ဢိင်ၼိူဝ်သိုၵ်းဢူၺ်းလီ 3 ၸုမ်း တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်း တၢင်းပွတ်းၵူတ်ႉၶၢႆၼၼ်ႉသေ ရူတ်ႉ ၵႃးၵူၼ်းမိူင်းၶိုၼ်ႈလူင်းတၢင်းပွတ်းၼၼ်ႉ ၺႃးယိုဝ်းလၢႆလမ်း ဝႃႈၼႆ။
မိူဝ်ႈၼႆႉ ဝၼ်းတီႈ 15/11/2019 ယၢမ်းၵၢင်ၼႂ် မွၵ်ႈ 8 မူင်းၼႆႉ ရူတ်ႉၵႃးလူင် ၺႃးယိုဝ်း တီႈႁိမ်းဝၢၼ်ႈသျူႉၶိၼ်းတႃႇ ၼႂ်းၵႄႈ ၵူတ်ႉၶၢႆ – ၼမ်ႉၽၵ်းၵႃ ယၢၼ်ဝဵင်းမွၵ်ႈ 9 လၵ်း၊ ၵႃးသႅၼ်းလဵၵ်ႉၵေႃႈ ၺႃးယိုဝ်းလၢႆလၢႆလမ်း ဢၼ်လႆႈႁူႉတႅတ်ႈတေႃးတႄႉ ၵႃး 12 လေႃႉ ဢၼ်ၺႃးယိုဝ်း မီး 2 လမ်း။
ဢၢႆႈတူးၸဝ်ႈၵႃး လႃႈသဵဝ်ႈ – ၵူတ်ႉၶၢႆ – မူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ “ ၵႃးလူင် 12 လေႃႉ ၺႃးယိုဝ်းမၢၵ်ႇပွင်ႇသေ ၶမ် တၢင်းဝႆႉ တီႈႁိမ်းသျူႉၶိၼ်းတႃႇ ၼႂ်းၵႄႈၼမ်ႉၽၵ်းၵႃ – မူႇၸေႊ၊ ယၼ်ဝဵင်းမွၵ်ႈ 9 လၵ်း။ လိူဝ်ၼၼ်ႉ တီႈႁိမ်းလွႆသၢမ် သိပ်းၼၼ်ႉၵေႃႈ ၺႃးယိုဝ်းမိူၼ်ၵၼ်ၶႃႈဢေႃႈ” ဝႃႈၼႆ။
သိုပ်ႇလၢတ်ႈဝႃႈ “ လွင်ႈၼႆႉ ႁဝ်းၶႃႈၵေႃႈဢမ်ႇပွင်ႇၸႂ်ၶႃႈၼႃ ဢၼ်ယိုဝ်းသမ်ႉယိုဝ်းၵႃးၵူၼ်းမိူင်းတိၵ်းတိၵ်း သမ်ႉမႃးယိုဝ်း ၸွမ်းၼိူဝ်သဵၼ်ႈတၢင်းလူင် (ပြည်ထောင်စုလမ်းမ) ၵူၺ်း ၶဝ်ဢမ်ႇၵႂႃႇယိုဝ်းၵၼ်ၼႂ်းႁူၺ်ႈၼႂ်းလွႆ ဢၼ်ၵႆၵူၼ်းမိူင်းၼၼ်ႉ။ ႁဝ်းၶႃႈၵေႃႈ ပေႃးဢမ်ႇပွင်ႇၸႂ်ယဝ်ႉ” ဝႃႈၼႆ။
မိူဝ်ႈဝႃး ဝၼ်းတီႈ 14/11/2019 ၼၼ်ႉၵေႃႈ သိုၵ်းဢူၺ်းလီ 3 ၸုမ်း တင်း တပ်ႉသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်း ၵၼ် တၢင်းၼမ်ႉၽၵ်းၵႃ တင်းဝၼ်း ဝႃႈၼႆ။
ၵူၼ်းမိူင်းၵူတ်ႉၶၢႆ လၢတ်ႈၼႄၽူႈတွႆႇႁွၵ်ႈဝႃႈ “ မိူဝ်ႈဝႃးၼႆႉ သဵင်ၵွင်ႈတႅၵ်ႇတင်းဝၼ်းၶႃႈယဝ်ႉ။ မိူဝ်ႈၼႆႉတႄႉ ယဵၼ်ဝႆႉ ပႆႇ လႆႈငိၼ်းသင်။ တေလႆႈဝႃႈ မိူင်းႁဝ်းၼႆႉ ဢမ်ႇမီးလွင်ႈႁူမ်ႇလူမ်ႈသင်၊ မိူဝ်ႈၼႆႉ ပဵၼ်ဝၼ်းၵၢတ်ႇမိူင်းယူႉ လႆႈငိၼ်းဝႃႈ ၵၢတ်ႇ ၵေႃႈ ၵူၼ်းဢမ်ႇၵိုၼ်း ယုင်ႈယၢင်ႈဝႆႉ။ ၵူၼ်းမႃးၵၢတ်ႇမိူဝ်ႈၼႆႉ ယၢမ်းၵၢင်ၼႂ် ၺႃးသိုၵ်းႁႄႉၵိုတ်းသေ ပၢႆ ၸႅတ်ႈထၢမ်လူး ၵွၼ်ႇ၊ ၸွမ်းၵူတ်ႉလွႆ ၵူႈတီႈ ပဵၼ်ၵႃႈသိုၵ်းမၢၼ်ႈဢဝ်တီႈယူႇဝႆႉမူတ်း” ဝႃႈၼႆ။
သိုပ်ႇလၢတ်ႈဝႃႈ “ မိူဝ်ႈၼႆႉ ယၢမ်းၵၢင်ၼႂ် 10 မူင်းၼႆႉ တီႈၶူဝ်ၼမ်ႉၶၢႆ ၼႂ်းၵႄႈၵူတ်ႉၶၢႆ – မူႇၸေႊ ၺႃးဢိုတ်းဝႆႉၸူဝ်ႈၶၢဝ်း။ လိူဝ်ၼၼ်ႉ ၼႂ်း 2-3 ဝၼ်းၼႆႉ တၢင်းလူင် လႃႈသဵဝ်ႈ – မူႇၸေႊၼႆႉ ဢမ်ႇပေႃးမီးရူတ်ႉၶိုၼ်ႈလူင်းၼမ်မိူၼ်မိူဝ်ႈ ၵူႈပွၵ်ႈ” ဝႃႈၼႆ။
မိူဝ်ႈဝႃး ဝၼ်းတီႈ 14/11/2019 ယၢမ်းၵၢင်ၼႂ် မွၵ်ႈ 7 မူင်းပၢႆၼၼ်ႉ တပ်ႉသိုၵ်းတဢၢင်း TNLA တင်း တပ်ႉသိုၵ်းလူင်ပွင် ၸိုင်ႈမၢၼ်ႈ ပဵၼ်ပၢင်တိုၵ်းၵၼ်ထႅင်ႈတီႈႁိမ်းလွႆသၢမ်သိပ်း ၸႄႈဝဵင်းၵူတ်ႉၶၢႆ။ ၽူႈၸၢႆး 2 ၵေႃႉ တိူဝ်ႉၺႃးၸၢၵ်ႇမၢၵ်ႇၸွမ်း တေႃႈလဵဝ် လႆႈသူင်ႇယူတ်းယႃတူဝ်ဝႆႉ တီႈႁူင်းယႃၵူၼ်းမိူင်း ၸႄႈဝဵင်းၵူတ်ႉၶၢႆဝႆႉ။ လိူဝ်ၼၼ်ႉ သင်ၶၸဝ်ႈ ဢႃယုမွၵ်ႈ 45 ပီလႄႈ ၽူႈၸၢႆးထႅင်ႈၵေႃႉၼိုင်ႈ ဢႃယု 35 ပၢႆ ၺႃးၸၢၵ်ႇမၢၵ်ႇၸွမ်းထႅင်ႈ တင်းမူတ်း ၺႃးၸၢၵ်ႇမၢၵ်ႇ မီး 4 ၵေႃႉယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ