးမိၼ် ဢဝေႇယႃႇ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
လုင်းၸၢႆးထုၼ်းမျႃႉ ႁူဝ်ပဝ်ႈ ၵေႃပွင်ပဵၼ်ပၢင်ပွႆး လၢတ်ႈဝႃႈ “ တီႈတႄႉမၼ်း ပီၼႆႉ ႁဝ်းၶႃႈ ဢမ်ႇမီးၶပ်ႉမၢႆတႃႇတေၸတ်း။ ယွၼ်ႉဝႃႈ ပီတေမႃး 2020 သမ်ႉ တေပဵၼ်ပၢင်လိူၵ်ႈတင်ႈ ၼႂ်းမိူင်းႁူမ်ႈတုမ်ပတ်းပိုၼ်ႉ ၼႂ်းလိူၼ်ၼူဝ်ႊဝႅမ်ႊၿိူဝ်ႊလႄႈ တေ ဢမ်ႇတူဝ်ႈတၼ်း ၵၼ်ၵေႃႈပိူင်ၼိုင်ႈ။ ၵွပ်ႈၼၼ် ပီၼႆႉ တူၵ်းပုၼ်ႈၽွၼ်း ပီႈၼွင်ႉတၢင်းပွတ်းဢွၵ်ႇၶူင်း ႁပ်ႉႁဵတ်းၸဝ်ႈတႃႇ ၼ ၵူၺ်းၵႃႈ တၢင်းပီႈ ၼွင်ႉပွတ်းဢွၵ်ႇၶဝ် ဢမ်ႇတူဝ်ႈတၼ်းၵၼ်သေ ႁဝ်းၶႃႈ တၢင်းပွတ်းၸၢၼ်း ၸင်ႇႁပ်ႉပုၼ်ႈၽွၼ်း ႁဵတ်းသၢင်ႈၵႂႃႇၶႃႈယဝ်ႉ” ဝႃႈၼႆ။
သိုပ်ႇလၢတ်ႈဝႃႈ “ ပၢင်ပွႆးပီမႂ်ႇတႆး 2114 ၼီႈၼႆႉ ႁဝ်းၶႃႈ လႆႈမွၵ်ႇထိုင် ပီႈၼွင်ႉတႆးႁဝ်း ၼႂ်းမိူင်းတႆးပတ်းပိုၼ်ႉ ယဝ်ႉၵေႃႈ ၼႂ်းမိူင်းႁူမ်တုမ်လႄႈ ပီႈၼွင်ႉတႆး ဢၼ်မီးၼႂ်းမိူင်းဢိၼ်းတီးယိူဝ်း၊ မိူင်းထႆး၊ မိူင်းလၢဝ်း လႄႈ တင်းမိူင်းၶႄႇ ၼင်ႇႁိုဝ် ပေႃး တေမႃးဢုပ်ႇဢူဝ်းလႅၵ်ႈလၢႆႈ လွင်ႈၾိင်ႈငႄႈႁိတ်ႈႁွႆးၵၼ် တေမီးပီႈၼွင်ႉၶႅၵ်ႇမႃးၶဝ်ႈပွႆးႁဝ်းမွၵ်ႈမိုၼ်ႇပၢႆ” ဝႃႈၼႆ။
ဝၼ်းပိုတ်ႇပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2114 ၼီႈ တီႈဝဵင်းတူၼ်ႈတီးၼႆႉ မီးပီႈၼွင်ႉၸၢဝ်းၶိူဝ်းၼႂ်းမိူင်းတႆး မႃးလဝ်ႇ မူၼ်ႈ ၵႃႈဝႅၼ်ၾိင်ႈငႄႈႁိတ်ႈႁွႆးၽႂ်မၼ်းၵႂႃႇ ဝႃႈၼႆ။
ၶပ်ႉမၢႆပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2114 ၼီႈ တီႈဝဵင်းလူင်တူၼ်ႈတီးသမ်ႉ – ဝၼ်းတီႈ 22/11/2019 တႄႉ တေမီး ပၢင်မူၼ်ႈသိူဝ်းယၢမ်းၵၢင်ၶမ်ႈၵူၺ်း။
ဝၼ်းတီႈ 23-24/11/2019 ယၢမ်းၵၢင်ၼႂ်တေမီးပၢင်ဢၢၼ်ႇၽိုၼ်လိၵ်ႈ ၵဵဝ်ႇၵပ်းၵူႈမိူင်းမိူင်း ၊ ဢၼ်သုၼ်ၵၢင်ၶူၼ်ႉၶႂႃလွင်ႈ တႆး ဢွၼ်ၼမ်းၸတ်းႁဵတ်းတီႈႁူင်းႁေႃးႁပ်ႉၶူး ၸၼ်ႉၸွမ်တူၼ်ႈတီး။
ဝၼ်းတီႈ 25/11/2019 ၵေႃလိၵ်ႈလၢႆးလႄႈၾိင်ႈငႄႈတႆး 52 ၸႄႈဝဵင်းၼႂ်းမိူင်းတႆး တေႁူပ်ႉထူပ်း ဢုပ်ႇဢူဝ်းၵၼ်။ ဝၢႆး ဝၼ်းတေမီးပၢင်ၵိၼ်ၶဝ်ႈႁူမ်ႈမူႇ။
ဝၼ်းတီႈ 26/11/2019 ယၢမ်းၵၢင်ၼႂ် တေလဵပ်ႈတူၼ်ႈၶူဝ်းလူႇသေ တဵင်ႈၶိုၼ်းတေႁူမ်ႈၵၼ်ႁပ်ႉၸဵင် ပီမႂ်ႇတႆး 2114 ၼီႈ။
ဝၼ်းတီႈ 27/11/2019 တေမီးပၢင်လူႇတၢၼ်း ၵၢပ်ႈသွမ်းသင်ၶၸဝ်ႈသေ ယၢတ်ႇၼမ်ႉ တီႈႁူင်းႁေႃၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတူၼ်ႈတီး ။ ယၢမ်းႁူဝ်ၶမ်ႈမီးပၢင်ပိၵ်ႉပၢင်ပွႆးပီမႂ်ႇတႆး။
ၸုမ်းတွႆႇတိုင်ႈမူၼ်ႈၸႂ် ၶမ်ႈဝၼ်းတီႈ 21 ထိုင် 24/11/2019 တေမီးၸုမ်း ႁႅင်းမူတ်ႉလႅင်လႄႈ ဝၼ်းတီႈ 25 လႄႈ 26 တေ မီးၸုမ်းဝူင်းၸိူင်းလႅဝ်း ။ မီးၽူႈႁွင်ႉၵႂၢမ်းတႆးၸိုဝ်ႈသဵင်ယႂ်ႇတင်းၼမ်တင်းလၢႆမႃးလဝ်ႇမူၼ်ႈၸႂ်။
တႃႇတေပွင်ပဵၼ်ပၢင်ပွႆးပီမႂ်ႇတႆး 2114 ၼီႈ(ပီတႆး) တီႈဝဵင်းလူင်တူၼ်ႈတီးၼႆႉ ယူႇတီႈ ပီႈၼွင်ႉၵူၼ်းမိူင်း ၸုမ်းတူင်ႉၼိုင် တူင်ႇဝူင်းတႆး ႁူမ်ႈ ၵၼ်ၶွတ်ႇၽွတ်ႈၸုမ်းပွင်ၵၢၼ် ဝႆႉ- ႁူဝ်ပဝ်ႈ 1 ပဵၼ် လုင်းၸၢႆးထုၼ်းမျႃႉ၊ ႁူဝ်ပဝ်ႈ 2 ၸဝ်ႈလႅင်း သႂ် (ပၢင်ႇလႅင်းသႂ်)၊ ၽူႈၼမ်းၼႂ်း ၸၢႆးၸေႃႇၸေႃႇလႄႈ ၸုမ်းၽူႈၼမ်းၼႂ်းသမ်ႉ ၸၢႆးၶမ်းၼုတ်း၊ ၸၢႆးၼုတ်း၊ ၼၢင်းၼူၼ်း မူဝ်၊ ၼၢင်းၶမ်းၼူၼ်း။
ပၢင်ပွႆးပီမႂ်ႇတႆး ဢၼ်ၸတ်းႁဵတ်းၶိုၵ်ႉယႂ်ႇလူင် တီႈဝဵင်းတူၼ်ႈတီးၼႆႉ ၸတ်းႁဵတ်းမႃး ပဵၼ်ပွၵ်ႈၵမ်း 2 ပႃးပွၵ်ႈၼႆႉ။ ပွၵ်ႈၵမ်း ၼိုင်ႈ ၸတ်းႁဵတ်း မိူဝ်ႈပီ 2014 (ပီတႆး 2109)။
ပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး ဢၼ်ႁူမ်ႈၵၼ်ၸတ်းႁဵတ်း ၶိုၵ်ႉယႂ်ႇလူင်ၼႆႉ ပွၵ်ႈၵမ်းႁႅၵ်ႈ ၸတ်းႁဵတ်းတီႈ ဝဵင်းၵဵင်း တုင် မိူဝ်ႈပီ 2012 (ပီတႆး 2107)။ ပွၵ်ႈၵမ်းသွင်သမ်ႉ ၸတ်းႁဵတ်းတီႈတူၼ်ႈတီး မိူဝ်ႈပီ 2014 (ပီတႆး 2109)။ ပွၵ်ႈၵမ်းသၢမ် ပီ 2018 (ပီတႆး 2112) သမ်ႉ ၸတ်းႁဵတ်းတီႈဝဵင်းလႃႈသဵဝ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ