ပၢႆႉၶဝ်ႈဢွၵ်ႇ တီႈဝၢၼ်ႈၼွင်ဝူဝ်း ၸႄႈဝဵင်းလွၵ်ႉၸွၵ်ႇ (လွၵ်းၸွၵ်ႉ)ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ ၺႃးၵူၼ်းယႃႉ လူႉလႅဝ်ဝႆႉ ဝႃႈၼႆ။

မိူဝ်ႈၼႆႉ ဝၼ်းတီႈ 20/11/2019 ယၢမ်းၵၢင်ၼႂ် မီးၵူၼ်းယႃႉ ပၢႆႉၶဝ်ႈဢွၵ်ႇဝၢၼ်ႈ ဢၼ်ပူၵ်းဝႆႉတီႈႁူဝ်ဝၢၼ်ႈၾၢႆႇတၢင်းၸၢၼ်း ဢၼ်လုၵ်ႉတၢင်းၵျွၵ်ႉၵူႇ – လွၵ်ႉၸွၵ်ႇမႃး တီႈဝၢၼ်ႈၼွင်ဝူဝ်း ဢိူင်ႇၼွင်ဝူဝ်း ၸႄႈဝဵင်းလွၵ်ႉၸွၵ်ႇၼၼ်ႉ ၺႃးယႃႉၵွႆ 2 ဢၼ် ဝႃႈၼႆ။

ၵူၼ်းဝၢၼ်ႈၼွင်ဝူဝ်း ၵေႃႉၼိုင်ႈ လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မီးၵူၼ်းမႃးယႃႉၵွႆ မိူဝ်ႈၼႆႉ ၵၢင်ၼႂ်ၵူၺ်းၶႃႈ ဢေႃႈၼၼ်ႉ။ မိူဝ်ႈဝႃး တိုၵ်ႉလီယူႇ။ ႁဝ်းၶႃႈဢမ်ႇႁူႉဝႃႈ ပဵၼ်ၽႂ် လႆႈငိၼ်းဝႃႈတႄႉ ပဵၼ်ၵူၼ်းဝၢၼ်ႈႁဝ်းၶိုၼ်းၵူၺ်းၼႆ။ လႅပ်ႈမၼ်းဢမ်ႇပေႃးၶႂ်ႈတဵမ်ၼႆဝႃႇ လွင်ႈၼႆႉတႄႉ ႁဝ်းၶႃႈၵေႃႈ ဢမ်ႇယိုၼ်ယၼ်လႆႈ ဝႃႈပဵၼ်ၽႂ်တႄႉတႄႉ ၵူၼ်းယႃႉမၼ်း ၼၼ်ႉ” ဝႃႈၼႆ။

သိုပ်ႇလၢတ်ႈဝႃႈ “ ပၢႆႉၼႆႉ မီးဝႆႉ 2 ဢၼ် တႅမ်ႈလိၵ်ႈတႆးသေ ပူၵ်းဝႆႉ။ ပၢႆႉၵမ်းဢွၼ်တၢင်းၼၼ်ႉ ယွၼ်ႉဝႃႈ ၵွင်မၼ်းပွတ်း ဢိတ်းၼိုင်ႈၼႆသေ ႁဝ်းၶႃႈၶိုၼ်းမႃးႁဵတ်းမႂ်ႇထႅင်ႈဢၼ်ၼိုင်ႈ။ ဢၼ်ၺႃးယႃႉတႄႉ ၺႃးယႃႉတင်းသွင်ဢၼ်ၶႃႈယဝ်ႉ ” ဝႃႈၼႆ။

ပၢႆႉၶဝ်ႈဢွၵ်ႇဝၢၼ်ႈၼွင်ဝူဝ်း ပၢႆႉမႂ်ႇၼႆႉ တႅမ်ႈဝႆႉလိၵ်ႈတႆး “မႂ်ႇသုင်ႁူမ်ၸူမ်းႁပ်ႉတွၼ်ႈယူႇ ဝၢၼ်ႈၼွင်ဝူဝ်း”။ ထႅင်ႈၾၢႆႇၼိုင်ႈ သမ်ႉ တႅမ်ႈဝႆႉ “မိူဝ်ႈမႃးၵေႃႈႁႂ်ႈသိူဝ်း မိူဝ်ႈမိူဝ်းၵေႃႈႁႂ်ႈသႃႇ”။ လိူဝ်ၼၼ်ႉ ပၢႆႉၵဝ်ႇထႅင်ႈဢၼ်ၼိုင်ႈၼၼ်ႉသမ်ႉ တႅမ်ႈဝႆႉလိၵ်ႈ 3 ၽႃသႃ လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢင်းၵိတ်း ဝႃႈၼႆ။

“ ပၢႆႉၶဝ်ႈဝၢၼ်ႈၼႆႉ မီးဝႆႉ 2 ဢၼ်။ ပၢႆႉမႂ်ႇၼၼ်ႉ ႁဵတ်းဝႆႉ ဢမ်ႇပႆႇတၼ်းႁိုင် မီးဢဝ်လၢႆလိူၼ်ၼႆႉၵူၺ်း။ ပၢႆႉၵဝ်ႇၼၼ်ႉ ႁဵတ်း မႃး ပီပၢႆယဝ်ႉ။ ပဵၼ်ငိုၼ်းၵူၼ်းဝၢၼ်ႈႁူမ်ႈၵၼ်ႁဵတ်း ၼိုင်ႈဢၼ်လႂ် ၵႃႈၵေႃႇသၢင်ႈ ဢမ်ႇယွမ်း 10 သႅၼ်” ၵူၼ်းဝၢၼ်ႈၼွင် ဝူဝ်း လၢတ်ႈၼႄၼင်ႇၼႆ။

မိူဝ်ႈဝၼ်းတီႈ 24 လိူၼ်သႅပ်ႊထႅမ်ႊပိူဝ်ႊ 2019 ၼၼ်ႉၵေႃႈ ပၢႆႉလိၵ်ႈဢၼ်ပူၵ်းပၵ်းႁူဝ်ၼမ်ႉပွင်ႈ ပွၵ်ႉ 6 ၶၢႆးၽိုဝ်ႈ သဵၼ်ႈ တၢင်းၼမ်ႉပွင်ႈ – မိူင်းယႆ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၺႃးၵူၼ်းဢဝ်ၼမ်ႉယႃႈသီလမ်လၢႆႉတႃးၶႂႆႇၶႃ ပႄလႄႈ ႁဵတ်းႁႂ်ႈ ၵူၼ်းၼမ်ႉပွင်ႈတိူဝ်ႉၸႂ်။ ပၢႆႉၼၼ်ႉ တႅမ်ႈဝႆႉ 3 ၽႃသႃ လိၵ်ႈတႆး၊ လိၵ်ႈမၢၼ်ႈလႄႈ လိၵ်ႈဢင်းၵိတ်း။