ၵူၼ်းၼုမ်ႇ ဢႃယု မွၵ်ႈ 27 ပီ ၺႃးယိုဝ်းတၢႆ ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။
ဝၼ်းတီႈ 7/11/2019 ယၢမ်းႁူဝ်ၶမ်ႈ 6 မူင်းပၢႆၼၼ်ႉ ၵူၼ်းၼုမ်ႇ ဢႃယု 27 ပီ ၽူႈၸၢႆးၵေႃႉၼိုင်ႈ ၺႃးၸုမ်းဢမ်ႇႁူႉၾၢႆႇ ယိုဝ်းတၢႆ တီႈႁိမ်းဢွင်ႈတီႈၵၢၼ်ၶုတ်းသၢႆး ပွၵ်ႉ 8 ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။
လုင်းၵျေႃႇလႃႉ ၵူၼ်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းၼုမ်ႇဢၼ်ၺႃးယိုဝ်းတၢႆၼၼ်ႉ ဢမ်ႇၸႂ်ႈၵူၼ်းပိုၼ်ႉတီႈ။ ပဵၼ်ၵူၼ်းတၢင်းၼမ်ႉသၼ်ႇလူင်းမႃးယူႇၼမ်ႉတူႈ။ လႆႈငိၼ်းဝႃႈ မိူဝ်ႈၶမ်ႈဝႃးၼႆႉ မီးၵူၼ်း 4 ၵေႃႉ ၶီႈရူတ်ႉၶိူင်ႈမႃးယိုဝ်း။ ၵူၼ်းၼုမ်ႇဢၼ်ၺႃးယိုဝ်းတၢႆၼၼ်ႉၵေႃႈ ပဵၼ်ၵူၼ်းသူႇသမ်းၵိၼ်ယႃႈမဝ်းၵမ်” ဝႃႈၼႆ။
တေႃႈလဵဝ် ပလိၵ်ႈၶဝ် တိုၵ်ႉၵူတ်ႇထတ်း သွၵ်ႈႁႃၵူၼ်းႁၢႆႉ ဢၼ်မႃးယိုဝ်းၵူၼ်းၼုမ်ႇ ၼၼ်ႉယူႇ ဝႃႈၼႆ။
“ ၵူၼ်းၼုမ်ႇ ဢၼ်ၺႃးယိုဝ်းတၢႆၼၼ်ႉ ပဵၼ်ၵူၼ်းၵိၼ်ယႃႈ။ ယဝ်ႉၵေႃႈ ယူႇယူႇမႃးယွၼ်းငိုၼ်းၵဵပ်းငိုၼ်းတီႈၵူၼ်းဝၢၼ်ႈ” ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼႄၼင်ၼႆ။
ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇၼႆႉ မီးၸုမ်းယိပ်းၵွင်ႈၵၢင်ႇ ၵူႈၸၢဝ်းၶိူဝ်းလႄႈ တပ်ႉသိုၵ်းလူင်ပွင်ၸိုင်ႈမၢၼ်ႈ တူင်ႉ ၼိုင်ၵႂႃႇမႃး ဝႃႈၼႆ။
လိူဝ်ၼၼ်ႉ ၼႂ်းႁူဝ်လိူၼ်ၼူဝ်ႊဝႅမ်ႊၿိူဝ်ႊ 2019 ၼႆႉ ၵူၼ်းမိူင်းၵျွၵ်ႉမႄး 3 ၵေႃႉ ၺႃးယိုဝ်း တီႈႁၢၼ်ႉၶၢႆၶဝ်ႈၽၵ်း ၼမ်ႉ ၶူင်း တၢႆထင်တီႈ 2 ၵေႃႉ၊ ၵႂႃႇလူႉတၢႆ တီႈႁူင်းယႃၵျွၵ်ႉမႄး 1 ၵေႃႉ။ လိူဝ်ၼၼ်ႉ တီႈၸႄႈဝဵင်းၵူတ်ႉၶၢႆ ဝၢၼ်ႈပၢင်ႇလေႃႉၵေႃႈ ၽူႈၸၢႆးၵေႃႉ ၼိုင်ႈၺႃးယိုဝ်းသေ လႆႈမၢတ်ႇၸဵပ်းဝႆႉ။ တေႃႇထိုင်ယၢမ်းလဵဝ်ပလိၵ်ႈယင်းပႆႇတီႉလႆႈတူဝ်ၵူၼ်းႁၢႆႉ ဝႃႈၼႆ။
