ၼၢင်းယိင်း ဢႃယု 43 ပီ ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆ ထင်တီႈၼႂ်းႁိူၼ်း တီႈဝၢၼ်ႈၼွင်ဝူဝ်း ၸႄႈဝဵင်းလွၵ်ႉၸွၵ်ႇ။
ဝၼ်းတီႈ 10/11/2019 ယၢမ်းႁူဝ်ၶမ်ႈမွၵ်ႈ 6 မူင်းၼၼ်ႉ ၼၢင်းၶမ်းၸိင်ႇ ဢႃယု 43 ပီ ၺႃးယိုဝ်းတၢႆထင်တီႈ တီႈႁိူၼ်းယေး ဝၢၼ်ႈၼွင်ဝူဝ်း ဢိူင်ႇၼွင်ဝူဝ်း ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း။
ပီႈၼွင်ႉၸမ်ၸႂ် ၼၢင်းၶမ်းၸိင်ႇ ၵေႃႉၼိုင်ႈ ဢႃယု မွၵ်ႈ 40 ပီ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၼၢင်း လုၵ်ႉတီႈႁႆႈပွၵ်ႈမႃး ဢွၼ်တၢင်း။ ၽူဝ်မၼ်းသမ်ႉ ဢဝ်ထူဝ်ႈမႃးတၢင်းလင်။ ၽိူဝ်ႇဝႃႈမၼ်းၼၢင်း ႁွတ်ႈ ၽႅဝ်ႁိူၼ်း ၵေႃႈ မီးၵူၼ်းၸၢႆးဢႃယု မွၵ်ႈ 25-26 ပီ ၵေႃႉၼိုင်ႈ ယိုဝ်းသႂ်ႇမၼ်းၼၢင်း 4 ႁွႆးသေ လႆႈလူမ်ႉတၢႆထင်တီႈၼႂ်း ႁိူၼ်းၼၼ်ႉ ၵမ်းလဵဝ်ၶႃႈယဝ်ႉ” ဝႃႈၼႆ။
ၼၢင်းၶမ်းၸိင်ႇဢၼ်ၺႃးယိုဝ်းၼၼ်ႉ တိူဝ်ႉၺႃးမၢၵ်ႇၵွင်ႈ တီႈႁူဝ်ၼူမ်းႁိမ်းမၢၵ်ႇႁူဝ်ၸႂ်ၾၢႆႇသၢႆႉ ႁွႆးၼိုင်ႈ၊ တီႈမိုဝ်းၾၢႆႇၶႂႃ ႁွႆးၼိုင်ႈ၊ တီႈႁူဝ်ၼဝ်ႇႁွႆးၼိုင်ႈလႄႈ တီႈပုမ်ႁွႆးၼိုင်ႈ တင်းမူတ်း ၺႃးမၢၵ်ႇၵွင်ႈ 4 ႁွႆး။
ပီႈၼွင်ႉၸမ်ၸႂ် ၼၢင်းၶမ်းၸိင်ႇ သိုပ်ႇလၢတ်ႈဝႃႈ “ ၶၢပ်ႈတူဝ်တၢႆ မၼ်းၼၢင်းတႄႉ လႆႈဢဝ်ၵႂႃႇလုမ်းလႃးတီႈ ႁူင်းယႃလွၵ်ႉ ၸွၵ်ႇသေ ယဝ်ႉၵေႃႈ ပူၼ်ႉၼႂ်းဝၼ်းတီႈ 11 ယၢမ်းဝၢႆး မွၵ်ႈ 4 မူင်းၼၼ်ႉၵမ်းလဵဝ်။ လွင်ႈတၢင်းမၼ်းတႄႉ ႁဝ်းၶႃႈၵေႃႈ ဢမ်ႇႁူႉ လီလီ ပဵၼ်လွင်ႈၸိူင်ႉႁိုဝ်သေလႄႈၺႃးယိုဝ်းဢၼ်ဝႃႈၼၼ်ႉ။ လႆႈငိၼ်းဝႃႈ ပဵၼ်ယွၼ်ႉငိုၼ်းတွင်းၼႆ။ ၵူၺ်းၵႃႈ ဢမ်ႇႁူႉ တႅတ်ႈတေႃး” ဝႃႈၼႆ။
သိုပ်ႇလၢတ်ႈဝႃႈ “ လိူင်ႈၵၢၼ်တၢႆၼႆႉ ပလိၵ်ႈၶဝ် မႃးဢဝ်ၵႂႃႇမၢၵ်ႇၵွင်ႈသေ လၢတ်ႈဝႃႈ ပေႃးပဵၼ်မၢၵ်ႇၵွင်ႈသိုၵ်းတႄႉ မၼ်း ဢမ်ႇၸႂ်ႈၸိူင်ႉၼႆ မၼ်းတေပဵၼ်မၢၵ်ႇၵွင်ႈၶၢႆတေႃႇၵၼ်ၸွမ်းလႅၼ်လိၼ်သေ မႃးယိုဝ်းၵၼ်ၵူၺ်း ၶဝ်တႄႉ ပၼ်ၶေႃႈ တွပ်ႇမၼ်းၸိူင်ႉၼၼ်ဢေႃႈ” ဝႃႈၼႆ။
ၼၢင်းၶမ်းၸိင်ႇ ဢႃယု 43 ပီၼႆႉ ပဵၼ်လုၵ်ႈယိင်း လုင်းသၢင်ႇၼူၵ်ႉ ပႃႈလဵၵ်ႉ မီးပီႈၼွင်ႉႁူမ်ႈတွင်ႉၵၼ် 4 ၵေႃႉ။ တႄႇၼႃႈ ႁိူၼ်းၸွမ်း ၸၢႆးပႃႉတဵင်း မီးလုၵ်ႈႁူမ်ႈၵၼ်ဝႆႉ 3 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ