လွင်ႈၵမ်ႉထႅမ်ၶိူင်ႈၸႂ်ႉတိုဝ်း ၼႂ်းၵၢၼ်ႁဵၼ်းၵၢၼ်သွၼ် ၾၢႆႇလိၵ်ႈလၢႆးၽႃသႃၸၢဝ်းၶိူဝ်း ပႆႇမီး Dr. မဵဝ်းတဵင်းၵျီး ၽွင်းလူင် ၾၢႆႇပၢႆးပၺ်ၺႃ မိူင်းႁူမ်ႈတုမ်လၢတ်ႈ။
ဝၼ်းတီႈ 5/11/2019 ပၢင်ၵုမ်ၽူႈတႅၼ်းသၽႃးၵူၼ်းမိူင်း ပွၵ်ႈၵမ်း 2 ၵမ်းထူၼ်ႈ 14 တီႈၼေႇပျီႇတေႃႇၼၼ်ႉ ယူႇတီႈ ၸၢႆးသီႇႁႃႉၵျေႃႇ (ႁွင်ႉ) ၸၢႆးႁၵ်ႉ ၽူႈတႅၼ်းသၽႃးၵူၼ်းမိူင်း ၸႄႈဝဵင်းမိူင်းယႆ တွင်ႈထၢမ် ၼႂ်းပၢင်ၵုမ်သၽႃးဝႃႈ ၼႂ်းမိူင်း ႁူမ်ႈတုမ်ၼႆႉ ပိုတ်ႇဝႆႉႁူင်းႁဵၼ်းလူင်ပွင်ၸိုင်ႈသေ ၸွမ်းၼင်ႇ လိၵ်းလၢႆးၽႃသႃၸၢဝ်းၶိူဝ်းလႆႈပူင်သွၼ် ၸွမ်းၼႂ်းႁူင်းႁဵၼ်း ၼၼ်ႉ ယွၼ်ႉလုၵ်ႈႁဵၼ်းၶဝ် လူဝ်ႇၶိူင်ႈၵမ်ႉထႅမ်ၼႂ်းၵၢၼ်ႁဵၼ်းၵၢၼ်သွၼ်လႄႈ ပပ်ႉတႅမ်ႈ/ ပပ်ႉလူ ၸိူဝ်းၼၼ်ႉ ၸွင်ႇမီး ၽႅၼ်ၵၢၼ် တႃႇတေၵမ်ႉထႅမ်ပၼ် ဝႃႈၼႆ။
ၻွၵ်ႊတိူဝ်ႊ မဵဝ်းတဵင်းၵျီး တွပ်ႇလၢတ်ႈဝႃႈ “ သင်ဝႃႈ တီႈၸႄႈမိူင်း၊ တိူင်းတၢင်ႇယွၼ်းၶိုၼ်ႈမႃးၸိုင် ယူႇတီႈႁွင်ႈၵၢၼ် ၾၢႆႇ ပၢႆးပၺ်ၺႃ တေၵူတ်ႇထတ်းၵမ်းၸၼ်ႉၸၼ်ႉသေ တေၸႅၵ်ႇပပ်ႉပၼ်ၵႂႃႇယဝ်ႉ။ ၵူၺ်းၵႃႈ လွင်ႈၵမ်ႉထႅမ်ၶိူင်ႈၸႂ်ႉတိုဝ်း ၼႂ်း ၵၢၼ်ႁဵၼ်းတႄႉ ဢမ်ႇလႆႈၵမ်ႉၵႅမ်ပၼ်” ဝႃႈၼႆ။
ၼႂ်းၸႄႈဝဵင်းမိူင်းယႆၼႆႉ ႁူင်းႁဵၼ်းလူင်ပွင်ၸိုင်ႈမၢၼ်ႈ ဢၼ်ပိုတ်ႇသွၼ်ဝႆႉ တင်းမူတ်းမီး 5 ဢိူင်ႇ။ လုၵ်ႈဢွၼ်ႇႁဵၼ်း တင်း မူတ်းမီး 1,350 ၵေႃႉ။ လိူဝ်ၼၼ်ႉ ၼႂ်းႁူင်းႁဵၼ်းၼၼ်ႉ လႆႈပူင်သွၼ်ပႃးထႅင်ႈ ၽႃသႃလိၵ်ႈတႆးၸွမ်း။
ၸၢႆးၵျေႃႇသီႇႁႃႉ လႆႈတၢင်ႇလၢတ်ႈၼႄၵႂႃႇဝႃႈ “ တီႈမိူင်းႁဝ်းၶႃႈၼႆႉ လုၵ်ႈႁဵၼ်းၶဝ် လူဝ်ႇပပ်ႉတႅမ်ႈ/ လူ၊ ၶိူင်ႈၵမ်ႉထႅမ် ၼႂ်း ၵၢၼ်ႁဵၼ်းၵၼ် တွၼ်ႈတႃႇသွၼ်ႁဵၼ်းၽႃသႃလိၵ်ႈလၢႆးတႆး။ လိူဝ်ၼၼ်ႉ တွၼ်ႈတႃႇ လၵ်းသုတ်ႇသွၼ်ႁဵၼ်းၽႃသႃ လိၵ်ႈတႆးၼၼ်ႉ ၸွမ်းၼင်ႇ ၸၼ်ႉႁဵၼ်းလိၵ်ႈၼၼ်ႉ ယူႇတီႈၵေႃလိၵ်ႈလၢႆးလႄႈ ၽူႈမီးပိုၼ်ႉႁူႉလိၵ်ႈတႆးၶဝ် ၵဵပ်းႁွမ် တႅမ်ႈ ဝႆႉ မီးလၵ်းသုတ်ႇမၼ်းဝႆႉယဝ်ႉ” ဝႃႈၼႆ။
ၵၢၼ်သွၼ်ႁဵၼ်း ပီ 2019-2020 ၼႆႉ ႁူင်းႁဵၼ်းလူင်ပွင်ၸိုင်ႈ ဢၼ်ပိုတ်ႇပူင်သွၼ်ဝႆႉ ၼႂ်းၸႄႈမိူင်းလႄႈ တိူင်း တင်းမူတ်း မီး 12,488 လင်၊ လုၵ်ႈႁဵၼ်း ၸၼ်ႉၼိုင်ႈ၊ သွင်လႄႈ သၢမ် တင်းမူတ်းမီး 766,731 ၵေႃႉ။ ၶူးသွၼ် ဢၼ်ပူင်သွၼ်ပၼ် ၾၢႆႇ ၽႃသႃလိၵ်ႈလၢႆးၵႂၢမ်းလၢတ်ႈၸၢဝ်းၶိူဝ်းသမ်ႉ တင်းမူတ်း 20,199 ၵေႃႉ။ ပဵၼ်ၶူးသွၼ် ၵိၼ်ၸွမ်းဝၼ်း ပၼ်လၢႆးလိူၼ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ