ၵူၼ်းၼုမ်ႇ ၵေႃႉၼိုင်ႈ ၺႃးမိတ်ႈတႅင်းတၢႆ တီႈႁိမ်းဝတ်ႉပၢင်ဢုတ်ႇ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ဝၼ်းတီႈ 31/10/2019 ထူပ်းႁၼ်တူဝ်တၢႆ ၵူၼ်းၼုမ်ႇ ဢႃယု မွၵ်ႈ 30 ပီ ၸိုဝ်ႈၵူဝ်ႇတႅၵ်ႉ (ၸၢဝ်းၶိူဝ်းမၢၼ်ႈ) ၺႃးမိတ်ႈတႅင်း တၢႆ တီႈႁိမ်းဝတ်ႉပၢင်ဢုတ်ႇ ပွၵ်ႉ 5 ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၸၢႆးႁၢၼ်ႇ ႁူဝ်ပဝ်ႈၵူၼ်းၼုမ်ႇတႆး TYO ၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈပဵၼ်ၵူၼ်းၼုမ်ႇ ၵေႃႉ ၼိုင်ႈ ၺႃးမိတ်ႈတႅင်းတၢႆ လႆႈငိၼ်းဝႃႈပဵၼ်ၵူၼ်းၼုမ်ႇ လုၵ်ႉတၢင်းလိၼ်ထုင်ႉပဵင်း မႃးယူႇတၢင်းမၢၼ်ႈဢၢႆႈ” ဝႃႈၼႆ။
“ တၢင်းပွၵ်ႉ 5 ႁဝ်းၶႃႈၼႆႉ ၵူၼ်းသူႇသမ်းၵိၼ်ယႃႈမဝ်းၵမ်လႄႈ ၶၢႆၸိူဝ်းၼႆႉ မၼ်းၼမ်ၼႃႇ။ လိူဝ်ၼၼ်ႉ ၼႂ်းၸႄႈဝဵင်းလႃႈ သဵဝ်ႈႁဝ်းၶႃႈၵေႃႈ ၼမ်ၼႃႇၶႃႈ ၸဵမ်ၵူၼ်းၵိၼ်ၵူၼ်းသူႇ ၵူၼ်းၶၢႆမၼ်းၶႃႈယဝ်ႉ သိုဝ်ႉငၢႆႈၵိၼ်ငၢႆႈၼႃႇၶႃႈ။ ၵဵဝ်ႇလူၺ်ႈလွင်ႈ ၵၢၼ်တၢႆၼႆႉ လႅပ်ႈတေပဵၼ်ယွၼ်ႉယႃႈမဝ်းၵမ်ၶႃႈယူဝ်ႉ ႁဝ်းၶႃႈၶၢတ်ႈလမ်းတႄႉ”ၵူၼ်းပိုၼ်ႉတီႈ လႃႈသဵဝ်ႈလၢတ်ႈ ၼႄ ၼင်ႇၼႆ။
ၵဵဝ်ႇၵပ်းလွင်ႈၵၢၼ်တၢႆၼႆႉ ယူႇတီႈၸုမ်းၵူၼ်းၼုမ်ႇ ၸွႆႈထႅမ်တူင်ႇဝူင်းၵူၼ်း လႆႈၵႂႃႇႁပ်ႉဢဝ်တူဝ်တၢႆမႃးဝႆႉတီႈႁူင်းယႃလူင် ၵူၼ်းမိူင်း ဝဵင်းလႃႈသဵဝ်ႈ။ တီႈတူဝ်မၼ်းၸၢႆး မီးႁွႆးမိတ်ႈ တီႈၶႃလူင်လႄႈ ပုမ် ဝႃႈၼႆ။
မိူဝ်ႈပူၼ်ႉမႃး ဝၼ်းတီႈ 8/7/2019 ၼၼ်ႉၵေႃႈ ၵူၼ်းဝၢၼ်ႈပွၵ်ႉသူၺ်ႇလီ/ ပွၵ်ႉ 6 ၸႄႈဝဵင်းလႃႈသဵဝ်ႈ ၵေႃႉၼိုင်ႈမဝ်းလဝ်း သေ ယိပ်းလႅဝ်း ထၢမ်ၽိတ်း ၵူၼ်းၵႂႃႇမႃးၸွမ်းတၢင်းလႄႈ ယူႇတီႈၽူႈၵွၼ်းပွၵ်ႉ လုင်းၸၢႆးၽူဝ်းၵျွႆႇ ၵႂႃႇႁၢမ်ႈသေ ၺႃးၵူၼ်း မဝ်းလဝ်းၼၼ်ႉ ဢဝ်လႅဝ်းၾၼ်းသႂ်ႇ လႆႈမၢတ်ႇၸဵပ်း သူင်ႇယူတ်းယႃ တီႈလႃႈသဵဝ်ႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ