ၸၢႆးသိူဝ်ၼုမ်ႇ မေႃၵႂၢမ်းတႆး ၸိုဝ်ႈသဵင်ယႂ်ႇ လူႉတၢႆ

မိူဝ်ႈၼႆႉ ဝၼ်းတီႈ 6/11/2019 ယၢမ်းႁူဝ်ၶမ်ႈ 5:45 မူင်း ၸၢႆးသိူဝ်ၼုမ်ႇ ဢႃယု 61 ပီ မေႃၵႂၢမ်းတႆး ၸိုဝ်ႈသဵင်ယႂ်ႇ လူႉတၢႆ လူၺ်ႈတၢင်းပဵၼ်ၼၢဝ်(ဆင်တုပ်ကွေး) တီႈႁိူၼ်းမၼ်းၸၢႆး ဝၢၼ်ႈယၢင်းၵူင်း ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။

ပႃႈၼၢင်းသီ ၵေႃႉပဵၼ်မေးၼၢင်း လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်တၢင်းပဵၼ်ၼၢဝ် (ဆင်တုပ်ကွေး) မႃး 3 – 4 ဝၼ်းသေ လႆႈၵႂႃႇၶိုၼ်ႈႁူင်းယႃ တိုၵ်ႉလူင်းႁူင်းယႃမႃးမိူဝ်ႈဝႃးၼႆႉၵူၺ်း။ ၽိူဝ်ႇထိုင်မႃးမိူဝ်ႈၼႆႉ ယၢမ်းႁူဝ်ၶမ်ႈၵေႃႈ လႆႈလူႉသဵင်ႈၵႂႃႇ” ဝႃႈၼႆ။

ၽဵင်းၵႂၢမ်းတႆးဢၼ်ၸၢႆးသိူဝ်ၼုမ်ႇႁွင်ႉဢွၵ်ႇဝႆႉ တင်းမူတ်း မီး 3 ၶႅပ်းယဝ်ႉ ဢၼ်ၵူၼ်းတင်းၼမ် ယၢမ်ႈႁူႉၸၵ်းၵၼ်ဝႃႈ “တေဢၢၼ်းလႆႈယူႇ မွၵ်ႇႁၢင်ႈလီ” ၼႆၼၼ်ႉ ဝႃႈၼႆ။

ပႃႈၼၢင်းသီ သိုပ်ႇလၢတ်ႈဝႃႈ “ တင်းမူတ်း ပီႈသိူဝ်ၼုမ်ႇ ႁွင်ႉဢွၵ်ႇဝႆႉၽဵင်းၵႂၢမ်းမီး 3 ၶႅပ်း/ ၶူၺ်ႇယဝ်ႉ။ တေႃႈလဵဝ် တိုၵ်ႉႁၢင်ႈ ႁႅၼ်း တေဢွၵ်ႇထႅင်ႈၶႅပ်း/ ၶူၺ်ႉၼိုင်ႈယူႇ။ ၵူၺ်းၵႃႈ ႁဵတ်းပႆႇယဝ်ႉၶႅပ်းၵႂၢမ်းမၢႆထီႉ 4 ၼႆႉ ပီႈသိူဝ်ၼုမ်ႇသမ်ႉ လႆႈလူႉၵႂႃႇယဝ်ႉ။ လိူဝ်ၼၼ်ႉ ပီမႂ်ႇတႆး ပီၼႆႉ မၼ်းႁၢင်ႈႁႅၼ်းဝႆႉ တေၵႂႃႇႁွင်ႈၽဵင်းၵႂၢမ်းတီႈတႃႈၶီႈလဵၵ်းဢေႃႈ” ဝႃႈၼႆ။

ပေႃးထိုင်မႃး ဝၼ်းတီႈ 8/11/2019 ၸိုင် ယူႇတီႈလုၵ်ႈလၢင်းၼၢင်းမေးလႄႈ ပီႈၼွင်ႉ တေဢွၼ်ၵၼ် ပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈၵႂႃႇ ဝႃႈၼႆ။