ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA တင်း တူဝ်တႅၼ်းတပ်ႉသိုၵ်းလူင်ပွင်ၸိုင်ႈမၢၼ်ႈ တေႁူပ်ႉ ဢုပ်ႇဢူဝ်းငူပ်ႉငီႉၵၼ် တီႈၵဵင်းမႆႇ ၸိုင်ႈထႆး။

ဝၼ်းတီႈ 19/11/2019 ယၢမ်းၵၢင်ၼႂ် 10 မူင်း ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တင်း တူဝ် တႅၼ်းတပ်ႉသိုၵ်းလူင်ပွင်ၸိုင်ႈမၢၼ်ႈ တေႁူပ်ႉဢုပ်ႇဢူဝ်းငူပ်ႉငီႉၵၼ် တီႈၸႄႈဝဵင်းၵဵင်းမႆႇ ၸိုင်ႈထႆး။ ၾၢႆႇ RCSS သမ်ႉ ၸွမ်ႁၢၼ်ပွင်ၶိူဝ်း တင်း ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ 2 RCSS တေဢွၼ်ႁူဝ်။ တၢင်းၾၢႆႇ တပ်ႉသိုၵ်းလူင် ပွင်ၸိုင်ႈမၢၼ်ႈသမ်ႉ ၸွမ်သိုၵ်း ယႃႇပျေႉ တင်း ၸွမ်သိုၵ်း မိၼ်းၼွင်ႇ ဢွၼ်ႁူဝ် ဝႃႈၼႆ။

ၸဝ်ႈၶိုၼ်းသႂ် ၸႂ်ယဵၼ် ၽူႈၸတ်းၵၢၼ်လုမ်း PI လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၽုၵ်ႈ ဝၼ်းတီႈ 19 ၼႆႉ တၢင်းသွင်ၾၢႆႇ တေ ႁူပ်ႉၵၼ် ယၢမ်းၵၢင်ၼႂ် မွၵ်ႈ 10 မူင်းၼႆႉ တၢင်းၾၢႆႇ သိုၵ်းမၢၼ်ႈတႄႉ ပဵၼ်ၸွမ်သိုၵ်း ယႃႇပျေႉ တင်း ၸွမ်သိုၵ်း မိၼ်းၼွင်ႇ ဢွၼ်ႁူဝ်။ တၢင်းၾၢႆႇRCSS သမ်ႉ ပဵၼ်ၸွမ်ႁၢၼ်ပွင်ၶိူဝ်းတင်း ၸဝ်ႈသိုၵ်းလူင် ၸၢႆးငိုၼ်း ဢွၼ်ႁူဝ်” ဝႃႈၼႆ။

လွင်ႈတေႁူပ်ႉဢုပ်ႇဢူဝ်းငူပ်ႉငီႉၵၼ်တႄႉ ၵဵဝ်ႇၵပ်းလူၺ်ႈလွင်ႈပၼ်ႁႃ သွင်ၾၢႆႇ ဢၼ်လႆႈၶွင်ႉၶမ်ၵၼ်ဝႆႉ ၸဵမ်ၸိူဝ်းၼႆႉ။

လိူဝ်ၼၼ်ႉ ပေႃးထိုင်မႃး ဝၼ်းတီႈ 20/11/2019 ၸိုင် ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ဢၼ်လူင်းလၢႆးမိုဝ်းၵိုတ်းတိုၵ်းပတ်း ပိုၼ်ႉတူဝ်ႈမိူင်း NCA 10 ၸုမ်း တင်း တူဝ်တႅၼ်းလူင်ပွင်ၸိုင်ႈမၢၼ်ႈ တင်း တူဝ်တႅၼ်းတပ်ႉသိုၵ်း တေႁူပ်ႉထူပ်းဢုပ်ႇဢူဝ်း ၵၼ် တီႈၵဵင်းမႆႇ ၸိုင်ႈထႆး မိူၼ်ၵၼ်။

ၼွၵ်ႈလိူဝ်ၼၼ်ႉ ပေႃးထိုင်မႃး ဝၼ်းတီႈ 22/11/2019 ယၢမ်းၵၢင်ၼႂ် 10 မူင်းသမ်ႉ ၸုမ်း KNU တင်း တူဝ်တႅၼ်းလူင်ပွင် ၸိုင်ႈမၢၼ်ႈၵေႃႈ တေႁူပ်ႉဢုပ်ႇဢူဝ်းငူပ်ႉငီႉၵၼ် တီႈၵဵင်းမႆႇ ၸိုင်ႈထႆး မိူၼ်ၵၼ်။

မိူဝ်ႈဝၼ်းတီႈ 16-18/11/2019 ၼႆႉၵေႃႈ ယူႇတီႈၸုမ်းယိပ်းၵွင်ႈၵၢင်ႇ 10 ၸုမ်း ႁူပ်ႇဢုပ်ႇငူပ်ႉငီႉၵၼ် တွၼ်ႈတႃႇ ၶၵ်ႉၵၢၼ် လွင်ႈငမ်းယဵၼ် တႃႇၶၢဝ်းတၢင်း 3 ဝၼ်း တီႈၵဵင်းမႆႇ ၸိုင်ႈထႆး။